ސިލޯނާ އެކު ދިވެހީންގެ ޓެލެތޯނުގެ އޮޑިޓް ފާމަކީ، ކްރޯ މޯލްޑިވްސް

ރާއްޖޭގެ އަވަށްޓެރި ސްރީލަންކާއަށް ދިމާވެފައިވާ ހިތާމަވެރި ކާރިސާގައި ދިވެހިންގެ ފަރާތުން އެހީވުމަށް ކުރިއަށްގެންދިއުމަށް ހަމަޖެހިފައިވާ "ސިލޯނާއެކު ދިވެހިން" ޓެލެތޯންގެ އޮޑިޓް ފާމެއްގެ ގޮތުގައި ކްރޯ މޯލްޑިވްސް ހަމަޖައްސައިފިއެވެ.

މި އެއްބަސްވުމުގައި ޕީއެސްއެމްގެ ފަރާތުން ސޮއިކުރެއްވީ ޑިރެކްޓަރ ޕްރޮޖެކްޓް، ލޭންޑް، އެންޑް ބިޒްނަސް ޑިވެލޮޕްމަންޓް ޢާއިޝަތު އާސިފާއެވެ. ކްރޯ މޯލްޑިވްސްގެ ފަރާތުން ސޮއިކުރެއްވީ މެނޭޖިންގ ޕާޓްނަރ ޙަސަން މުޙައްމަދެވެ.

މިނިވަން އޮޑިޓް ފާމެން ނަގައިގެން މި މަސައްކަތް ކުރިއަށްގެންދެވުމުގެ ބޭނުމަކީ، ދެފުށްފެންނަ ގޮތަށް އަދި ރައްޔިތުންގެ އިތުބާރު ދެމެހެއްޓޭ ގޮތަށް ޓެލެތޯން ކުރިއަށްގެންދިއުންކަމަށް، އެއްބަސްވުމުގައި ސޮއިކުރެއްވުމަށް ފަހު، އާސިފާ ވިދާޅުވިއެވެ.

ކްރޯ ގްލޯބަލްއަކީ ދުނިޔޭގައި ހިނގާ މިފަދަ ބޮޑެތި ކާރިސާތަކުގައި އެހީތެރިކަން ދެމުންދާ ކުންފުންޏެއްކަމަށާއި ލަންކާއަށް އެހީވުމަށް ރާއްޖޭގައި ބާއްވާ ޓެލެތޯންގެ އޮޑިޓް މަސައްކަތް އެ ކުންފުނިން ކުރިއަށްގެންދަވަނީ، ކުންފުނީގެ އިޖުތިމާޢީ ޒިންމާގެދަށުންކަމަށް، ކްރޯ މޯލްޑިވެސްގެ މެނޭޖިންގ ޕާޓްނަރ ޙަސަން މުޙައްމަދު ވިދާޅުވިއެވެ.

މި ޓެލެތޯނާ ގުޅޭ ގޮތުން ވާހަކަދައްކަވަމުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ ޔާމިން ރަޝީދު ވިދާޅުވީ، މިއީ ލަންކާއަށް ކުރިމަތިވެފައިވާ ހިތްދަތި ހާދިސާގައި، އެހީތެރިކަން ފޯރުކޮށްދިނުމުގައި ދިވެހި ރައްޔިތުންގެ ބައިވެރިވުން ދައްކައިދިނުމަށް ކުރިއަށްގެންދަވަން ނިންމެވި ޓެލެތޯނެއްކަމަށާއި މި ޓެލެތޯންގައި ވަރަށް ގިނަ މީޑިއާތަކާއި އެކިއެކި އިދާރާތަކުގެ އެއްބާރުލެއްވުން މިހާރު ވެސް ލިބެމުންދާކަމަށް އޭނާ  ފާހަގަކުރެއްވިއެވެ.  އަދި މި ޓެލެތޯނަށް ލިބޭ ފައިސާ ޖަމާކުރުމަށް ޚާއްސަ އެކައުންޓެއް ހުޅުވާފައިވާ ކަމަށާއި މީގެ އިތުރުން މާލޭގެ އެކި ސަރަހައްދުތަކުގައި ފަންޑު ފޮށިތައް ބެހެއްޓެވުމަށް ހަމަޖެހިފައިވާ ކަމަށް ވެސް ޔާމިން ވިދާޅުވިއެވެ.  މި ކަމުގައި ހުރިހާ ރައްޔިތުން ބައިވެވަޑައިގެން، ލައްކާގެ ރައްޔިތުންނާ އެކު ދިވެހިން ތިބިކަން ދައްކުވައިދެއްވުން އެދިވަޑައިގަންނަވާ ކަމަށް، ޑީއެމްޑީ ޔާމިން ރަޝީދު ވިދާޅުވިއެވެ

މި ތެލެތޯންގައި ބައިވެރިވެވަޑައިގަތުމަށް ނަގުދު ފައިސާއާއި ޓްރާންސްފަރ އަދި ބޭންކް ޗެކް މެދުވެރިކޮށް ފައިސާ ޖަމާކުރެއްވޭނެއެވެ.

 މާދަމާގެ ހެނދުނު 09:00އިން ފެށިގެން މާދަމާ ރޭ މެންދަމުން އަލިވެ، 01:00އަށް މި ޓެލެތޯން ކުރިޔަށް ގެންދިއުމަށް ވަނީ ހަމަޖެހިފައެވެ.

ޙަސަން ޝާކިރު މުޙައްމަދު
ޙަސަން ޝާކިރު މުޙައްމަދު
ޙަސަން ޝާކިރު މުޙައްމަދަކީ ކުޅަދާނަ ޅެންވެރިއެކެވެ. ލިޔުންތެރިއެކެވެ. މިހައިތަނަށް އަށް ފޮތް ލިޔުއްވައި، ނެރުއްވައިފައި ވެއެވެ. ޙަސަން ޝާކިރު މުޙައްމަދަށް ވަނީ، ދިވެހި ޅެންވެރިކަމުގެ ރޮނގުން 1998 ވަނަ އަހަރު، ޢާންމު ޚިދުމަތުގެ ހިތްވަރު ދިނުމުގެ އިނާމު، އަދި 2007 ވަނަ އަހަރު، ދިވެހި އަދަބިއްޔާތަށް ޚިދުމަތް ކުރުމުގެ ދާއިރާއިން، ދިވެހިބަހުން ވާހަކަދެއްކުންތެރިކަމުގެ ރޮނގުން ހިތްވަރު ދިނުމުގެ އިނާމު ލިބިވަޑައިގެންފައެވެ. އަދި 2022 ވަނަ އަހަރު ދިވެހިބަހާއި އަދަބިއްޔާތުގެ ދާއިރާއިން ޝަރަފުވެރިކަމުގެ ޤައުމީ އިނާމުވެސް ޝާކިރަށް ވަނީ ލިބިވަޑައިގެންފައެވެ.

ޚިޔާލު ފޯމު

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.