ދިރާގު މޯލްޑިވްސް ރޯޑް ރޭސް (ޑީ.އެމް.އާރް.އާރް) 2025ގެ މެޑަލް އަދި ރޭސް ކިޓް ދިރާގުން ދައްކައިލައިފިއެވެ.
މި އަހަރުގެ ދުވުން ބޭއްވުމަށް ހަމަޖެހިފައިވަނީ 24 އޮކްޓުބަރު 2025 ވާ ހުކުރު ދުވަހު ހުޅުމާލެ ސެންޓްރަލް ޕާކްގައެވެ.
ޑީ.އެމް.އާރް.އާރް 2025 ގެ ރަސްމީ ރޭސް ކިޓްގެ ތެރޭގައި ރޭސް ނިންމާ ވަގުތު ދެނެގަނެވޭ ޗިޕް އެކުލެވޭ ބިބް، ދުވުންތެރިންނަށް ހާއްސަ ޓީޝާޓް، އަދި ދުވުމުގެ ދުވަހު ކޮންމެހެން ބޭނުންވާ ތަކެތި ގެންދިއުމަށް ރޭސް ދަބަހެއް ހިމެނެއެވެ. މީގެ އިތުރުން ރޭސް ނިންމާ ކޮންމެ ދުވުންތެރިއަކަށް ޑީ.އެމް.އާރް.އާރް 2025 އަށް ހާއްސަކޮށް ފަރުމާކުރެވިފައިވާ މެޑަލް އެއް ލިބިގެންދާނެއެވެ.
ޑީ.އެމް.އާރް.އާރްއަކީ ރާއްޖޭގައި ބާއްވާ އެންމެ ބޮޑު އަދި އެންމެ ގިނަ މީހުން އިންތިޒާރުކުރާ ދުވުމުގެ އިވެންޓެވެ. މި ދުވުމުގެ އިވެންޓުގައި ސަރަހައްދީ ގައުމުތަކުގެ ދުވުންތެރިން ވެސް ބައިވެރިވެއެވެ. އަދި މީގެ އިތުރުން ވޯރލްޑް އެތުލެޓިކްސް ސަރޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވަރލްޑް ރަނިންގ ކަލަންޑަރުގައި ލިސްޓުކޮށްފައިވާ ދިވެހިރާއްޖޭގެ ހަމައެކަނި ބައިނަލްއަގްވާމީ ދުވުމެވެ.
ކޮންމެ އަހަރަކުވެސް މި އިވެންޓަކީ އެއްބައިވަންތަކަމާއި ދުޅަހެޔޮ ދިރިއުޅުމެއް އުޅުމުގެ ރޫހެއް އުފެއްދުމުގެ އިތުރުން މުހިންމު އިޖުތިމާއީ ކަންކަމަށް ހޭލުންތެރިކަން ގެނެސްދޭ އިވެންޓެކެވެ. މި އަހަރު ޑީ.އެމް.އާރް.އާރް ގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެން.ޖީ.އޯތަކަށް އާންމުން ހޭލުންތެރިކުރުވުމަށާއި ފަންޑްރެއިޒް ކުރުމުގެ ފުރުސަތު ލިބިގެންދާނެއެވެ.
ޑީ.އެމް.އާރް.އާރް 2025 އަށް ރަޖިސްޓްރީ ކުރުމުގެ ފުރުސަތު މިހާރު ހުޅުވާލާފައިވާއިރު، 4،000 ބައިވެރިން ހަމަވުމުން ބަންދުކުރާނެ އެވެ. އިތުރު މައުލޫމާތާއި ރަޖިސްޓްރީ ކުރުމަށް dmrr.com.mv