( 27 އޯގަސްޓް 2025 ގައި ޝާއިޢުކުރި ބަޔާގުޅޭ )
މީރަބް ކޮފީހަދަމުން ގެންދިޔައިރު ، މުރުތަސިމް އިނީ ކަޅިޖަހައިނުލާ މީރަބާ ދިމާލަށް ބަލަހައްޓައިގެންނެވެ. މީރަބް އައިސް ކޮފީތަށިގެނެސް ދިއްކޮށްލުމާއެކީ ، އެހާ އަވަހަށް އޭނާއަށް ކޮފީހަދައިދިނީތީ މުރުތަސިމް ޝުކުރު އަދާކުރިއެވެ. ކޮފީތަށްޓެއް ހަދައިދިނުމަކީ ، މީރަބަށް އެހާ އުނދަގޫ ކަމެއްނޫނެވެ. މީރަބް ހެދީ އެންމެ ދެތަށި ކޮފީއެވެ. މަރިޔަމަށް ހަދައިދިން ކޮފީތަށި ކޮބައިތޯ މުރުތަސިމް ސުއާލު ކުރިއެވެ. މަރިޔަމް މިހާރު ނިދާފާނެކަމަށް ، މީރަބަށް ބުނެވުނުއިރު ، މަރިޔަމާބެހޭގޮތުން ކުރިން ބުނެވުނު ވާހަކައެއް މީރަބްގެ ހަނދާނަކު ނެތެވެ. މަރިޔަމް އިނީ އިމްތިޙާން ކައިރިވެފައި އޮތީމަ ކިޔަވަންކަމަށާއި ، ކޮފީތަށްޓެއް ބޭނުންތޯ އަހައިލަން މަތީބުރިޔަށް މަރިޔަމްގާތަށް ގޮސް އައިކަމަށް މުރުތަސިމް ގާތު ބުނެވުނީ ދެންމެއަކު އެވެ.
ކޮފީ ބޭނުންނޫންކަމަށް މަރިޔަމް ބުނިވާހަކަބުނުމާއެކު ، އެކަމާބެހޭގޮތުން ބަހުސްނުކޮށް ކޮޓަރިޔަށް ދިއުމަށް މީރަބް ބޭނުންވިއެވެ. ކޮފީބޮއެ ނިމުނުއިރުވެސް މުރުތަސިމް ހުރީ އޭނާ އެ ބަލަމުންގެންދާ ޒުބޭރު މާލިކުގެ ފައިލްތައް ބެލުމުގައެވެ. މާދަމާ އިރުއެރުމުގެކުރިން އެކަން އޭނާ ، ނިންމަން ޖެހެއެވެ. އެއީ މަރިޔަމްއާ ވާހަކަ ދައްކައިލަން ރަނގަޅު ފުރުޞަތެއްކަމަށް މީރަބަށް ފެނުނެވެ. ކޮފީތަށި ބަދިގެޔަށްލާން މީރަބް ހިނގައިގަތުމާއެކީ ، މުރުތަސިމް އެކަން މަނާކުރިއެވެ. ނޯކަރުން އައިސް އެތަށިތައް ގެންދަން ބެހެއްޓުމަށް މުރުތަސިމް ބޭނުންވިއެވެ. މީރަބް ބޭނުންވީ ، ބަދިގެޔަށް ދިއުމުގެ ބަހަނާ ދައްކާފައި ގޮސް ، މަރިޔަމްއާ ބައްދަލުކުރާށެވެ. ގެޔަށް ވަގަށް ފިރިހެނަކު ވައްދައިގެން ، މަރިޔަމް އެގަންނަ ގަނޑެއް ބަލަން މީރަބް ބޭނުންވިއެވެ. މީރަބް ހިނގައިގަތުމާއެކީ ، މުރުތަސިމްވެސް މީރަބާއެކީ ބޭރަށް ނުކުންނަން ހިނގައިގަތެވެ. މީރަބް އެކަން މަނާކޮށް އޭނާ އެކަނި ބަދިގެޔަށް ހިނގައިދާނެކަމަށް ބުންޏެވެ. މުރުތަސިމް އެކުރާ މަސައްކަތް ނިންމައިލަންވާއިރަށް ، ލަހެއްނުވެ އަންނާނެއެވެ.
ބަދިގެޔަށް ތަށިތައްލާފައި މީރަބް ދިޔައީ މަރިޔަމް ފިލާހުރި ކޮޓަރިޔަށެވެ. ޗޯކީދާރުންނަށްވެސް ނޭނގޭގޮތަށް ، އެންމެންނަށް ވަގަށް ، އެމީހަކު އެގެޔަށް ވަދެގެން އައިގޮތެއް ބަލަން މީރަބް ބޭނުންވިއެވެ. މަރިޔަމް ފިލާހުރި ކޮޓަރިޔަށް ވަދެ ، އެގެޔަށް ވަގަށް ވަދެގެން އެއުޅުނީ ކާކުތޯ މީރަބް ސުއާލު ކުރިއެވެ. މަރިޔަމްހުރީ ހިތްބިރު ގެންފައެވެ. މީރަބަކީ ، އޭނާއާ އެކީ އުޅެބޮޑުވި މީހެއްނޫނެވެ. ޙަޔާއާ އޭނާއާ ދެމެދު އޮންނަ ކަހަލަ ގާތްގުޅުމެއް އަދިއެއް ނުއުފެދެއެވެ. އެހެންނަމަވެސް ، މީރަބަކީ ގޯސްމީހެއްކަމަކަށް މަރިޔަމެއް ނުބަލައެވެ. ކޮންމެ މީހެއްގެވެސް އަމިއްލަ ގޮތްތަކެއް ހުންނާނެކަން ، އޭނާއަށް އެނގެއެވެ.
އެ ފިރިހެނާއާ ބެހޭގޮތުން ، ސުއާލަކަށްފަހު ސުއާލެއް ކުރަމުންގޮސް ، އެ ފިރިހެނާގެ ވަނަވަރު މަރިޔަމްގެ ފަރާތުން މީރަބް ހޯދިއެވެ. އެއީ ، އަޙްމަދުއާބާދުގައި ދިރިއުޅޭ ، އާދައިގެ އެހެނަސް ، ރަނގަޅު ޢާއިލާއެއްގެ ފިރިހެން ކުއްޖެކެވެ. އޭނާގެ ނަމަކީ އަނަސް އެވެ. މަރިޔަމްއާ އަނަސްއާ ދިމާވީ ، މަރިޔަމްގެ ކޮލެޖް ކައިރިންނެވެ. އަނަސްއަކީ ، ރަނގަޅު ވަޒީފާއެއްގައި އުޅޭ ކުއްޖެކެވެ. މަރިޔަމްދެކެ އަނަސް ، ވަރަށް ލޯބިވެއެވެ. މަރިޔަމްގެ ޝާހީޢާއިލާގެ ދަރިދަރިކޮޅުން އައިސްފައިވާ ހަމަތަކުން ، އެޢާއިލާގެ މީހުންގެ ކައިވެނި ކުރެވެނީ ޢާއިލާގެ ތެރެއިންނެވެ. ޢާއލާއިން ބޭރުމީހުންނަކާ ނުއިނދެވެއެވެ. މަރިޔަމްއާ ދެވާނެ އިތުރު ފިރިހެނަކު ، އެޢާއިލާއަކު ނެތެވެ. އެ ހަމަތަކަށް ބަލާއިރު ، އަނަސްއަކީ މަރިޔަމްއަށް އިނދެވޭނެ ފިރިހެނެއް ނޫނެވެ. އެހެންކަމުން ، އެދެމީހުންވެސް ނިންމައިގެން އެތިބީ ، ޢާއިލާގެ އެއްވެސް މީހަކަށް ނާންގައި ، ފިލައިގެންގޮސް ކޯޓުގައި ކައިވެނި ކުރުމަށެވެ.
" ތިހާ ނުރައްކާތެރި ފިޔަވަޅެއް އަޅަން މަރިޔަމް ނިންމިއިރު ، ހިތްވަރެއްވެސް ހުންނަންވާނެއެވެ. ތިކައިވެނި ކުރެވޭނީ މުރުތަސިމާއި ޚާނަމް މަންމަގެ ރުހުމާއެކީގައެވެ. އެކަން ކޮށްދޭނީ އަހަރެންނެވެ. " މީރަބް ބުންޏެވެ.
ކައިވެނީގެ ކުރިން މުރުތަސިމްބޭބެއާ އެވާހަކަ ދައްކައިފިއްޔާ އަނަސް މަރައިލާކަށްވެސް ފަހަކަށް ނުޖެހޭނެއެވެ. އަދި އަމްދުން މީރަބްގެ ފަރާތުން އެކަން އެނގިއްޖިއްޔާ ، މީރަބްގެ ދުވަސްވެސް ދާނެއެވެ. ކޮންމެގޮތެއް ވިޔަސް ، މުރުތަސިމްގާތު އެވާހަކަ ދައްކާނީ މަރިޔަމްކަމަށް އޭނާ ނިންމިއެވެ.
" ތިއީކީ ، މަރިޔަމްއަށް ހަމަޖެއްސޭނެ ކަމެއްނޫނެވެ. މުރުތަސިމް ބުނާ އެންމެ ބަހަކުން މަރިޔަމްގެ ތިހުވަފެން ބިލާހަކަށްވާނެއެވެ. އަހަރެންނާ ދިމާލަށް މުރުތަސިމާއި ޚާނަމް މަންމަ ކިޔާނެ އިތުރު އެއްޗެއް މިހާރަކު ނެތެވެ. އަހަރެންގެ ކައިވެންޏާ ދޭތެރޭ އަހަރެން ވިސްނާކަށް ނުޖެހެއެވެ. އެއީ ، ކަރުދާސްގަނޑެއްގައި ލިޔެވިފައި އޮތް އެއްޗެކެވެ. " މީރަބް ބުންޏެވެ.
މީރަބަށް އެހުރީ ވަރަށްބޮޑަށް އޮޅިފައިކަމަށް މަރިޔަމް ބުންޏެވެ. މީރަބްދެކެ ، މުރުތަސިމް އިންތިހާއަށް ލޯބިވެއެވެ. އެއީ ކިހާވަރެއްގެ ލޯތްބެއްކަން އޭނާއަށް އެނގޭކަމަށް މީރަބް ބުނުމާއެކީ ، މީރަބްގެ މައްޗަށް އޮތް މުރުތަސިމްގެ ލޯބި ސާފުކޮށްދެވޭތޯ މަރިޔަމް މަސައްކަތް ކުރިއެވެ. އެކަމަކު ، މަރިޔަމްގެ ވާހަކަ އަޑުއަހާކަށް މީރަބް ބޭނުމެއް ނުވިއެވެ. އެއްވެސް މީހެއްގެ ގާތުގައި މަރިޔަމްގެ އެ ކައިވެންޏާބެހޭ ވާހަކަ ނުދެއްކުމަށް މީރަބް އެދުނެވެ. މުރުތަސިމްގާތު ބުނެފިއްޔާ އަނަސްގެ ދުވަސް ދުއްވައިލާނެއެވެ. ޚާނަމް މަންމަގާތު ބުނެފިއްޔާ މަރިޔަމައާ ދިމާލަށް ހެއްދެވި ނުހެއްދެވިޔަށް ގޮވާނެއެވެ. ޙަޔާގާތު ބުނެފިއްޔާ ، ވައިރޯޅިއެއްހެން ، މުޅި ގޭތެރެޔަށް އެވާހަކަ ފެތުރިގެން ދާނެއެވެ.
މީރަބް އެންމެ ފުރަތަމަ ، އަނަސްއާ ބައްދަލުކުރާނީއެވެ. އެއީ އުނދަގޫކަމަކަށް ވެދާނެއެވެ. އެކަމަކު އެކަން ، މީރަބް ކުރާނެއެވެ. މުރުތަސިމާއި ޚާނަމް މަންމަގެ ރުހުމާއެކީގައިނޫނީ އެކައިވެނި ނުކުރުމަށް ، އަނަސް އެއްބަސް ކުރުވާނެއެވެ. މުރުތަސިމާ އެވާހަކަ މީރަބް ދައްކާނީ ، އޭގެ ފަހުންނެވެ. މީރަބް އެތަނުން ނުކުތީ ، އެކަމާ ކަންބޮޑުނުވުމަށް މަރިޔަމްއަށް ނަޞޭޙަތްތެރިވަމުން ، މުރުތަސިމަށް ނުފެންނަނިސް ، ކޮޓަރިޔަށްގޮސް އަވަހަށް ނިދާށޭ ބުނަމުންނެވެ.
މީރަބް އައިސް ކޮޓަރިޔަށްވަނުމާއެކީ ، އޭނާ އެދިޔައީ ކޮންތާކަށްތޯ މުރުތަސިމް ސުއާލު ކުރިއެވެ. މީރަބް އައުން ލަސްވެގެން ، ބަދިގެތެރެވެސް މުރުތަސިމް ބަލައިލައިފިއެވެ. ބަދިގެޔަކުވެސް މީރަބެއް ނެތެވެ. އޭނާއެ އައީ މަރިޔަމްގާތުންކަމަށް މީރަބް ބުންޏެވެ. މަރިޔަމް ފިލާވަޅު ދަސްކުރަން އިނީމަ ، ދެފަހަރިންވެގެން ބައެއް ފިލާވަޅު ކުރިޔަށް ގެންދިޔައީއެވެ. ބައެއް އެހެން ވާހަކަވެސް ، މަރިޔަމްއާ ދެމީހުން ދެއްކިއެވެ. އެކަމަކު ، އޭނާއެއައީ ، މާލަސްވެއްޖެ ކަމަށް ބުނަމުން މަރިޔަމް ނިދަން ފޮނުވައިލާފައެވެ. ފިލާވަޅު ނޫން އެހެން ވާހަކައެއް ދެއްކިވާހަކަ މީރަބަށް ބުނެވުމާއެކީ ، އެއީ ކޮން ވާހަކައެއްކަން ސާފުކުރުމަށްވެސް މުރުތަސިމް ބޭނުންވިއެވެ.
" މަރިޔަމްގާތު އަހަރެން ބުނީ ، ޙަޤީޤީ ލޯތްބަކީ އެހާ ފަސޭހައިން ހޯދޭނެ އެއްޗެއްނޫންކަމަށެވެ. އަޅައި ނުލާށެވެ ! އެއީ މުރުތަސިމްގެ ހިތަށް ވައްދަން އެހާ ފަސޭހަ ވާހަކައެއް ނޫނެވެ. ލޯތްބަކީ އެހާ ފަސޭހައިން ލިބެން އޮންނަ އެއްޗެއްނަމަ ، އެއީ ޙަޤީޤީ ލޯތްބަކަށް ނުހެދޭނެއެވެ. ޙަޤީޤީ ލޯތްބެއް ޙާޞިލް ކުރުމަށްޓަކައި ، ބުރަ މަސައްކަތާއެކީ ، ބޮޑެތި ޤުރްބާނީތަކެއް ވާން ޖެހޭނެއެވެ. ދިގު އިންތިޒާރެއް ކުރަންވެސް މަޖްބޫރު ވާނެއެވެ. ޙަޤީޤީ ލޯތްބަކީ އެއީއެވެ. " މީރަބް ބުންޏެވެ.
މީރަބް އެދައްކާ ވާހަކަޔަކުން މުރުތަސިމް ހުރީ އާޝޯޚުވެފައެވެ. އެއީ ، އެއްކަލަ ގޮތްދޫނުކުރާ މީރަބެވެ. އެ ގޮތްދޫނުކުރާ އަނގައިން ، ލޯބީގެ ޖަޒްބާތާގުޅޭ އެހާ އަސަރުގަދަ ވާހަކައެއް ނުކުމެދާނެކަމަކަށް މުރުތަސިމް ހިއެއް ނުކުރެއެވެ. މީރަބާ ގާތަށް މުރުތަސިމް ޖެހިލިއެވެ.
އެހެންކަމަށް ޥަންޏާ އެ ލޯތްބަކީ ލޯތްބެއް ނޫންކަމަށް މުރުތަސިމް ބުންޏެވެ. ދެން އެހެން ނޫނީ އެއީ ކޮންނަމެއްކިޔާ އިޙްސާސެއްތޯ މީރަބް ސުއާލު ކުރިއެވެ. އެއީ ރޫޙާނީ ޖަޒްބާތެއްކަމަށް މުރުތަސިމް ބުންޏެވެ. ލޯތްބަކީ ވަޤުތާއެކީ ނިމިގެންދާ އެއްޗެކެވެ. އެކަމަކު ، ރޫޙާނީ ޖަޒްބާތަކީ އަބަދަށް ދެމިހުންނަ އެއްޗެކެވެ. މުރުތަސިމްގެ ޖަވާބުން ޖަޒްބާތީ އިޙްސާސްތަކެއް މީރަބްގެ ހިތުގައި އެނބުރިގަތެވެ. މުރުތަސިމްގެ ލޮލަށް ބަލަހައްޓައިގެން އެތައް އިރަކު މީރަބަށް ހުރެވުނެވެ.
" ރޫހާނީ ޖަޒްބާތުން އުފެދިފައިވާ ލޯތްބެއް ،މީރަބްދެކެ މީހަކަށް ވެވިއްޖެނަމަ ، މީރަބް ހަދާނީ ކިހިނެއް ހެއްޔެވެ ؟ " މުރުތަސިމް ސުއާލު ކުރިއެވެ.
މީރަބް ، އޭނާގެ ބޯ ހޫރާލިއެވެ. އަދި ، އެއީ މުސްތަޙީލް ކަމެއްކަމަށް ބުންޏެވެ. އެކަހަލަ ލޯތްބަކީ މިޒަމާނުގައި ވަރަށް ތަދު އެއްޗެކެވެ. ޣާލިބްމެން ، ނޫރުޖަހާން ، އަދި ޝީރީނާއި ފަރުހާދުމެން ކަހަލަ ލޯބިވެރިން ، މިޒަމާނަކު އުފަންވުމެއް ނެތެވެ. މީރަބް އެބުނާ ގޮތަށްވެސް ވެދާނެއެވެ. އެކަމަކު ، ފަހަރެއްގައި ، އެފަދަ ލޯތްބެއް މީރަބްދެކެ މީހަކަށް ވެވިއްޖެނަމަ މީރަބް ހަދާނީ ކިހިނެއްތޯ ، އަނެއްކާވެސް މުރުތަސިމް ސުއާލު ކުރިއެވެ.
މުރުތަސިމް އެބުނި ވާހަކަޔަކާމެދު ، މީރަބް ކުޑަކޮށް ވިސްނައިލިއެވެ.
" އެހެންކަމަށް ވަންޏާ ، ހަނދުވަށައިގެން ތަރިތައް އެނބުރޭފަދައިން ، އުޑުގައި އަހަރެން ނަށަމުން އެނބުރޭނަމެވެ. މާސިންގާ ކަނޑުގެ އޮއިވަރު ، ރާޅުތަކުތެރެޔަށްވަދެ ދެމިގެންދާ ފަދައިން އެލޯބީގެ ތެރެޔަށް ވަދެގަންނާނަމެވެ. އަހަރެންގެ ހަށިގަނޑުގެ އެންމެ ހިމަ ނާރާ ހިސާބަށް އެ ލޯބީގެ ޖަޒްބާތު ދައުރު ކުރުވާނަމެވެ. ޝީރީނާއި ފަރުހާދުގެ ލޯބީގެ މިސާލަކަށް ވާނަމެވެ. އަހަރެންގެ ހިތާއި ނަފްސު ، އެލޯތްބަށްޓަކައި ފިދާކޮށް ޤުރްބާން ކުރާނަމެވެ. " މީރަބް ބުންޏެވެ.
މީރަބްގެ އެފޮނިފޮނި ލޯބި ބަސްތަކުން މުރުތަސިމްގެ ހިތުގެ ވިންދު އަވަސް ވިއެވެ. މުރުތަސިމް ބޭނުންވާ މީރަބް އެހުރީ އޭނާގެ ކުރިމަތީގައެވެ. ހަދާނީ ކިހިނެއް ހެއްޔެވެ ؟ މުރުތަސިމްގެ ހިތުގައި މީރަބްގެ މައްޗަށް އުފެދިފައިވާ ރޫޙާނީ ޢިޝްޤުން ފުރި އުތުރިއަރަމުންދާ ލޯބީގެ ޖަޒްބާތާއި ފޮނިފޮނި އިޙްސާސްތައް ، ވަޤުތުން ބަންޑުން ކޮށްލަންވީ ހެއްޔެވެ ؟ އެކަން ކުރުމަށް މުރުތަސިމް އިންތިޒާރު ކުރަމުން އައި ވަޤުތު އެ ޖެހުނީ ހެއްޔެވެ ؟
މިހާރު މާ ލަސްވެއްޖެކަމަށް ބުނެ ، މީރަބް ނިދަން ބޭނުން ވިއެވެ. އަދި ، މުރުތަސިމަށް ސޯފާގައި ތަންމަތި އަޅައިދިނުމަށްފަހު އެނދަށް އަރައި މީރަބް އޮށޯތެވެ. މީރަބްގެ ކޮންމެ ޙަރަކާތެއްވެސް މުރުތަސިމް ބަލަމުން ގެންދިޔައެވެ. އެރެޔަކީ ، އޭނާއަށް ވަރަށް ޚާއްޞަ ރެޔަކަށްވިއެވެ. މީރަބަށް ނިދުނީމަވެސް ، އެތައް އިރެއް ވަންދެން ، މީރަބްގެ މޫނަށް ބަލަހައްޓައިގެން މުރުތަސިމަށް އިނދެވުނެވެ. ނިދިއަންނަގޮތެއް ނުވިއެވެ.
ހެނދުނު ، ޙަޔާއަށް ސިޓިންގރޫމަށް ނުކުމެވުނުއިރު ، ޚާނަމްއަށް އޮތީ ނިދިފައެވެ. ވަގުތު ބަލާފައި ޚާނަމްގެ ފޯނުނަގައިގެން ޙަޔާ ދުއްވައިގަތެވެ. ކޮޓަރިޔަށްވަދެ ، ޙަޔާއާ ދެވަންއުޅޭ ރޮނޭޒްގެ މަންމަ ޞޯބިރާއާ ގުޅައި ، ޚާނަމްއަށް ހެދިގެން ވާހަކަ ދައްކަން ފެއްޓިއެވެ. ޙަޔާ ވާހަކަ ދެއްކީ ، ޞޯބިރާއަށް އެއީ ޙަޔާކަން ނޭނގޭވަރަށް ޙަޔާގެ އަޑު ބަދަލުކޮށް ، އަނގަޔާ ފޯނު ދުރުކޮށްލައިގެން ހުރެއެވެ. ޞޯބިރާގާތުން އެދުނީ ރޮނޭޒްގެ ފޯނުނަންބަރު ދިނުމަށެވެ. މުރުތަސިމް ރޮނޭޒާ ވާހަކަ ދައްކަން ބޭނުންވެގެންނެވެ. މުރުތަސިމްގެ އަތުގައި ރޮނޭޒްގެ ނަންބަރު އޮންނާނެކަން ޞޯބިރާއަށް އެނގެއެވެ. ޞޯބިރާއަށް ކޮންމެވެސް ވަރެއްގެ ޙައރާންކަމެއްވެސް ލިބުނެވެ. އެކަމަކު ، މުރުތަސިމްގެ ފޯނުން އެ ނަންބަރު ފުހެލެވިއްޖެކަމަށްބުނެ ، ރޮނޭޒްގެ ނަންބަރު ދިނުމަށް އަނެއްކާވެސް އެދުމުން ، ނަންބަރު ފޮނުވާނެ ވާހަކަ ޞޯބިރާ ބުނުމާއެކީ ، ވަކިވަނީއޭބުނެ ސަލާމް ފޮނުވަމުން ، ޙަޔާ ފޯނުކަނޑައިލިއެވެ. އަދި ޙަޔާގެ ފޯނަށް އެނަންބަރު ސޭވްކޮށް ، ޚާނަމްގެ ފޯނުން އެ ފޯންކޯލް ޑިލީޓް ކޮށްލިއެވެ. އަވަސް އަރުވައިލާފައި ގޮސް ، ޚާނަމްއަށް އެނގުމެއްނުވެ ، ފޯނުއޮތްތާނގައި ބޭއްވިއެވެ.
ނާސްތާކުރަން ޚާނަމް އައިސް ، ކާމޭޒަށް މީހުން ހަމަނުވާތީ އެތާއޮތް ނޫހެއް ނަގައިގެން ކިޔަން ފެއްޓިއެވެ. އަދި ، ނޫހުގައި އޮތް ޚަބަރެއް ކިޔާފައި އަމިއްލަޔަށް ވާހަކަ ދައްކަން ފެއްޓިއެވެ.
" މާތް ކަލާކޯއެވެ ! މިހާރު އައިސް މިއޮތީ ކޮންފަދަ ޒަމާނެއް ހެއްޔެވެ؟ އަންހެންކުދިން ، މީހުންނާ އިންނައިރު ، އެއީ އެމީހުންގެ ޢާއިލާގެ މީހެއްތޯވެސް ، މިހާރަކު ބަލައެއް ނުލައެވެ. ފިލަފިލައިގެން ފިރިހެންކުދިންނާއެކީ ގޮސް ، ކޯޓުގައި ކައިވެނިވެސް ކުރަނީއެވެ. ނަޞީބަކުން ، އަހަރެމެންގެ ޢާއިލާގެ އަންހެންކުދިން އެކަހަލަ ކަމެއް ނުކުރާނެއެވެ. ޙަޔާއަށްވެސް މި ހޯދައިދިނީ ޢާއިލީގޮތުން ގާތް ދުރުތާ ތިމާގެ ކުއްޖެކެވެ. "
ޚާނަމް އެއްލި ކަޅިޔަކުން ، މަރިޔަމްއާއި މީރަބާ ދެމީހުން އެކުގައި އައިސް ތަނަކަށް ދާންއުޅޭހެން ހީވެގެން ، އެމީހުން އެދަނީ ކޮންތާކަށްތޯ ޚާނަމް ސުއާލު ކުރިއެވެ. ޚާނަމްގެ ސުއާލުތަކުން އެގޭގެ އެއްވެސް މީހަކަށް ސަލާމަތެއް ނުވެވޭނެއެވެ. ޚާނަމްގެ ސުއާލަށް އެތަނުން ޖަވާބުދޭނީ ކާކު ހެއްޔެވެ ؟ މަރިޔަމް ހުރީ ކަންބޮޑުވެފައެވެ. މީރަބްވެސް ، އޭނާ ކުރަން އެއުޅޭކަމަކާމެދު ހާސްވެފައި ހުރިކަން ، މީރަބްގެ މޫނުމަތިން ހާމަވެއެވެ. އެކަމަކު ، ޚާނަމްގެ ސުއާލަށް ޖަވާބުދޭން ޖެހޭނީ އޭނާއަށްކަން މީރަބަށް އެނގުނެވެ. މަރިޔަމް ވާހަކަ ދައްކަން ވެއްޖިއްޔާ ބުނާނެ އެއްޗެއް މަރިޔަމްއަކަށް ނޭނގޭނެއެވެ. މީރަބް އެދަނީ ސެލޫނަށް ކަމަށް ބުނެ ، އޭނާއާއެކީ މަރިޔަމް ގެންދިއުމުގެ ހުއްދަޔަށް މީރަބް އެދުނެވެ. އެއީ ، ޚާނަމް މަންމަގެ ހުއްދަނެތި ކުރެވޭނެކަމެއް ނޫންކަން މީރަބަށް އެނގެއެވެ.
ދެންވެސް ކުރިމަތިވީ ޚާނަމްގެ ސުއާލެކެވެ. މަރިޔަމް ގެންދަނީ ކީއްކުރަންތޯ އަހާފައެވެ. މަރިޔަމް އެގެންދަނީ ، މަރިޔަމްގެ މޫނުމަތީގެ ހަން ކުރަކިވާތީ މަރިޔަމްވެސް ސެލޫނަށް ދާން ބޭނުންވެގެންނެވެ. އެދެމީހުން ދިއުމުގެ ހުއްދަ ދެމުން ، ޙަޔާވެސް ގޮވައިގެންދާން ޚާނަމް އެންގިއެވެ. އެކަމާ މީރަބް ދެކޮޅު ހެދިއެވެ. ޙަޔާއާއި މީރަބާ ދެމީހުންގެ މެދުގައި އޮތް ހިތްހަމަ ނުޖެހުމުގެ މަތިން މީރަބް ، ޚާނަމަށް ހަނދާން ކޮށްދީ ، އެންމެ ފަހުން އޭނާއަށް ޙަޔާދިން ލަނޑު އަދި ހަނދާން ނުނެތޭކަމަށް ، މީރަބް ބުންޏެވެ. އެކަމަކަށް ޚާނަމް އެއްޗެކޭ ނުބުނެއެވެ. ޚާނަމް ބޭނުންވީ އެދެމީހުންނާއެކީ ޙަޔާވެސް ބޭރަށް ފޮނުވާށެވެ.
ޚާނަމް ވަކި އެއްޗެކޭ ނުބުނުމުން ، އެމީހުން ދަންތޯ މީރަބް ސުއާލު ކުރިއެވެ. މީރަބަކީ މީހަކު ބުނާގޮތަކަށް ކަމެއްކުރާނެ މީހެއް ނޫނެވެ. އެއީ ބޭނުންގޮތަކަށް އުޅޭމީހެއްކަމަށް ބުނެ ، އެންމެފަހުން ، ތުންފިއްތައިގެން އިނދެ ، އެދެމީހުން ދިއުމުގެ ހުއްދަ ދިނެވެ. ވަގުތުބަލާފައި ، މުރުތަސިމަށް ނުފެންނަނިސް މީރަބާއި މަރިޔަމްއާ ދެފަހަރިން ، އަވަސް އަވަހަށް ނުކުތެވެ. (ނުނިމޭ)
