ކުރިޔަށް އޮތްތަނުގައި ދިވެހިބަހަކީ، ހަމައެކަނި އިލްމީ ދިރާސާތައް ކުރާ ބައެއްގެ ބަހަކަށް ވެދާނެކަމަށް، ބަސް ކޮމިޓީގެ ރައީސް، އޮނަރަބްލް ޙަމްދޫން ޙަމީދު ވިދާޅުވެއްޖެ.

ޕްރައިމަރީ އުމުރުގެ ކުދިން ދިވެހިބަހަށް އަހުލުވެރި ނުވާކަމަށް ވަންޏާ، ކުރިޔަށް އޮތްތަނުގައި ދިވެހިބަހަކީ، ހަމައެކަނި އިލްމީ ދިރާސާތައް ކުރާ ބައެއްގެ ބަހަކަށް ވެދާނެކަމަށް، ދިވެހިބަހުގެ އެކެޑަމީގެ ބަސް ކޮމިޓީގެ ރައީސް، އޮނަރަބްލް ޙަމްދޫން ޙަމީދު ވިދާޅުވެއްޖެ.

އޮނަރަބްލް ޙަމްދޫން ޙަމީދު މިހެން ވިދާޅުވީ، ދިވެހިބަހުން ފޮތް ލިޔުއްވުމާއި އުނގަންނައިދެއްވުމުގެ ދާއިރާގައި ގިނަ ޚިދުމަތްތަކެއް ކުރައްވަމުން ގެންދަވާ،  އަލްއުސްތާޒު ޙަސަން ޒަހީން، ގްރޭޑް 8،9،10ގެ ދަރިވަރުންނަށް ޚާއްސަކުރައްވައިގެން ޝާއިއުކުރެއްވި "އަޅުގަނޑުގެ ދޭހަ ފޮތް" 2 ނެރުމަށް، މިއަދު ހެނދުނު ގައުމީ ކުތުބުޚާނާގައި ބޭއްވި ހަފުލާގައި އެ ފޮތް ނެރުއްވައިދެއްވުމަށް ފަހު، ދެއްކެވި ވާހަކަފުޅުގައެވެ.

މި ހަފުލާގައި ވާހަކަފުޅުދައްކަވަމުން، އޮނަރަބްލް ޙަމްދޫން ވިދާޅުވި ގޮތުގައި، ހިތާމައަކީ، ސަރުކާރުގެ ބައެއް އޮފީސް އޮފީހުގައި ވެސް އަދި ވަކިން ޚާއްސަކޮށް އަމިއްލަ ފަރާތްތަކާއި ދިވެހި ވިޔަފާރީގެ ދާއިރާގައި  ވެސް މިހާރު ފުރަތަމަ މުއާމަލާތުގެ ބަހަކީ އިނގިރޭސިބަސްކަމަށްވާތީކަމަށާއި އެއް އިރެއްގައި އަޅުގަނޑުމެންނަށް، ސަރުކާރުގެ ދާއިރާގައި ހުރިހާ މުއާމަލާތެއް ދިވެހިބަހުން ކުރަން ލާޒިމުކަމަށާއި މިހާރު އެކަމަށް ދޫދެވި އިނގިރޭސިބަހުން ހުންނަ ސިޓީބިޓީ ވަރަށް ގިނަވެއްޖެކަމަށް ވިދާޅުވިއެވެ. އަދި ޚާއްސަ ގޮތެއްގައި މިހާރު މައުލޫމާތު ރައްކާކުރެވެނީ، ޚާއްސަކޮށް ފަންނީ މައުލޫމާތު ރައްކާކުރެވެނީ އިނގިރޭސިބަހުން ކަމަށް ވާކަމަށް ވެސް ވިދާޅުވިއެވެ.

އަދި ޚަބަރުފަތުރާ ވަސީލަތްތަކުގައި، ޓިވީގައި ވެސް ނޫސްތަކުގައި ވެސް މިހާރު މައުލޫމާތު ރައްކާކުރެވެމުންދަނީ ދިވެހިބަހުގެ ރަނގަޅުހަމަތަކާ ގުޅިގެންދާ ބަހުރުވައަކުންނޫން ކަމަށާއި ޒަމާންތަކެއް ފަހުން ދިރާސާކުރާ ދިވެހި ކުއްޖަކު ދިވެހިފޮތްތަކެއް ނުވަތަ ލިޔުންތަކެއް ބަލާއިރު ފަތްތޫރަ ފެންވަރުގެ އަދަބީ ފެންވަރެއްގައި ލިޔުންތައް ހުންނާނެކަމަށް ނުދެންނެވޭނެކަމަށް ވެސް ޙަމްދޫން ވިދާޅުވިއެވެ.

ޒަހީންގެ މި ފޮތުގެ މުހިންމު ކަމާ ބެހޭ ގޮތުން ވާހަކަފުޅުދައްކަވަމުން، ޙަމްދޫން ވިދާޅުވީ، މި ފަދަ ފޮތްތައް ކާމިޔާބުވެއްޖެކަމަށް ވާ ނަމަ، އަންނަން އޮތް ޖީލަށް ވެސް ވަރަށް ހެޔޮ އަސަރެއް ކުރާނެކަމަށާއި ދިވެހިބަސް ދެމެހެއްޓުމުގެ ވަރަށް ބޮޑު ޚިދުމަތެއް މި ފަދަ ފޮތްތަކުން ކޮށްދެވޭނެކަމަށެވެ. އަދި މަސައްކަތަށް ފަސޭހަވާ ކަހަލަ ދިވެހިބަހަށް ޝައުޤުވެރިކުރުވާ ދިވެހިބަހުގެ ހުނަރު ރަނގަޅުކުރެވޭ ކަހަލަ އެހީތަކެއް ދެވިއްޖެކަމަށް ވާނަމަ، އެ ޖީލުގެ މަސައްކަތް ދެން އަންނަ ޖީލަކަށް ހެޔޮ ގޮތުގައި ފޯރުކޮށް ދެވޭނެކަމަށްވެސް ވިދާޅުވިއެވެ.

 އުސްތާޒު ޙަސަން ޒަހީން ވަނީ މީގެ ކުރީން ވެސް ދަރިވަރުންނަށް ޚާއްސަކުރައްވައިގެން ދޭހަ ފޮތެއް ނެރުއްވައިފައެވެ.