(23 އޯގަސްޓް 2025 ގައި ޝާއިއުކުރި ބަޔާ ގުޅޭ)
މުސްލިމުންގެ ޢިލްމުވެރިޔާ ހިނިފުޅު ވަޑުވައިލައްވައިފައި ޖަވާބު ދެއްވިއެވެ. "ކަލޭ ޗަކަރުސުވާމީގެ ބުދަކީ މާތްރަސްކަލާނގެ ކިބަފުޅަށް ވާ ޝަރީކަކު ކަމުގައި ބަލަނީހެއްޔެވެ؟ ނިކަން ދެކޭން ހުންނާށެވެ! ދުވަސްކޮޅެއްގެ ތެރޭގައި ކަލެޔަށް ޙަޤީޤަތް އޮޅުން ފިލައިފާނެއެވެ. އެ ބުދަކީ ހަމައެކަނި ހިލަގަނޑެއްކަން އެނގިދާނެއެވެ."
ދުވަސްކޮޅެއްގެ ފަހުން މުސްލިމުން ތާނީރު ފަތަޙަ ކުރި ޚަބަރު ލިބިއްޖެއެވެ. ނަމަވެސް ޤައިދީން އެ ވާހަކަ ޤަބޫލެއް ނުކުރިއެވެ. މާކަ ގިނަ ދުވަސްތަކެއް ނުވެ ތާނީރުގެ ރަސްގެފާނުގެ ތިމާގެފުޅު ބޭފުޅުން ޤައިދީންގެ ގޮތުގައި އެ ކިއްލާއަށް ގެނެސްފިއެވެ. މުސްލިމުން ޗަކަރުސުވާމީގެ ބުދު ހުރި ތަނުން ނަގައިގެން ޣަޒްނީގެ މީހުންނަށް ދައްކާން ބާޒާރުމަތީ ބަހައްޓާން އެ ބުދު ގެންދިޔަ ޚަބަރު އެ ބޭފުޅުން ދެއްވުމުން، ޤައިދީންގެ ވަރަށް ގިނަ މީހުން ޝަހާދަތް ކިޔައި އިސްލާމް ވެއްޖެއެވެ. ނަމަވެސް ރަންބީރު ހިމެނިވަޑައިގެންނެވީ ދޭވަތާއިންގެ ކަރާމާތާ މެދު ޝައްކު ކުރެއްވުމުގެ ބަދަލުގައި ދޭވަތާއިންނަށް އަޅުކަން ކުރާ މީހުންނަށް ފިނޑިކަމާއި ޣީރަތެއް ނެތްކަމުގެ މައްޗަށް މަލާމާތް ކުރައްވާ ބޭފުޅެއް ކަމުގައެވެ.
ދުވަސްތައް ފާއިތު ވަމުން އައިސް، މިހާރު سلطان محمود غزنوی ގެ ލަޝްކަރު ގަންގާ ކޯރާއި ޖަމްނާ ކޯރުގެ ވާދީތަކުގައި އަސް ދުއްވަނީއެވެ. ކޮންމެ ދުވަހަކު ވެސް سلطان محمود ގެ އާ ފަތަޙައެއްގެ ޚަބަރު ރަންބީރަށް ލިބިވަޑައިގަންނަވަމުންދެއެވެ. ދޭވަތާއިންގެ އެ މުޤައްދަސް ބިމުގެ ފާރަވެރީންގެ ހިންމަތާއި ޣީރަތު، محمود ގެ ފުތޫޙާތުގެ ސައިލު ދެމެމުންދާ މިޞްރާބު ބަދަލު ކޮށްލާނެކަމަށް ރަންބީރުގެ ހިތްޕުޅުގައި އޮތް ޔަޤީންކަމަށް ގުޑުން އަރަމުންދެއެވެ. އޭނާ ހީފުޅު ކުރެއްވީ ސަރުސިވާގެ ރާޖާ އެންމެ ފަހު ނޭވާފުޅާ ހަމަޔަށް ހަނގުރާމަ ކުރައްވާނެކަމަށެވެ. ނަމަވެސް އޭނާ މައިދާން ދޫ ކޮށްލައްވައިފައި ފިލައިވަޑައިގެންފިއެވެ. ބާރަންގެ[1] ރަސްގެފާނު ހަރެދަތު ދޭވަތާއިންގެ ނަން މަތިވެރި ކުރައްވާނެކަމަށް ރަންބީރު އުއްމީދު އުއްމީދު ކުރެއްވިއެވެ. ނަމަވެސް އޭނާ އޭނާގެ އެއްލައްކަ އެކުވެރީންނާ އެކު އިސްލާމް ވެވަޑައިގެންފިއެވެ.
ދުވަސްކޮޅެއްގެ ފަހުން މަހާބަންގެ ރަސްގެފާނު ކަލްޗަންދު محمود غزنوی އާ ހަނގުރާމަޔަށް ވަޑައިގަތުމުން ރަންބީރު އޭނާގެ އުއްމީދުތައް ކަލްޗަންދާ ގުޅުއްވައިލެއްވިއެވެ. އެކަމަކު މާ ގިނަ ދުވަސްތަކެއް ނުވެ ޚަބަރު ލިބިވަޑައިގަތީ މުސްލިމުން ހުރިހައި ފަރާތަކުން އޭނާ ވަށައިލުމުން އަމިއްލަފުޅަށް އަވަހާރަ ވި ޚަބަރެވެ.
سلطان محمود غزنوی މަހާބަން ފަތަޙަ ކުރެއްވުމަށް ފަހު ދަތުރުފުޅު ކުރެއްވީ މުތުރާއާ ދިމާޔަށެވެ. މާ ގިނަ ދުވަސްތަކެއް ނުވަނީސް ރަންބީރަށް އިވިވަޑައިގެންނެވީ މުތުރާގެ އަޅުކަން ކުރާ މީހުން އެބައިމީހުންގެ ނިދައިފައި ތިބި ދޭވަތާތައް ހެއިލައްވާން ނާކާމިޔާބު މަސައްކަތްތަކެއް ކުރުމަށް ފަހު ހަތިޔާރު ބެހެއްޓި ޚަބަރެވެ. އެތާނގެ އެކިއެކި ފައްޅިތަކުން އެތަކެއް ޤަރުނު ވާންދެން އެ ތަކެތީގެ ތަޤުދީސަށް އަތުލަމުން އައި ރަނުގެ ފަސްސަތޭކަ ބުދާއި، ރިހީގެ ދުއިސައްތަ ބުދު، އެ ތަކެތީގެ ބަރުދަނުގައި ހިމެނޭ ރަންރިހީގެ އަގު ފިޔަވައި އެހެން ކަމެއް ވަޒަން ނުކުރާ ބަޔަކަށް (މުސްލިމުން) މިލްކު ވީ ޚަބަރެވެ.
محمود އާ އޭގެފަހުން ކުރިމަތި ލީ ރަންބީރުގެ އަރިހުގައި އެ ބިމެއްގެ ކޮންމެ ވެލިފުކެއް އޭނާގެ ފުރާނަފުޅަށް ވުރެ ވެސް އަގު ބޮޑު ބިމެވެ. މީގެ ހަތަރު އަހަރު ކުރީން އޭނާ އޭނާގެ އެކުވެރީން ގާތު ވިދާޅުވަމުން ގެންދެވީ ދުޝްމިނެއްގެ ހައިސިއްޔަތުން ގުނޫޖަށް ހިނގައްޖެ މީހަކަށް އެނބުރި ނާދެވޭނެކަމުގައެވެ. ގުނޫޖުގެ ރާޖުޕޫތުން ޕަންޖާބުގެ ރާޖުޕޫތުންނާ ތަފާތު ވާނެކަމުގައެވެ. އެ ބޭފުޅުން ދުޝްމަނުންގެ މަގު ބަންދު ކުރެއްވުމަށް ޓަކައި ފުރާނަފުޅު ނެތް ހަށިކޮޅުތަކުން ފާރު ލައްވާނެކަމަށެވެ. އެ ބޭފުޅުން އެ ބޭފުޅުންގެ ދޭވަތާއިން ދޫ ކޮށްލައްވައިފައި ފިލައިވަޑައިނުގަންނަވާނެކަމުގައެވެ. އަދި ކީއްތޯއެވެ! ދޭވަތާއިންގެ ފައިތިލަމައްޗަށް ފުރާނަފުޅު ޤުރުބާން ކޮށްލައްވާނެކަމުގައެވެ. ނަމަވެސް މިހާރު އޭނާގެ އިޙުސާސްތައް ވަރަށް ތަފާތެވެ. ވޭތު ވެދިޔަ ހަތަރު އަހަރުގެ ތެރޭގައި ހިނގައިދިޔަ ހާދިސާތަކުގެ ސަބަބުން އޭނާއަށް މިހާރު ގުނޫޖާ މެދު ޚިޔާލުފުޅު ކޮށްލެއްވެނީ އިންތިހާ ދަރަޖައިގެ މާޔޫސްކަމާ އެކުގައެވެ. އޭނާ ހެނދުނާއި ހަވީރު ދުޢާފުޅު ކުރައްވަމުންގެންދަވައެވެ. "އޭ އަޅުގެ ވަޠަނުގެ މުޤައްދަސް ކަލާނގެތަކާއެވެ! އަޅުގެ ޤައުމަށް ނަޞުރު ދެއްވާނދޭވެ!"
ގުނޫޖު ފަތަޙަ ވެ އެތާނގެ ރަސްގެފާނު މައިދާން ދޫ ކޮށްލައްވައިފައި ފިލައިވަޑައިގެން ބާރީއާ ދިމާޔަށް ދަތުރު ކުރެއްވި ޚަބަރު ލިބިވަޑައިގަތުމުން ރަންބީރުގެ ކުރިފުޅުމަތީގައި ދުނިޔެ އަނދިރި ވެއްޖެއެވެ. ކިއްލާގައި ތިބި މުސްލިމުން އެއް ދުވަހެއްގެ ހަވީރު ގުނޫޖު ފަތަޙަ ވުމުގެ އުފަލުގައި އަޑުގެ ކޮޅަށް اللّه أكبرގެ ނަޢުރާ ކުރަމުން ގެންދިޔަ އިރު، އޭނާ އިންނެވީ އެއް ފަރާތެއްގެ ކަނެއްގައި އިށީނދެވަޑައިގެންނެވެ. ގިސްފުޅު ލައްވައިފައި ކީރިތި ކުރައްވާށެވެ. ކުޑަ ކުއްޖަކު ކުޅޭ އެއްޗެއް ހަލާކު ވުމުން ރޯނެ ގޮތަށެވެ.
އާސީގެ ރަސްގެފާނު ޗަންދަރުޕާލާއި، ރާޖާ ޗަންދަރު ރާއޭ ބަލިފުޅު ވި ޚަބަރު އޭނާ ވިދިވިދިގެން އަޑު އެއްސެވިއެވެ. ނަމަވެސް މިހާރު އޭނާގެ ހިތްޕުޅުގައި އެ ޚަބަރުތަކާ މެދު އެއްވެސް ޝައުޤެއް ނެތެވެ. ގުނޫޖުގެ ލަޝްކަރު ބަލި ވުމަށް ފަހު އެއްވެސް ބައެއްގެ ބަލިވުމާއި ގަދަވުމަކީ އޭނާގެ އަރިހުގައި މާނައެއް ހުރި ކަމެއް ނޫނެވެ. މިހާރު އޭނާގެ ހުރިހައި ވެސް ޝައުޤުވެރިކަމެއް ހުއްޓިފައި ވަނީ އޭނާގެ މުސްކުޅި ބައްޕާފުޅާއި ޒުވާން ކޮއްކޯފުޅުގެ ހަނދުމަފުޅުތަކުގެ މައްޗަށެވެ. "އެ ބޭފުޅުން ވީ ކޮން ތަނަކު ބާވައެވެ؟ ކޮން ޙާލުކޮޅެއްގައި ބާވައެވެ؟ މުސްލިމުން ގުނޫޖް ފަތަޙަ ކުރުމުން އެ ބޭފުޅުންނަށް ވީ ކިހިނަކުން ބާވައެވެ؟" އޭނާ ބޭނުންފުޅު ވަނީ ހަމައެކަނި މި ސުވާލުތަކުގެ ޖަވާބު ހޯއްދަވާށެވެ.
+ + +
ދުރުންނާއި ކައިރީން ހިންދީންގެ ބައެއް މީހުންނާއި އައު މުސްލިމުން ޤައިދީންގެ ޙާލު ބަލާން ކިއްލާއަށް އާދެއެވެ. ޤައިދީންނަށް އެބައިމީހުން މެދުވެރި ކޮށް ގާތްތިމާގެ މީހުންނަށް ސިޓީ އާއި ޚަބަރު ފޮނުވުމުގެ ހުއްދަ އޮވެއެވެ. ވަރަށް ގިނަ ޤައިދީންގެ ގާތްތިމާގެ މީހުން މި ގޮތުން އެބައިމީހުންގެ ޚަބަރު ލިބިގެން އައިސް ފިދުޔަ ދީފައި ސަލާމަތް ކޮށްގެން ގެންދެއެވެ. ރަންބީރުގެ އެކުވެރީންގެ ފަސް މީހެއްގެ ގާތްތިމާގެ މީހުން ވެސް ހަ މަސްދުވަހުގެ ކުރީން ވަނީ ފިދުޔަ ދީގެން އެބައިމީހުން ސަލާމަތް ކޮށްފައެވެ. ތިން މީހުން އިސްލާމް ވުމުގެ ސަބަބުން މިނިވަން ވެއްޖެއެވެ. ފިދުޔަ ދޭނެ މީހަކު ނެތުމުގެ ސަބަބުން ހަތަރު މީހަކު ވަނީ މިނިވަން ވެފައެވެ.
ފިދުޔަ ދެއްވުމަކީ ރަންބީރަށް ކުޑައިކޮށް ވެސް ދަތިފުޅު ކަމެއް ނޫނެވެ. ނަމަވެސް އޭނާ ދެކެވަޑައިގަންނަވާ ގޮތުގައި ނާކާމިޔާބު ވެފައި ވާ ސިފައިންގެ މީހެއްގެ ޙައިޘިއްޔަތުން އެނބުރި ގެއަށް ވަޑައިގަތުމަކީ ރާޖްޕޫތެއްގެ ޤަދަރާ އެކަށީގެން ވާ ކަމެއް ނޫނެވެ. އެހެންކަމުން އޭނާ ތަރުޖީޙު ދެއްވީ ޖަލުގައި އޮންނަވާށެވެ. ކޮންމެވެސް ދުވަހަކުން އޭނާގެ ވަޠަނުގެ ސިފައިން ދުޝްމަނުން ފަހަމުން އެ ހިސާބަށް އަންނާނޭކަމުގެ އުއްމީދުގައެވެ. ޖަލުން ސަލާމަތް ވެގެން ރަށަށް ދިޔަ ސިފައިންގެ މީހެއްގެ ޙަވާލުގައި ރަންބީރު އޭނާގެ ބައްޕާފުޅަށް ޚަބަރު ފޮނުއްވިއެވެ. "އަޅުގަނޑުގެ ފިދުޔަ ދެއްވުމަށް ވުރެ ރަނގަޅު ވާނީ ބައްޕާފުޅުގެ ޚަރަދުގައި ގުނޫޖުގެ ލަޝްކަރަށް ސިފައިންގެ ބަޔަކު އިތުރު ކުރެއްވުމެވެ."
ނަމަވެސް އެ ބޭފުޅުންގެ ރާޖާ ފިލައިވަޑައިގަތް ޚަބަރު ލިބިވަޑައިގަތުމުން ރަންބީރުގެ ދުނިޔެ ބަދަލު ވެއްޖެއެވެ. އޭނާ ފަރުބަދައެއް ކަމުގައި ހީފުޅު ކުރައްވައިގެން ހުންނެވީ ކުނިފުންޏަކާ މެދުގައިކަން މިހާރު އޭނާއަށް ޤަބޫލު ކުރެއްވޭން ފަށައިފިއެވެ. ތަންކޮޅެއް ކުރީން އޭނާގެ ހިތްޕުޅަށް އަރައެވެ. "އަހަރެން ފޮނުވި ޚަބަރު ލިބިވަޑައިގަތުމުން ބައްޕާފުޅު ވަރަށް އުފާފުޅު ކުރައްވާނެކަން ކަށަވަރެވެ. ބައްޕާފުޅު ހަމަ އެ ވަގުތު ރަސްގެފާނުގެ އަރިހަށް ވަޑައިގެން ވިދާޅުވާނެއެވެ. 'މާތް ސާހިބާއެވެ! އަޅުގަނޑުގެ ދަރިފުޅުގެ އެދުމުގެ މަތީން މަނިކުފާނުގެ ލަޝްކަރަށް މިތައް އެތާއި، މިތައް އަހާއި، މިތައް ކަނޑި ވެދުން ކުރަމެވެ. އޭނާ ފިދުޔަ ދީފައި ސަލާމަތް ވެގެން ގެޔަށް އައުމުގެ ބަދަލުގައި އެދެނީ ނަންދުނާގެ ކިއްލާގެ ދޮރުމަތީން މަނިކުފާނާ އިސްތިޤްބާލު ކުރާށެވެ." ނަމަވެސް މިހާރު ރަންބީރުގެ ހިތްޕުޅަށް އަރައެވެ. "މިހާރު އަހަރެންނެކޭ އެއްގޮތަށް އަހަރެންގެ ބައްޕާފުޅުގެ ދުނިޔެ ވެސް އޮންނާނީ ބަދަލު ވެފައި ކަމުގައި ވެދާނެއެވެ. ބައްޕާފުޅު ވިދާޅުވާނެކަން ނޭނގެއެވެ. 'ގުނޫޖަކާ ނުވަތަ އެތާނގެ ވެރިންނަކާ އަހަންނަކާ ކީކީހެއްޔެވެ؟ ދޭވަތާއިންގެ ބުދުތަކުގެ މަޤާމަކީ އެ ތަކެތީގެ ފައްޅިތައް ކަމުގައި ވިޔަސް ނުވަތަ ޣަޒްނީގެ ހަތަރުއަނގޮޅިތައް ކަމުގައި ވިޔަސް އަހަރެން އެކަމަކާ ފަރުވާލެއް ނެތެވެ. އަހަރެން ބޭނުމީ ހަމައެކަނި އަހަރެންގެ ދަރިފުޅެވެ."
ދޭވަތާއިންގެ ކީރިތިމޫރިތިކަމާއި، އެ ތަކެތީގެ ބާރާއި ކުޅަދާނަކަމާ މެދު ރަންބީރުގެ ހިތްޕުޅުގައި ބައެއް ފަހަރު ޝައްކު އުފެދޭން ފަށައިފިއެވެ. ނަމަވެސް އެއިން ކޮންމެ ފަހަރަކު ރަންބީރުގެ ޒަމީރު އޭނާއަށް ދަންނަވައެވެ. "ނޫނެކެވެ! ރަންބީރެވެ! މަނިކުފާނު ދޭވަތާއިންނާ މެދު ތިޔަ ކަހަލަ ޚިޔާލުފުޅު ކުރައްވާކަށެއް ނުވާނެއެވެ. އެކަލާނގެތައް އަޅުތަކުން އިމްތިޙާނު ކުރައްވަނީއެވެ. އެކަލާނގެ ޣާފިލުކަމުގެ އަވަހާރަފުޅުން ހެއިފުޅު ލައްވާނެކަން ކަށަވަރެވެ. އެކަލާނގެ ދީނަށް ނަޞުރު ދެއްވާނެކަން ޔަޤީނެވެ. سلطان محمود ހަމައެކަނި ހިންދުސްތާނުގެ ރަސްރަސްކަލުންނާ ހަނގުރާމަ ކުރައްވައި ބަލި ކުރައްވަނީކީއެއް ނޫނެވެ. ބިންމަތީގައި އެކަލާނގެ އަމުރުފުޅުތައް ހިންގަވާ ދޭވަތާއިންތަކަށް ވެސް ގޮން ޖައްސަވަނީއެވެ. އެކަލާނގެ ދޭވަތާއިންގެ ބުދުތަކަށް ފުރައްސާރަ ކުރާ ބަޔަކު އެކަލާނގެ ބިމުގައި ހިތުހުރި ގޮތަކަށް އުޅުމަކީ އެކަލާނގެ ރުހިވޮޑިގެން ވާ ކަމަކަށެއް ނުވާނޭކަން ކަށަވަރެވެ. އެކަލާނގެ ދޭވަތާއިންގެ ބުދުތަކަށް އިހާނެތިކޮށް ހިތާ އަތްތައް ބުރި ކުރާނެ ބާރެއް މި ބިމުން ފައުޅު ކުރައްވާނެކަން ޔަޤީނެވެ. މަނިކުފާނު އެ ދުވަހަކަށް އިންތިޒާރު ކުރައްވާށެވެ." މި ކަހަލަ ޚިޔާލުފުޅުތަކުން ރަންބީރުގެ ހިތްޕުޅަށް ހިސާބެއްގެ ހަމަޖެހުމެއް ލިބިވަޑައިގަނެއެވެ. އޭނާ އިންތިހާ ދަރަޖައިގެ މަޑުމޮޅިކަމާއި ތަވާޟުޢުވެރިކަމާ އެކު ދުޢާ ކުރައްވައެވެ. "އަޅުގެ ވެރި ކަލާކޯއެވެ! އެކަލާނގެ ދޭވަތާއިންނޭވެ! އިންތިހާ ދަރަޖައިގެ މުޞީބާތުގައި ވެސް އިބަސުވާމީންގެ ދީންމަތީގައި ޤާއިމު ވެހުރުމުގެ ތައުފީޤު މި އަޅާއަށް ދެއްވާނދޭވެއެވެ! މި އަޅާގެ ގުޑަމުންދާ އީމާނާއި ޔަޤީންކަން ހަރުދަނާ ކުރައްވާނދޭވެއެވެ!"
ނަމަވެސް މިފަދަ ދުޢާތަކުން ވެސް ރަންބީރުގެ ހިތްޕުޅަށް ހަމަޖެހުމެއް ލިބިވަޑައިގަންނަވަނީ ދާދި ކުޑަ ހިނދުކޮޅަކަށެވެ. ގަންގާ ކޯރާއި ޖަމްނާ ކޯރާ ދެމެދުގެ މައިދާންތަކުގައި سلطان محمود غزنوی ފުތޫޙާތުތައް ހޯއްދަވާން ފެއްޓެވުމަށް ފަހު ރަންބީރެކޭ ޠޫފާނެއްގެ ގަދަ ވައިގެ ތެރޭގައި ހުރެ ބައްތިއެއް ދިއްލާން އުޅޭ މީހެކޭ އެއްވެސް ތަފާތެއް ނެތެވެ. ހަތަރު އަހަރު ވާންދެން ނިހާޔަތުގެ ހަރުދަނާކަމާއި ކެތްތެރިކަން ދެއްކި ޤައިދީން، އެ ފުތޫޙާތުތަކަށް ފަހު ދޭވަތާއިންނާ މެދު އުއްމީދު ކަނޑައިލައިފިއެވެ. މުތުރާ ފަތަޙަ ވި ޚަބަރު ލިބުމުން ޤައިދީންގެ އެތައް ބަޔަކު ޝަހާދަތް ކިޔައިފިއެވެ. ދެން ތިބި މީހުން ވެސް އިސްލާމް ދީން ތަބްލީޣު ކުރާ މީހުންގެ ވާހަކަތައް ކުރިޔަށް ވުރެ ބޮޑަށް ކަނުލައި އަޑު އަހާން ފަށައިފިއެވެ.
ދިމާ ވެފައި ވާ ނިކަމެތި ޙާލުކޮޅާއި މުސްތަޤުބަލާ މެދު އުއްމީދު ގެއްލިވަޑައިގަންނަވަމުން ދާން ފެށުމުން، ރަންބީރުގެ ޞިއްޙަތަށް މަޑުމަޑުން އަސަރު ފޯރާން ފަށައިފިއެވެ. މާ ގިނަ ދުވަހެއް ނުވެ އޭނާ މޫސުމީ ހުންފުޅެއްގައި ހައްޔަރު ވެވަޑައިގެންފިއެވެ. އޭނާއަށް އެތައް ދުވަހެއް ވާންދެން ތެދު ވެވަޑައިނުގެންނެވި އޮންނަވާން ވެސް ޖެހިވަޑައިގެންނެވިއެވެ.
+ + +
އެއް ދުވަހަކު ރަންބީރު އޮންނެވީ ހުންފުޅާ އޭނާގެ އެނދުދާންކޮޅުގައެވެ. ރަންބީރު ބޭސް ހިއްޕެވުން ހުއްޓައިލެއްވުމުން ކިއްލާގެ ބޭސްވެރިޔާ ރަންބީރުގެ އެނދުގެ ވަށައިގެން އެއް ވެފައި ތިބި ޤައިދީންގެ ގާތުގައި ވިދާޅުވަމުން ގެންދެވިއެވެ. "ތިޔަބައިމީހުން މި ޒުވާނާއަށް ނަސޭހަތްޕުޅު އަރުވާށެވެ. އޭނާ އިއްޔޭއްސުރެ އަހަރެން އަރުވާ އެއްވެސް ބޭހެއް ނުހިއްޕަވައެވެ. ފާރަވެރީން އަހަރެންގެ ގާތު ބުނި ގޮތުގައި އޭނާ އިއްޔޭއްސުރެ ފަރީއްކޮޅުގައި ވެސް އަތްޕުޅެއް ނުލައްވައެވެ. މިއަދު ކިއްލާގެ ކޮމާންޑަރު މީނާގެ ޙާލުކޮޅު ބައްލަވާން ވަޑައިގަންނަވާނެއެވެ. އަހަރެން މީނާގެ ފުރާނަފުޅު ސަލާމަތް ކުރުމަށް ޓަކައި އަހަންނަށް ކުރެވޭން ހުރި ހުރިހައި ކަމެއް ކުރިކަމަށް ތިޔަބައިމީހުން ހެކި ދޭށެވެ."
ޤައިދީންގެ މީހަކު ކުރިޔަށް ޖެހި ބޭސްވެރިޔާގެ އަތްޕުޅުން ބޭސް ތަށިކޮޅު އަތުލައިފައި ބުންޏެވެ. "ކަލާ ކަންބޮޑު ވެވަޑައިނުގަންނަވާށެވެ! އަޅުގަނޑުމެން އޭނާއަށް ވިސްނައިދީފާނޫއެވެ." އޭނާ އެހެން ބުނެފައި ރަންބީރާ މުޚާޠަބު ކޮށް ދެންނެވިއެވެ. "ނިކަން މި ބޭސްތަށިކޮޅު ހިއްޕަވައިބައްލަވާށެވެ! މާތް ސާހިބާއެވެ! މި ބޭސްކޮޅު ހިއްޕެވުމުން ފައިދާ ކުރާނީ މަނިކުފާނަށެވެ."
ރަންބީރު ހަޅޭއްފުޅު ލައްވައިގެންނެވިއެވެ. "ކަލާކޮށްޓަކައި ބުނަމެވެ. އަހަންނަށް އުނދަގޫ ނުކުރާށެވެ! އަހަރެން އެއްވެސް މީހެއްގެ ހަމްދަރުދީއެއް ބޭނުމެއް ނޫނެވެ."
ޤައިދީންގެ އެހެން މީހަކު އޭނާގެ އަތްޕުޅުގައި ހިފައިފައި ނަގާން މަސައްކަތް ކުރަމުން ބުންޏެވެ. "ރަންބީރެވެ! އަޅުގަނޑުމެންނަކީ މަނިކުފާނުގެ ދުޝްމަނުންނެއް ނޫނީމުއެވެ. ބަލި ވެއުޅޭ އިރު އިންސާނުންނަށް ތިމާއަށް ފައިދާހުރި ގޮތާއި ގެއްލުންހުރި ގޮތްތަކެއް ވިސްނައެއްނުގަނެވޭނެއެވެ. ތެދު ވެވަޑައިގަންނަވާށެވެ! ބޭސްކޮޅު ހިއްޕެވުމާ ދެކޮޅު ނުހައްދަވާށެވެ!"
ރަންބީރު ކޯފާ ވެގެން އޭނާގެ އަތް ފޮޅުވައިލައްވައިފިއެވެ. ކުރިޔަށް ވުރެ ވެސް މާ ބާރަށް ހަޅޭއްފުޅު ލައްވައިގެންފައި ވިދާޅުވިއެވެ. "އަހަރެން މިތާކު އެއްވެސް މީހެއްގެ ރަޙުމަތްތެރިކަމަކަށް ބޭނުމެއް ނޫނެވެ. އަހަރެން މަރު ވިޔަދޭށެވެ! މަރަކީ އަހަންނަށް މި ކަހަލަ ދިރިއުޅުމަކަށް ވުރެ އުނދަގޫ ލިބޭ ކަމަކަށް ނުވާނެއެވެ."
ކުއްލިޔަކަށް ކޮޓަރީގެ ދޮރާ ދިމާއިން ކޮންމެވެސް މީހެއްގެ އަޑު އިވިއްޖެއެވެ. "ތިޔައީ ސިފައިންގެ މީހުން ދައްކާ ކަހަލަ ވާހަކައެއް ނޫނެވެ." ރަންބީރުގެ ވަށައިގެން ބަލަހައްޓައިގެން ތިބި މީހުން ކުއްލިޔަކަށް ފަހަތަށް އެނބުރި ބަލައިލި އިރު، އެއީ އިސްކޮޅުން ދިގު، ރީތި، ހައިބަތުހުރި މީހެކެވެ. އޭނާ ހުރީ ކިއްލާގެ ކޮމާންޑަރުގެ އަރިހުގައި ދޮރުމަތީގައެވެ. ޤައިދީން އެއްފަރާތަކަށް ޖެހިލައިފިއެވެ. ބޭރުން އައި މީހާ ރަންބީރު އޮންނެވި އެނދު ކައިރިއަށް އައިސް ބުނެފިއެވެ. "ސިފައިންގެ މީހުން މަރުގެ އުނގަށް ވެސް ގޮސް ވަންނަނީ ހިނިތުން ވެތިބެއެވެ. އެބައިމީހުން ގޮތް ހުސް ވެގެން މަރުގެ ކުރިމަތީގައި ހަތިޔާރެއް ނުބަހައްޓާނެއެވެ."
(ނުނިމޭ)
