ދިވެހިރާއްޖޭގެ ކެންސަރު ފަރުވާގެ ޚިދުމަތްތައް ހަރުދަނާކުރުމަށް އަމާޒުކޮށްގެން ހިންގުނު ޕްރޮފެޝަނަލް ތަމްރީނު ޕްރޮގްރާމެއްކަމަށްވާ އޮންކޮލޮޖީ ނަރުހުންގެ އެކްސެލެންސް ޕްރޮގްރާމް 40 އަށްވުރެ ގިނަ ނަރުހުން ފުހިހަމަކޮށްފިއެވެ.
ނަރސަސް އޮންކޮލޮޖީ އެކްސެލެންސް ޕްރޮގްރާމްގައި ކީމޯތެރަޕީގެ އަސާސްތައް، ބަލީގެ އަލާމާތްތައް ބެލެހެއްޓުން، ފަރުވާގެ އެންމެ ފަހުގެ މަރުހަލާގައި ދެވޭ އަޅާލުން، އަދި އޮންކޮލޮޖީގައި ނަފްސާނީ އަދި އިޖްތިމާޢީ އެހީތެރިކަން ފޯރުކޮށްދިނުން ހިމެނޭގޮތަށް ހަތަރު އިންޓެންސިވް މޮޑިއުލް ހިމެނެއެވެ.
އަދި މި ޕްރޮގްރާމް ކުރިއަށްގެންގޮސްފައިވަނީ ރާއްޖޭގެ އޮންކޮލޮޖީ ޑޮކްޓަރުންނާއި، ނަރުހުންގެ ތަޖުރިބާއާއި ރާއްޖޭގެ ޙާލަތަށް ފެތޭގޮތަށެވެ.
މިޕްރޮގްރާމްގެ ނިންމުމުގެ ރަސްމިއްޔާތުގައި މިނިސްޓަރ އޮފް ހެލްތު ބައިވެރިވެވަޑައިގެން، ސިއްޙީ ޚިދުމަތުގެ ޤާބިލުކަން އިތުރުކުރުމަށް މިފަދަ ޕްރޮގްރާމްތައް ކުރިއަށް ގެންދިއުމުގެ މުހިންމުކަން ފާހަގަކުރެއްވިއެވެ.
އެގޮތުން ދެއްކެވި ވާހަކަފުޅުގައި ސިއްޙީ ޚިދުމަތް ދިނުމުގައި ކުރިއެރުންތައް ދެމެހެއްޓުމަށްޓަކައި ތަމްރީނުތައް މެދުނުކެނޑި ކުރިއަށް ގެންދިއުމަކީމުހިންމު ކަމެއްކަން ފާހަގަކުރެއްވިއެވެ. އަދި ހަމައެކަނި ފޮތްތަކުން ދަސްކުރުމަށްވުރެ މަސައްކަތުގެ މާޙައުލުން ތަޖުރިބާ ހޯދުމަށް ވެސް މިނިސްޓަރ ވަނީ އިރުޝާދު ދެއްވާފައެވެ.
އަދި ހަމަ އެއާއި އެކު، އަތޮޅުތެރޭގެ ސިއްޙީ ފަރުވާދޭ ތަންތަނުގައި މަސައްކަތްކުރާ ނަރުހުންނަށްވެސް މި ޕްރޮގްރާމް ފޯރުކޮށްދިނުމާއެކު ދެމެހެއްޓެނިވިގޮތެއްގައި މި ޕްރޮގްރާމު ހިންގުމަށް މިނިސްޓަރ ވަނީ އިލްތިމާސްކުރައްވާފައެވެ.
މި ޕްރޮގްރާމް ކުރިއަށް ގެންދެވުނީ އެސްޓީއޯ ހެލްތްކެއަރ ސޮލިއުޝަންސް، އެސްޓްރާޒެނެކާ އަދި ކެންސަރ ސޮސައިޓީ އޮފް މޯލްޑިވްސްގެ އިސްނެގުމުގެ ދަށުން، ރާއްޖޭގައި ކެންސަރު ފަރުވާ ކުރިއެރުވުމަށް މި ފަރާތްތަކުގެ މެދުގައި އޮތް އެއްބާރުލުން ދައްކުވައިދިނުމުގެ ގޮތުންނެވެ.
އެސްޓީއޯ ހެލްތްކެއަރ ސޮލިއުޝަންސް ތަމްސީލުކުރައްވައި، ފާމަސޫޓިކަލް ޕްލޭނިންގ މެނޭޖަރު ވަނީ މި ޕްރޮގްރާމުގައި ބައިވެރިވި ނަރުހުންގެ ވަރުބަލިކަމެއް ނެތް މަސައްކަތަށް ތަޢުރީފުކުރައްވާފައެވެ. އަދި އެ ބޭފުޅުންގެ ހުނަރުތަކަށް ކުރެވޭ އިންވެސްޓްމަންޓުން ސީދާ ބަލިމީހުންނަށް ދެވޭ ފަރުވާ ރަނގަޅުވެ، ޤައުމީ ފެންވަރުގައި ޞިއްޙީ ނިޒާމް ވަރުގަދަވުމަށް މަގުފަހިވާނެ ކަމެއްކަމުގައި ފާހަގަކުރެއްވިއެވެ.
މި ރަސްމިއްޔާތުގައި މިޕްރޮގްރާމްގެ ބައިވެރިންނަށް ވަނީ ސެޓްފިކެޓް ދެއްވާފައެވެ. ބައިވެރިން ވަނީ މި ޚާއްޞަ ދާއިރާގައި އެ ބޭފުޅުންގެ ހުނަރުތައް އިތުރަށް ތަރައްޤީކުރުމުގެ ފުރުޞަތު ލިބުނުކަމަށްޓަކައި ޝުކުރުއަދާކުރައްވާފައެވެ.
އޮންކޮލޮޖީ ނަރުސްކަމުގެ ދާއިރާއިން ހުނަރުވެރި މަސައްކަތްތެރިން އުފެއްދުމަށް ރާއްޖޭގައި ކުރެވޭ މަސައްކަތުގައި މި ޕްރޮގްރާމް ކާމިޔާބުކަމާއެކު ނިންމާލާފައިވާއިރު، މި ޕްރޮގްރާމް އަތޮޅުތެރޭގައި ވެސް ކުރިއަށް ގެންދިއުމަށް ވަނީ އަމާޒުހިފާފައެވެ.