ރާއްޖޭގެ ތަރައްގީއަށާއި ރައްޔިތުންގެ ކުރިއެރުމަށް ސަރުކާރުން ކުރައްވަމުން ގެންދަވާ މަސައްކަތްތައް ހުއްޓުވުމުގެ ފުރުސަތެއް އިދިކޮޅު ފަރާތްތަކަށް ނުދެއްވާނެ ކަމަށް ރައީސް އޮފީހުގެ ލީގަލް އެފެއާޒު މިނިސްޓަރު އާޒިމާ ޝުކޫރު ވިދާޅުވެއްޖެއެވެ.
ޓީވީއެމްއިން ރޭ ގެނެސްދިން ޕްރޮގްރާމެއްގައި ވާހަކަ ދައްކަވަމުން އޭނާ ވިދާޅުވީ ރާއްޖޭގެ ތަރައްގީގެ މަޝްރުއުތައް ހުއްޓުވާލައި، ބޭރުގެ ފަރާތްތަކަށް ރާއްޖެއައުމަށް ދައުވަތުދީ، ޓޫރިޒަމް ހުއްޓުވައިލުމަށް އިދިކޮޅުން ކުރަމުންދާ މަސައްކަތްތަކަށް ދައުލަތުން ބަލަހައްޓައިގެން ނޯންނާނެ ކަމަށެވެ.
ސަރުކާރުން ރައްޔިތުންނަށް ޒިންމާވާންޖެހޭ ކަމަށާއި އިދިކޮޅުން ރައްޔިތުންނަށް ޒިންމާވާން ނުޖެހޭ ކަމަށްވެސް އޭނާ ވިދާޅުވިއެވެ. "އަޅުގަނޑުމެން ޒިންމާވާންޖެހޭ ސްކޫލްތަކަށް. އަޅުގަނޑުމެން ޒިންމާވާންޖެހޭ މުސާރަތަކަށް. އަޅުގަނޑުމެން ޒިންމާވާންޖެހޭ ރައްޔިތުންނަށް ކާންބޯންދިނުމަށް. ހުރިހާ ކަމަކަށް ޒިންމާވާންއޮތީ ސަރުކާރު. ބޭރުގައި ތިބޭ ބަޔަކަށް ހަޅޭއްލެވިދާނެ އަޑުގަދަ ކުރެވިދާނެ. އިންކަމް ހުއްޓުވަންވެސް މަސައްކަތް ކުރެވިދާނެ،" އާޒިމާ ވިދާޅުވިއެވެ.
އިދިކޮޅު ފަރާތްތަކުގެ ހަރަކާތްތައް އެހިސާދާއިރު ސަރުކާރުން އެކަންކަމެއް "ޓޮލަރޭޓެއް" ނުކުރާނެ ކަމަށްވެސް މިނިސްޓަރ އާޒިމާ ވިދާޅުވިއެވެ. އެއީ އެއްވެސް ސަރުކާރަކަށް އޮންނަ ޖާގައެއް ނޫން. އޮޕޮސިޝަނުން އަޅުގަނޑުމެން ކުރާ މަސައްކަތް ހުއްޓުވަންވީމާ އެކަމަށް ފުރުސަތުދީގެން ނޯވެވޭނެ. އަޅުގަނޑުމެން ނުވެސްކުރާނަން އެކަން. ސަރުކާރުގެ ޒިންމާ ސަރުކާރުން އަދާކުރާނެ،" އޭނާ ވިދާޅުވިއެވެ.
ރާއްޖޭގެ ގާނޫނު ތަންފީޒު ކުރުމަށާއި ތަރައްގީގެ ޕްރޮޖެކްތައް ހިންގުމުގައިވެސް ސަރުކާރުންދާނީ ކުރިއަށް ކަމަށާއި އެކަންކަން ކުރައްވާނީ ބޭރުންވެސް އެތެރެއިންވެސް ގާނޫނީ އޮނިގަނޑުގެ ތެރެއިން ކަމަށް އާޒިމާ ވިދާޅުވިއެވެ.
އޭނާ ވިދާޅުވީ އިދިކޮޅު ފަރާތްތައް ހިތަހަމަ ނުޖޭކަމެއް އޮތް ކަމަށްވާނަމަ އެއްވެސް ޝަރުތަކާ ނުލައި މަޝްވަރާ ކުރުމުގެ ފުރުސަތު ރައީސް ޔާމީންވަނީ ހުޅުވާލައްވައިފައި ކަމަށެވެ. އެ މަޝްވަރާގައި ކޮންމެ ވާހަކައެއްވެސް ދެއްކޭނެ ކަމަށް ރައީސް ވިދާޅުވެފައިވާ ކަމަށް އޭނާ ވިދާޅުވިއެވެ.
