ވިހަ ތީރު (101)

( 1 އެޕްރީލް 2025 ގައި ޝާއިޢުކުރި ބަޔާގުޅޭ )

ޢީޝަލްގެ ހެދުންތައް ފަށްޖަހަން ، މެހެމަލް ހުއްޓާ ، ދިލްނަޝީން މަޑުމަޑުން އައިސް ކޮޓަރިތެރެޔަށް ވަދެ ، އަޞްލުގައިވެސް އެގެއިން މެހެމަލް ދަނީތޯ ސުއާލު ކުރިއެވެ. އިތުރު ވާހަކައެއް ނުދައްކާ ، މެހެމަލް ހަމައެކަނި އާނއެކޭ ބުނެލިއެވެ. ދެން ، މެހެމަލްގެ ލޯތްބަށްވާނީ ކިހިނެއްތޯ ދިލްނަޝީން ސުއާލު ކުރިއެވެ. ދިލްނަޝީންގެ އެ ސުއާލަށް ދޭނެޖަވާބެއް މެހެމަލްގެ ހިތަކަށް ކުއްލިޔަކަށް ނައެވެ. އެކަމަކު އެއީ ، މެހެމަލް ޖަވާބުދޭންޖެހޭނެ ސުއާލެކެވެ. އެގެޔަށް އައީއްސުރެ ، މުޅިދުނިޔެއާ މެހެމަލް ހަނގުރާމަކުރަމުން އެއައީ އެ ލޯތްބަށްޓަކައެވެ. ދިލްނަޝީންގެ ދިރިއުޅުން ނަރަކަޔަކަށް ހަދައިލިއެވެ. ރިދާ އާއި ޙަމްޒާ ، އޭނާގެ މުށުތެރެޔަށް ލައިގެން ދިލްނަޝީނަށް ތަކުލީފުދެމުން ގެންދިޔައެވެ. ބޮޑުދައިތައާއި ޙައިދަރުގެ ހިތަށް ވަސްވާސް ވައްދައިގެން ، ދިލްނަޝީންގެ އަބުރާއި ޢިއްޒަތް ދުއްވައިލިއެވެ. އެހެން ވީމާ ، އެ ލޯތްބާބެހޭގޮތުން ޚާއްޞަކޮށް ދިލްނަޝީން އެކުރި ސުއާލަށް ޖަވާބެއް ދޭންޖެހޭނެއެވެ. އެހެންނޫނީ އެސުއާލަށް ޖަވާބެއް ހޯދަން ކުރާ މަސައްކަތް ދިލްނަޝީން ހުއްޓައެއް ނުލާނެއެވެ.

" ލޯތްބަކީ ފާޑެއްގެ ޖަޒުބާތީ އިޙްސާސެކެވެ. ލޯތްބެއް ހެދިބޮޑުވާނެ ރަނގަޅު މާޙައުލެއް ނެތިއްޖެނަމަ ، އެ ލޯތްބެއް އުފެދި ދިރިގެންނެއް ނުދާނެއެވެ. ލޯބި އުފެދި އިތުރުވުމަށް ، އިންސާނާއެކޭ އެއްގޮތަށް ރަނގަޅު ފެނާއި ކާނާ ބޭނުންވާނެއެވެ. އާ މުޑުވަކެއް އިންދިދާނެއެވެ. އެކަމަކު ، ރޯކަން ކެނޑި ހިކި ، މިލާމޯޅިވެފައިވާ ގަހަކަށް ދިރުމެއް ނުލިބޭނެއެވެ. މިގޭގައި ދިރިއުޅެމުންދިޔައިރުވެސް އަހަރެންގެ ލޯބި މަރުވެގެން ހިނގައްޖެއެވެ. އުއްމީދީ އާ ލޯތްބަކަށް  ފުރުޞަތު ލިބިގެން އަލިވިލިގެން ދިޔައީއެވެ. ދިލްނަޝީންގެ ނަމުގައެވެ. " މެހެމަލް ބުނަމުން ގެންދިޔައެވެ.

އެހުރިހާ ވާހަކައެއް މެހެމަލް ދެއްކި އިރުވެސް ، ދިލްނަޝީން ހުއްޓިލައިގެން މެހެމަލްގެ ވާހަކަ އަޑުއަހަން ހިމޭނުން ހުއްޓެވެ. މެހެމަލް އެނދުން ތެދުވެގެން އައިސް ދިލްނަޝީންގާތުގައި ހުއްޓުނެވެ. ދިލްނަޝީންގެ ދަތްދޮޅީގައި ހިފައިލިއެވެ.

" ޙައިދަރަކީ އަހަރެންނަށް ހެޔޮއެދޭ ، އަޅައިލާ ، ތިމާގެ މީހެއްކަމަށް ޙައިދަރު އަބަދުވެސް ބުނަމުން ގެންދިޔައެވެ. އެކަމަކު އަހަރެންގެ ލޯތްބެއްނޫނެވެ. އަހަރެންނާ ޙައިދަރާދެމެދު އޮތިއްޔާ އޮތްގުޅުމެއް ނެތި ހިނގައްޖެތާ ކިތަންމެ ދުވަހެކެވެ. އެ ގުޅުމުގެ މަތިން ހަނދާންކޮށްގެން އުޅެންހަދައިގެން ލަނޑު މިލިބުނީ އަހަރެންނަށެވެ. އެތައްބައެއްގެ ބަދުދުޢާ އަހަރެންނަށް ލިބިއްޖެއެވެ. އެތައް ބަޔަކަށް އެކަމުން އަނިޔާއާއި ތަކުލީފު ދެވިއްޖެއެވެ. އެކަމަކު ، މިހާރު ދެން އެކަން އެ ނިމުނީއެވެ. ނެތް އެއްޗެއް އެއްވެސް މީހެއްގެ ޙަޔާތަކަށް ގަދަކަމަކުން ނުގެނެވޭނެއެވެ. " މެހެމަލް ރޮމުންރޮމުން ކިޔައިދެމުން ގެންދިޔައެވެ.

މެހެމަލް އައިސް އިހުނަށްވުރެ ބޮޑަށް ދިލްނަޝީނާ ގާތަށް ޖެހިލިއެވެ. އަދި ، ﷲ ގެ އިރާދަފުޅާއި މިންވަރުފުޅުން ، ޙައިދަރާއި ދިލްނަޝީން އުފަލުގައި ލެހެއްޓެވުން އެދި ދުޢާ ކުރިއެވެ. އަބަދުގެ އަބަދަށް އެދެމީހުން އެކުގައި ވުމަށް އެދުނެވެ. ދިލްނަޝީންގެ އަތުގައި މެހެމަލް ހިފައިލިއެވެ.

" އެންމެންގެ ފަރާތުން އަހަރެންނަށް ވަރަށް އެހީތެރިކަން ލިބުނެވެ. އަހަރެން މިގެޔަށް އައީ ތަކުލީފާއި އަނިޔާއިން ޒަޚަމްވެފައިވާ ހިތެއް ހިފައިގެންކަމަށް ބަލައި ، އަހަރެންނަށް މަޢާފު ކުރާށެވެ . އަހަރެންނަކީ ، އަންހެނަކަށް ނަފްސާނީގޮތުން ލިބޭނެ އެންމެ ބޮޑެތި އަނިޔާ ލިބުމަށްފަހު ، އެ އަންހެނާގެ ލޯބި ހޯދުމަށް އައި ނިކަމެއްޗެއްކަމުގައި ބަލާށެވެ. އެކަމަކު ، ޙާލަތާއި ވަގުތަކީ އޮންނަ އެއްޗެއްކަން އަހަރެންނަށް ނުވިސްނުނީއެވެ. ލޯބި ހޯދަން އާދެވުނުލެއް ލަސްވެސް ވީއެވެ. އެހެން އިންސާނަކު އައީއެވެ. އެހެން ގުޅުމެއް އެދެމެދަށް ވަނީއެވެ. ދިލްނަޝީންގެ ފިރިމީހާ ، ދިލްނަޝީންދެކެ ލޯބިވަނީ ކިހާވަރަކަށްކަން ދިލްނަޝީނަށް އަންގައިދިނުމުގެ ބޭނުމެއް ނެތެވެ. މިހާރު ތިތިބީ ރައްޓެހިންނަށް ވެފައެވެ. އެކަކު އަނެކަކަށް ދަސްކުރަން ވެފައެވެ. އުފަލުގައި ހުންނާށެވެ. " މެހެމަލް ބުންޏެވެ.

މެހެމަލްގެ ވާހަކަ އެހިސާބަށް ދިޔަތަނާ ، ސާރާ އައިސް މެހެމަލްގެ ކޮޓަރިޔަށް ވަނެވެ. އަންޞާބު ސައިބޮއެ ނިމިއްޖެ ކަމަށާއި ، މެހެމަލް ދާންވީ ވަގުތު ޖެހިއްޖެކަމަށް ސާރާ ބުންޏެވެ. މެހެމަލް ކޮޓަރިން ނުކުތުމުގެ ކުރިން ، ދިލްނަޝީނާ ކޮނޑާ ކޮނޑުޖައްސައި ސަލާމް ކޮށްލިއެވެ. މެހެމަލްއަށް ހުރީ ރޮވިފައެވެ. ދިލްނަޝީންހުރީ އެ ލިބިގެންދިޔަ ޙައިރާންކަމުން ، ފުރޮޅިގެންދިޔަ މަންޒަރުން ބަލާނީ ކޮން މަންޒަރެއްކަން ނޭނގިފައެވެ. ދިލްނަޝީންގައިގައި ބައްދާލައިގެން އިރުކޮޅަކު ހުރުމަށްފަހު ، ޢީޝަލްގޮވައިގެން މެހެމަލް ނުކުތެވެ.

ދިލްނަޝީނަށް ލިބުނު ޝޮކްގައި ހިރިލަންވެސް ނޭނގި  މެހެމަލްގެ ކޮޓަރީގައި ގަބުވެފައި ކޮޅަށް ހުއްޓެވެ. ޙައިދަރުގެ ވާހަކަތަކުން ދިލްނަޝީންގެ ކަންފަތް އެ ވަގުތު ، ބަށްވަމުންދިޔައެވެ.

" އަހަރެންނާއި މެހެމަލްއާ ދެމީހުން އެއްވެސްކަމެއްގައި އެއްވެސް ގޮތެއް ނުނިންމާކަން އަހަރެން ސާބިތުކޮށްދޭންވީ ކިހިނެއް ހެއްޔެވެ ؟ "

" މެހެމަލްއަކީ އަހަރެންގެ ކުރީގެ ލޯބިކަމަށް އަހަރެން މިހާރުވެސް އެއްބަސްވަމެވެ. އެކަމަކު ، މިހާރު އެއީ އަހަރެންގެ ލޯތްބެއް ނޫނެވެ. އަހަރެންގެ ލޯބި ވަނީ މިގޭގައެވެ. ދިލްނަޝީންގެ އަތްމަތީގައެވެ. އަހަރެންގެ މަންމައާއި އަހަރެންގެ އަންހެނުންނާ އަދި ކޮއްކޮއެވެ. އަދި މި ދަރިފުޅެވެ. ﷲ ގަންދީ ހުވާކޮށްފައި ބުނަމެވެ. އަހަރެން މަސައްކަތްކުރަމުން މިގެންދަނީ ހުރިހާ ކަމެއް ހަމަޔަކަށް އެޅުވުމަށެވެ. އެކަމަކު އަހަރެންކުރާ ހުރިހާކަމެއް ވަޔަށް އަރައިގެންދާ ވެލިތަކެއްހެން އަހަރެންގެ ދިރިއުޅުމަށް އައިސް ކިލަނބުވަނީއެވެ. އަހަރެން މިބުނާ ވާހަކަތައް ޔަޤީން ކުރާށެވެ. "

އޭނާގެ ދަރިފުޅާއި އަނބިމީހާ ، އެހާގިނަދުވަސްތަކެއް ވަންދެން އެގޭގައި ގެންގުޅެ ބަލަހައްޓައިދިނީތީ ، އަންޞާބު ، ޙައިދަރަށް ޝުކުރު އަދާކުރިއެވެ. އެއީ މެހެމަލްގެވެސް އަމިއްލަ ގެ ކަމަށާއި ، ބޭނުންއިރަކު އައިސްގޮސް އުޅެވިދާނެކަމަށް ޙައިދަރު ބުންޏެވެ.

" އަޞްލު ، އަހަރެންގެ ބައްޕަ ނިޔާވުމަށްފަހު ، އެންމެންގެ ހުރިހާ ޒިންމާއެއް ވާރުތަވެގެން އައީ އަހަރެންގެ އަތްމައްޗަށެވެ. އޭގެ ތެރޭގައި މެހެމަލްގެ މަންމައާއި ބައްޕަޔާ އަދި މެހެމަލްވެސް ހިމެނެއެވެ. މިގެޔަކީ މެހެމަލްގެ މަންމަގެ ގެ ކަމުގައި ބަލާށެވެ ! މެހެމަލްގެ އެއްވެސް މީހަކު ނެތްކަމަށް ، ޢަންޞާބު ބަލައިގެން ނުވާނެ ވާހަކަ ބުނެލަން ، މެހެމަލްގެ ތިމާގެމީހެއްގެ ޙައިޞިއްޔަތުން ، އަހަރެން ބޭނުމެވެ. އަންޞާބުގެ އުޅުން ހުރީ ކުރިއެކޭވެސް އެއްގޮތަށް ކަމަށްވަންޏާ ، އަންޞާބުގެ ގެ ދޫކޮށްލާފައި ، މެހެމަލް ބޭނުން ކޮންމެއިރަކުވެސް މިގެޔަށް އާދެވިދާނެއެވެ.

އަންޞާބު ، ދިލްނަޝީނަށް ގޮވައިލިއެވެ. އަދި ، ދިލްނަޝީންގެ ފިރިމީހާ ، އެންމެންގެ ކުރިމަތީގައި އޭނާއަށް އިންޒާރުދީ ، އޭނާ ލަދުގަންނުވައިލަނީކަމުގައި ، އަންޞާބު ބުންޏެވެ. އޭނާ އެދެނީ އިންޒާރެއްނޫންކަމަށާއި ، ވިސްނައިދިނުމަށް މަސައްކަތް ކުރަނީކަމަށް ޙައިދަރު ބުންޏެވެ. ދިލްނަޝީންވެސް ޙައިދަރުގެ ވާހަކަޔަށް އެއްބައިވުމަށް ބޯޖަހާލައި ޙައިދަރާ ދިމާލަށް ބަލައިލިއެވެ. ޙައިދަރުގެ ތިމާގެ މީހަކު ކަންބޮޑުވާނެކަމެއް ކުރިމަތިވަންޏާ އެކަމަކާމެދު ވިސްނުމަކީ އޭނާގެ ޒިންމާއެއްކަމަށް ޙައިދަރު ބުންޏެވެ.

ޙައިދަރުގެ ވާހަކަ ނިމުމާއެކީ މެހެމަލް ، ޙައިދަރަށް ގޮވައިލިއެވެ. އަދި ޝުކުރު އަދާކުރިއެވެ. ޙައިދަރަށްޓަކައި އޭނާ ފަޚުރުވެރިވާކަމަށް ، މެހެމަލް ބުންޏެވެ.

ޙަޤީޤަތުގައިވެސް ، ޙައިދަރަކީ ، ވަރަށްރަނގަޅުމީހެއްކަމަށް އަންޞާބުވެސް ބުންޏެވެ. އަދި އޭނާގެ ފަރާތުންވެސް ، ޙައިދަރަށް ޝުކުރުއަދާކުރާކަމަށް ބުންޏެވެ. އަންޞާބު ، ދިލްނަޝީނަށް ގޮވައިލިއެވެ. އަދި ، ދިލްނަޝީނަކީ ވަރަށް ނަޞީބުގަދަ ކުއްޖެއްކަމުގައި އަންޞާބު ބުންޏެވެ. ޙައިދަރުފަދަ ރަނގަޅުމީހަކު ، ވަރަށް މަދުވާނެއެވެ. އެކަހަލަ މީހަކު ލިބޭނީ ވަރަށް ނަޞީބުގަދަ މީހަކަށެވެ.

މެހެމަލްއަށް އޭނާގެ ޝަކުވާކުރާނެ އެއްވެސް ފުރުޞަތެއް ނުދޭނެކަމަށް ޙައިދަރުގާތުގައި އަންޞާބު ބުންޏެވެ. އެންމެން އެންމެންނަށް ސަލާމް ގަލާންކޮށްފައި ، މެހެމަލްއާއި އަންޞާބު ނުކުމެގެން ދިޔައެވެ.

މެހެމަލްގެ ގެ އަލުން އާބާދުވެގެން ދިޔަކަމަށްޓަކައި ﷲ އަށް ޝުކުރުކުރާ ކަމުގައި ސާރާ ބުންޏެވެ. ތަންކޮޅެއް ލަހުންކަމަށްވިޔަސް ، މެހެމަލްގެ ގެ އާބާދުވެގެން އެދިޔައީކަމަށް ، ޙައިދަރުވެސް ބުނެލިއެވެ. އަދި ، ދިލްނަޝީނާ ދިމާލަށް ވަށްކަޅިޔަކުން ބަލައިލިއެވެ. އަންޞާބަށް އޭނާގެ ޒިންމާއާއި މަސްއޫލިއްޔަތު އިޙްސާސް ވީއެވެ.

ސާރާއާއި ދިލްނަޝީން ގޭތެރެޔަށް ވަންނަން ހިނގައިގަތްނަމަވެސް ޙައިދަރު ، ބޭރުގައި މަޑުކޮށްލައިގެން ހުއްޓެވެ. އަވަސް ހިނގުމެއްގައި ޙައިދަރު ފަހަތުންގޮސް ، ދިލްނަޝީނަށް ގޮވައިލިއެވެ.

" ދިލްނަޝީން ރަނގަޅު ހެއްޔެވެ ؟ މެހެމަލް އޭނާގެ ގެޔަށް އަނބުރާ ދިއުމަކީ ރަނގަޅަށް ދިމާވި ކަމެކެވެ. " ޙައިދަރު ބުންޏެވެ.

ދިލްނަޝީން ޙައިދަރާ ދިމާލަށް އެނބުރިލުމަށްފަހު ހިނިތުން ވެލިއެވެ.

" އަހަރެމެންގެ ދިރިއުޅުމަކީ ، އެކްޝަން ފިލްމެއްހެން ހާދަގިނަ ތަޅާފޮޅުމާއި ލޯތްބާ އަދި ކުއްލި ބަދަލުތައް ހިމެނޭ އެއްޗަކަށް ވެއްޖެއެވެ. ކޮންމެ ވަގުތަކުވެސް ޙާލަތު ބަދަލުވެދާނެއެވެ. ނުމެޢީދަކު ނުމެރޯދަޔަކު ، ހަމަ ކުއްލިއަކަށެވެ. " ދިލްނަޝީން ބުންޏެވެ.

ދިލްނަޝީން އެބުނި އެއްޗަކަށް މާބޮޑު ފަރުވާލެއް ނުބަހައްޓައި ، ދިލްނަޝީން ނިންމީ ކޮންގޮތަކަށްތޯ ޙައިދަރު ސުއާލު ކުރިއެވެ.

ދިލްނަޝީން ވިސްނައި ފިކުރުކުރަންވީ ކޮންކަމަކާ ހެއްޔެވެ ؟ ޙައިދަރު މިހާރު އެ ފެށީ އޭނާއާ ދިމާކޮށް ، ޖެއްސުންކުރަންކަމުގައި ދިލްނަޝީން ބުންޏެވެ. އޭނާ މޮޔަވާވަރު ވެއްޖެއެވެ. ޙައިދަރަށް ލިބުނު ޙައިރާންކަމުގައި އޭނާއަށް ކުރެވުނީ ކޮންކަމެއްތޯ ސުއާލު ކުރިއެވެ.

" ދެން އެހެން ކާކުހެއްޔެވެ ؟ މިކަންތައްގަނޑު ނިމުމަކަށް ނައިސްގެން މިއުޅެނީ ކީއްވެ ހެއްޔެވެ ؟ އެއްކަމަކަށްފަހު އަނެއްކަމެއް ، އެއްކަމެއް ނިމޭއިރު އަނެއްކަމެއް އެބަ ލައިގަނެއެވެ. ދެން ، މިގޭގަ އުޅުނު އެ އަންހެނާ އޭނާގެ ފިރިމީހާ ، ބޮޑުކާރެއްގައި ، ޑްރައިވަރުންނާ ގާޑުންނާއެކީ އެގެޔަށް އައިސް ، ލޯބީގެ ވަޢުދާއި ޢަހުދުން ބަނދެވިފައިވާ ތިޔަ ލޯބި ދޫކޮށްލައި ، ފިރިމީހާގެ ގެޔަށް  ނައްޓާލީއެވެ. ކުރީގެ ލޯބިވެރިޔާ ވަގުތީގޮތުން ހަނދާން ނައްތައިލީއެވެ.

މެހެމަލް ހަދަންވީ ކިހިނެއްތޯ ޙައިދަރު ސުއާލު ކުރިއެވެ. އެގޮތެއް ބުނެދިނުމަށް ޙައިދަރު އެދުނެވެ. އެގޭގައި މެހެމަލް އިނދެގެން ، އެމީހުންގެ ދިރިއުޅުމަށް ވިހަލުން ނޫންއެހެންކަމެއް މެހެމަލް ނުކުރާކަމަށް ޙައިދަރު ބުންޏެވެ.

" ވަރިޔަށް އެދެންވީއެވެ. އަންޞާބުގާތުން މެހެމަލް ، ތިންފަށް ވަރިޔަކުން ވަރިޔަށް އެދެންވީއެވެ. އަދި ވަގުތުން ، ޙައިދަރާ އިންނަންވީއެވެ. " ދިލްނަޝީންގެ ކުއްލި ޖަވާބުން ޙައިދަރު ޙައިރާން ވިއެވެ.

އެއީ ސަމާސާއަކަށް ދައްކަންޖެހޭކަހަލަ ވާހަކައެއްނޫންކަމަށް ޙައިދަރު ބުންޏެވެ. އެކައްޗަކަށް ވާނީ ހަމައެކަނި ދެމީހެއް ނޫނެވެ. އެކައްޗަކަށް ވެގެންދަނީ ދެ ޢާއިލާއެކެވެ. ދެޢައިލާއެއްގައި ހިމެނޭ އެތައް ބަޔެކެވެ. ގުޅިގެން އެއްބައެއްވަންތަކަން އުފެދިގެން އެދަނީ ، ދެޢާއިލާއެއްގެ ޢިއްޒަތާއި ދަރިފަސް ކޮޅުގެ މެދުގައެވެ.

ދިލްނަޝީން ވަރިޔަށް އެ އެދެނީ އެހެންވެގެންކަމުގައި ދިލްނަޝީން ބުންޏެވެ. އެ ދެމީހުންގެ އެ ދަރިފުޅަކީ ، ޔަތީމުކުއްޖެއްކަން ޙައިދަރުގެ މަންމަޔަށް އެނގިގެން ނުވާނެއެވެ. މަންމަ ދުނިޔޭގައި ހުއްޓާ ޙައިދަރު ، އެކަން ވިޔަކަ ނުދޭނެއެވެ.

" އަހަރެންގެ ދަރިފުޅަކީ ، ޔަތީމު ކުއްޖެއްނޫނެވެ. އަހަރެންގެ ބޮޑުބޭބެގެ ދަރިފުޅާއި އޭނާގެ ކާފަދަރިފުޅާމެދު ، އަހަރެން ގޮތެއް ނިންމިއިރު ، އަހަރެންގެ އުފަން ދަރިފުޅާމެދުވެސް އަހަރެންނަށް ގޮތް ނިންމޭނެއެވެ. އަހަރެންގެ ދަރިފުޅަށްޓަކައި ކޮންމެފަދަ ކަމެއްވެސް ކޮށްފާނަމެވެ. ދިލްނަޝީން ، ތިދަރިފުޅު ބޭނުންނޫންކަމަށް ވަންޏާ ، ދަރިފުޅު ވިހާފަ އަހަރެންނާ ޙަވާލު ކުރާށެވެ ! އަހަރެން ، އެދަރިފުޅު ބަލައި ބޮޑުކުރާނަމެވެ. މުޅި ޢުމުރު އެކުއްޖާފުޅާއެކީ ހޭދަ ކުރާނަމެވެ. " ޙައިދަރު ، ދަތްވިކައިގެން ހުރެ ބުންޏެވެ.

ކުލްސޫމް ބަލިވެ އުޅޭތީ ގޮވާލަންވެގެން އަނީސާމެން އެގެޔަށް ޒިޔާރަތް ކުރިއެވެ. ދިލްނަޝީން ބަލިވެއިންކަން އަނީސާމެންނަށް އެނގުނީ އެގެޔަށް އައިފަހުންނެވެ. މެހެމަލްވެސް އެގެއިން ހިނގައްޖެއެވެ. ދިލްނަޝީން ބަލިވެއިނުމާއި ، މެހެމަލް އެގެއިން ދިއުމަކީ ދިލްނަޝީންގެ ޙަޔާތަށް އަލިކަން ގެނެސްދިން ކަމެއްގެ ގޮތުގައި އަނީސާ ސިފަކުރިއެވެ. ދިލްނަޝީންގެ މާޒީއާ ގުޅުވައި ، ޙައިދަރު އެއްވެސް މައްސަލައެއް ނުޖައްސާތޯ ، އައްވަލަށް ސުއާލު ކުރުމާއެކީ ، އެކަހަލަ ވާހަކަ ، ދިލްނަޝީނާ ދެން ނުދެއްކުމަށް އައްވަލްގެ ކިބައިން އަނީސާ އެދުނެވެ. ﷲ ގެ ރަޙުމަތްފުޅުން ، އޭނާގެ ދަރިފުޅުގެ މުސްތަޤްބަލް ދެންދާނީ އުޖާލާވެ އަލިވެގެންނެވެ. ދިލްނަޝީން ބަލިވެއިނުމަކީ ، ޙައިދަރާއެކީ އޮތްގުޅުން ރަނގަޅުކަމުގެ ހެއްކެއްކަމުގައި އަނީސާ އަށް ފެނުނެވެ. ( ނުނިމޭ )