މީހަކު ރަހީނުކޮށް، އިނގިލި ބުރުކޮށްލަން އުޅުނު މައްސަލައިގައި ހައްޔަރުކުރި މީހުންގެ ތެރޭގައި ހިމެނޭ މީހަކު، ވައްކަމުގެ މައްސަލައެއްގައި ހައްޔަރުކޮށްފިއެވެ.
ވައްކަމުގެ މައްސަލައިގައި ހައްޔަރު ކޮށްފައިވަނީ މ. ކޮޅުފުށި، އާރެސް، 38 އަހަރުގެ ހަސަން ޣާލިބު އެވެ. ކްރިމިނަލް ކޯޓުން ޣާލިބުގެ ބަންދަށް 15 ދުވަސް ޖަހައިދީފައި ވާއިރު، އޭނާއަކީ ކުށުގެ ރެކޯޑް ގިނަ މީހެއް ކަމުގައި ވެސް ބަންދު އަމުރުގައި ފާހަގަކޮށްފައިވެއެވެ.
މިދިޔަ އަހަރު ހިޔާ ފްލެޓެއްގައި މީހަކު ރަހީނުކޮށް އިނގިލި ބުރިކުރަން އުޅުނު މައްސަލައިގައި ޣާލިބު ހިމެނޭހެން 12 މީހަކު ހައްޔަރުކޮށްފައިވަނީ މިދިޔަ އަހަރުގެ ނޮވެމްބަރު މަހުގެ ހަތްވަނަ ދުވަހުގެ ރޭގަ އެވެ. އެ 12 މީހުން ހައްޔަރުކޮށްފައިވަނީ ހުޅުމާލޭ ހިޔާ ފްލެޓްގެ ނުވަ ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓުންނެވެ.
ފުލުހުން ބުނި ގޮތުގައި، ބާރުގެ ބޭނުންކޮށްގެން ފުލުހުން އެރޭ އެތަނަށް ވަތްއިރު، އެ މީހުން ތިބީ ރަހީނުކުރެވުނު މީހާގެ ބޯ ބޭލުމަށް ފަހު، އެ މީހާގެ އިނގިލި ބުރިކޮށްލަން ތައްޔާރުވެގެންނެވެ.
އެ މައްސަލައިގައި ހައްޔަރުކުރި މީހުންގެ މައްޗަށް ދައުވާކުރަން މިދިޔަ ޑިސެމްބަރު މަހު ފޮނުވުމަށްފަހު، އެ އެންމެން ވެސް ވަނީ ދޫކޮށްލައިފަ އެވެ.