ޝަރުއީ ކޯޓަކުން އަމުރެއް ނެރުނަސް އެ ތަންފީޒު ކުރުމަށް ތަންފީޒީ އިދާރާތަކުން އަވަސްވެ ގަންނަން ނުޖެހޭ ކަމަށް ރައީސް ޔާމީން މިރޭ ވިދާޅުވެއްޖެއެވެ.
ޕީޕީއެމް އިން މިރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އެފަދަ އަމުރެއް ކުރުމުން އެ ތަންފީޒު ކުރުމުގެ ކުރިން އޭގައި ގާނޫނީ އެއްވެސް ބައެއްސަލައެއްހުރިތޯއާއި، ގާނޫނޫނާ ޚިލާފުތޯވެސް ބަލަންޖެހޭނެ ކަމަށެވެ.
އެހެންވީމައި ރައްޔިތުން އިންތިޚާބުކޮށްފައި ހުންނަވާ ރައީސުލްޖުމްހޫރިއްޔާއަކު ހުންނަވަނިކޮށް އެބޭފުޅަކާ މަޝްވަރާ ކުރުމެއްނެތި އެމްއެންޑީއެފްއިން ވެސް އަދި ފުލުހުންވެސް އެތަންފީޒު ކުރަން އަވަސްވެގަތުން ރަނގަޅު ނުވާނެ ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ އޮޑިއެއްގައި އެންމެ އިސްކޮށް ހުންނާނީ ކައްޕިތާނު ކަމަށެވެ. އޮޑިއާގެން ކައްޕި ދަތުރުކުރަމުން ދަނިކޮށް ކޮޅިގަނޑެއްގައި ޖެހިއްޖެ ކަމަށްވާނަމަ އޮޑި ސަލާމަތް ކުރުމުގެ އެންމެހާ ޒިންމާއެއް ނަގަންޖެހެނީ ކައްޕި ކަމަށް ވިދާޅުވިއެވެ. ފަޅުވެރިން މަސައްކަތް ކުރައްވަންޖެހޭނީ ކައްޕީގެ އޯޑަރަށް ކަމަށްވެސް ވިދާޅުވިއެވެ. އެހެންނޫނީ ކައްޕިއައީ ފަޅުވެރިންނާއި އޮޑިވެސް ހަލާކުވެގެން ހިނގައިދާނެ ކަމަށް ރައީސް ވިދާޅުވިއެވެ. ކޮޅިގަނޑެއްގައި ޖެހުމުން އޮޑިހަލާކު ކޮށްލުމުގެ ޝައުގެއް ކައްޕީގެ ނުހުންނާނެ ކަމަށާއި، އެކަމަކު އެހެން ކޮންމެވެސް ދިމާއަކުން "މަސްބައެއް" ލިބޭ މީހަކު ކައްޕިއާ ދެކޮޅަށް ވާހަކަ ދައްކައިފާނެ ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ ރާއްޖޭގެ ގާނޫނު އަސާސީންވެސް ވެރިއަކަށް ހުންނަ ބޭފުޅަކަށް މުތުލަގު ބާރެއް ދެއްވައިފައިވާ ކަމަށެވެ. އެއީ އެހެން މީހަކަށް ޗެލެންޖު ކުރެވޭނެ އެއްޗެއް ނޫންކަމަށް އެމަނިކުފާނު ވިދާޅުވިއެވެ.
ވެރިކަމަށް ދަހިވެތިވެގެން އުޅޭމީހުން އަބަދުވެސް އުޅޭނެކަމަށާއި އެއީ ރާއްޖޭގެ ތާރީޚުންވެސް ހެކިދޭކަމެއް ކަމަށް ރައީސް ވިދާޅުވިއެވެ. އެފަދަ މީހުން އެންމެ ފުރަތަމަ އުޅޭނީ އެންމެ ގާތުން، ގަނޑުވަރުތެރެއިން ކަމަށްވެސް ވިދާޅުވިއެވެ. އެހެން އުޅެފައިވެސް ވެރިކަމަށް އަންނަންވާނީ ގާނޫނުގެ ތެރެއިން ގައުމަށް އެމަނިކުފާނު ވިދާޅުވިއެވެ. ބަޣާވާތް ކޮށްގެން ވެރިކަމަށް އަންނަން އުޅެފި ކަމަށްވާނަމަ އޭގެ ގެއްލުން މުޅިގައުމަށްވެސް އިންތިހާއަށް ބޮޑުވާނެ ކަމަށް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ ގައުމަށް ގެއްލުމެއްދިމާވާ ވަގުތު އެކަމާ އެންމެ އިސްކޮށް އުޅުއްވާނީ ރައީސް ކަމަށެވެ. ގައުމު ގައުމެއްގެ ގޮތުގައި ރަމްޒުވެގެން އަންނަނީވެސް "އިންތިޚާބުވެފައި ހުންނަ ރައީސަކާ ހަމައިން" ރައީސް ވިދާޅުވިއެވެ.
އެމަނިކުފާނު ވިދާޅުވީ ރައީސުލްޖުމްހޫރިއްޔާއަށްވުރެ ބޮޑަށް ސްޕްރީމްކޯޓުގެ ފަނޑިޔާރުން ގާނޫނަށް ފަރިތަވެ މޮޅުވާނެ ކަމަށެވެ. "ސްޕްރީމް ކޯޓުގެ ފަނޑިޔާރުން ގާނޫނަށް މާމޮޅުވާނެ. އެކަމަކު ނެރޭ އަމުރަށް ވިސްނަންވާނެ. ގާނޫނީ އަމުރެއްތޯ ބަލަންޖެހޭ. އަމުރެއް ކުރާއިރަށް ތަންފީޒު ކުރަން ދުއްވައިގަންނަން ވީއެއްނޫން. ތަންފީޒު ކުރަން ނުކުންނައިރި މިއީ ކިހާވަރެއްގެ ކަމެއްތޯ ބަލަންވާނެ. އިސްކޮށްހުންނަ މީހާގެ ލަފާ އަހަންވާނެ،" ރައީސް ވިދާޅުވިއެވެ.
