(23 ފެބުރުވަރީ 2025 ގައި ޝާއިޢުކުރި ބަޔާގުޅޭ )
( " މަންމަމެންވެސް މަންމަމެންގެ ގެ ، އާބާދުކުރީ އެބީދައިންނެވެ. ދަރިފުޅުވެސް އެގޮތުގައި ކުރިޔަށްދާށެވެ ! އެއްދުވަހަކުން ، ދިލްނަޝީނަކީވެސް ، ދިލްނަޝީންގެ ދަރިފުޅުގެ ބޯ ، ދިލްނަޝީންގެ ކޮނޑުގައި އަޅާލައިގެން އޮންނާނެ މީހަކަށް ވާނެއެވެ. އެހާރުން ، އެދަރިފުޅުގެ އުއްމީދުތައް ނެތިކޮށްލުމަށް ދިލްނަޝީން ބުންޏެވެ. " އަނީސާގެ މޫނު ދިލްނަޝީންގެ ބޮލުގައި ޖައްސާލަމުން ބުންޏެވެ.)
މެހެމަލްއާއި ކުލްސޫމްވެސް ޙައިދަރު އަންނާނެ ވަގުތަކަށް ބޭރަށް ނުކުމެ ތިއްބެވެ. ދިލްނަޝީންވެސް އޭނާގެ މަންމަގެ ގެއިން އެނބުރި އައެވެ. ދިލްނަޝީން ގެޔަށް އައިތަން ފެނިފައި ދިލްނަޝީނަށް ކުލްސޫމް ގޮވައިލިއެވެ.
" ދަރިފުޅާއެވެ ! ގެޔަށް އައީ ހެއްޔެވެ ؟ " ކުލްސޫމް އަހައިލިއެވެ.
އޭނާ ގެޔަށް އައީކަމަށާއި އަވަހަށްގޮސް މަންމަޔަށް ގުޅާފައި އޭނާ ގެޔަށް އައިތޯ ޗެކްކުރުމަށް ކުލްސޫމް ގާތު ދިލްނަޝީން ބުންޏެވެ. ދިލްނަޝީންގެ ބަސްމަގު ހުރިގޮތުން ، ކުލްސޫމް ކަންބޮޑުވިއެވެ. އަދި ، އެއީ ކީއްވެތޯ ދިލްނަޝީނާ ސުއާލުކުރިއެވެ.
" އެއީ ، އަހަރެން ގެޔަށް ދިޔަތޯ ޗެކްކުރިގޮތަށް ، އެނބުރި ގެޔަށް އައިމަވެސް އައިކަން ، މަންމަޔަށް އަންގާލަން ވާނެ ނޫން ހެއްޔެވެ ؟ ކާރު އައީކޮންމަގަކުންތޯ އާއި އެމަގުން ގެޔަށް އަންނަން ނަގާނީ ކިހާވަގުތެއްތޯވެސް ބަލަންވާނެ ނޫން ހެއްޔެވެ ؟ " ދިލްނަޝީން ބުންޏެވެ.
ދިލްނަޝީން އޭނާއާ އެގޮތަށް އެވާހަކަ ދައްކަނީ ކީއްވެތޯ ކުލްސޫމް ސުއާލު ކުރިއެވެ.
" އަދި އެއަށްވުރެ މާ ރަނގަޅުގޮތެއް އެބައޮތެވެ. އަހަރެން ބޭރަށްގޮސް އައިމަ ، ދިޔައީ ކޮންތާކަށްތޯއާއި އައީ ކޮންމަގަކުންތޯ އަދި އެމަގުން އަންނަން ހޭދަވީ ކިހާ ވަގުތެއްތޯ ބަލަން ކީރިތިޤުރުއާން ގެނެސް ، އަހަރެން ލައްވާ ހުވާކުރުވަންވީ ނޫންހެއްޔެވެ ؟ އަހަރެންކުރާ ހުރިހާކަމެއް އެންމެންގާތު ކިޔައިދޭކަށް އަހަރެންނަކަށް ނުޖެހެއެވެ. " ދިލްނަޝީން ބުންޏެވެ.
ދިލްނަޝީންގެ ވާހަކަ ހުރިގޮތުން ، ކުލްސޫމްވެސް ހިތްހަމަނުޖެހޭގޮތް ވިއެވެ. އަދި ، އޭނާއަކީ އެގޭގެ އެންމެ ދުވަސްވީމީހާކަމަށާއި އެއީ އޭނާގެ ދަރިފުޅުގެ ގެ ކަމުގައި ކުލްސޫމް ބުންޏެވެ. އެގޭގައި ދިރިއުޅޭ އެންމެންގެ ކަންކަން ބެލެހެއްޓުމަކީ އޭނާގެ ވާޖިބެކެވެ.
އޭނާއަކީ ، އެގޭގެ ޅީދަރިކަމުގައި ދިލްނަޝީން ބުންޏެވެ. އޭނާގެ ހުރިހާކަމެއް އެހެންމީހުންނަށް ސާފުކޮށްދީ އެންގުމަކީ ، ދިލްނަޝީންގެ ވާޖިބެއްތޯ ދިލްނަޝީން ސުއާލު ކުރިއެވެ.
ދިލްނަޝީނަށް ވެގެންއުޅޭގޮތެއް ކުލްސޫމަކަށް ނުވިސްނުނެވެ. އެދެމައިންގެ ބަހުސްގެ އަޑުއަހަން ، އެއްމިޔަކަނުން ހެވިފައި މެހެމަލް ހުއްޓެވެ. އޭނާ އެހުރީ ، ކުލްސޫމާމެދު ދިލްނަޝީންގެ ހިތުގައި މެހެމަލް އިންދި ، ނަފުރަތުގެ އޮށުން ނިރުފަޅާތަން ބަލާށެވެ. ކުށްހީއާއި ވަހުމަކީ ، މައްސަލަތައް އުފައްދާ ސަބަބުކަމުގައި ކުލްސޫމް ބުންޏެވެ. އެންމެ ރަނގަޅުގޮތަކީ މައްސަލައެއް ކުރިމަތިވެއްޖެނަމަ ، އެކަމެއް ވަގުތުން އޮޅުންފިލުވައި ހިތްވެސް ސާފުކޮށްލުމެވެ.
" އެހެން ހެއްޔެވެ ؟ މަންމަގެ ދަރިފުޅުކުރެން އެއްވެސް ވާހަކައެއް ނާހަމުނޫން ހެއްޔެވެ ؟ ޙައިދަރުގެ ލޯބިވެރިޔާ ކުރިމަތީ ބަހައްޓައިގެން ، ޙައިދަރުގެ ލޮލަށް ފިނިކަން ހޯދާއިރު ، ކުރީ ކޮން ސުއާލެއް ހެއްޔެވެ ؟ އެއީ ކާކަށް ތަޙައްމަލްކުރެވޭނެ ކަމެއް ހެއްޔެވެ ؟ އެއީ ، ކޮން އިންސާފަކުން މަޢާފުކުރެވިދާނެ ކަމެއް ހެއްޔެވެ ؟ އަހަރެންގެ ގެ ރައްކާތެރިކޮށް ކައިވެނި ދަމަހައްޓަން މަސައްކަތް ކުރާއިރު ، ހަމަ ކޮންމެ ދުވަހަކުވެސް ، އަހަރެންގެ އަތުގައި އެއަންހެނާގެ ޒަޚަމުން ވޭން އަޅައެވެ. އެހުރިހާ ކަމެއްގައި ބަދުނާމުވެ ، ހިތްހަލާކުވަނީ އަހަރެންގެ އެވެ. އެހެންމީހަކަށް ވާކަމެއް ހަރާމެވެ. އަހަރެންނަކީވެސް އިންސާނެކެވެ. މިކަމަކާ ހަނގުރާމަ ކޮށްކޮށް އަހަރެން ވަރުބަލި ވެއްޖެއެވެ. " ދިލްނަޝީން ބުންޏެވެ.
ޙައިދަރުގެ ގޮތް ދޫކޮށްގެން ދިލްނަޝީނާއެކު ދިރިއުޅެވޭތޯ ޙައިދަރު މަސައްކަތްކުރާކަން ނޭނގެނީތޯ ކުލްސޫމް ސުއާލު ކުރިއެވެ. ކުލްސޫމްގެ އަޑުގައިވަނީ ހަރުކަށިކަމެވެ. ކުލްސޫމަށްވެސް ވާހަކަ ދެއްކުނީ އާދައިގެ ވަރަށްވުރެ ބާރަށެވެ.
" ޙައިދަރުގެ ލޯބިވެރިޔާ ޙައިދަރު ދޫކޮށްލާފައި އެހެންމީހެއްގެ ގާތަށް ދިޔައީއެވެ. އެކަމުގައި އަހަރެންގެ ކުށަކީ ކޮބައި ހެއްޔެވެ ؟ ލޯބިވެރިޔާ އަނބުރާ އައިމަ ، އެކަމުގައިވެސް އަހަރެންގެ އޮތީ ކޮންކުށެއް ހެއްޔެވެ ؟ ކައިވެނި ކުރީއްސުރެ ، އަހަރެންގެ އަތަށް މީހަކު އައިސް ، އޮލިމްޕިކް ޓޯޗް ދީފައި އޮތް ކަހަލައެވެ. ހިފާށެވެ ! އަދި ދުވަމުން ގެންދާށޭ ބުނާ ކަހަލައެވެ. " " ދިލްނަޝީން ސުއާލު ކުރިއެވެ.
ކުލްސޫމްހުރީ ބުނާނެ އެއްޗެއްވެސް ނޭނގި ޙައިރާންވެފައެވެ. ދިލްނަޝީން އޭނާއާދިމާލަށް ގޮވާނެ އެއްޗެއް ގޮވުމަށްފަހު ގޭތެރެޔަށް ވަދެގެން ދިޔައެވެ. ކުލްސޫމްވެސް އިރުކޮޅަކުން ގޭތެރެޔަށް ވަދެގެންގޮސް ، އޭނާގެ ކޮޓަރިޔަށް ވަނެވެ.
ކުލްސޫމް ރޯންއިންދާ ، މެހެމަލް އައިސް ކުލްސޫމްގާތު އިށީނދެލިއެވެ. މެހެމަލްއަކީ ގޯސް އަދި ވިޔާނުދާމީހެއްކަމަށް މެހެމަލް ބުންޏެވެ. އެހެނަސް ، ބޮޑުދައިތަގެ ހިތާމަތައް ވިސްނައިގަންނަން ނޭނގޭވަރުގެ ގޯސްމީހެއްނޫނެވެ.
" ބޮޑުދައިތަގެ ޅީދަރިފުޅުގެ ދިރިއުޅުން ބަރުބާދުވެގެން އެދަނީ ، އަހަރެންގެ ސަބަބުންކަން ބޮޑުދައިތަގެ ހިތުގައި އޮންނާނެކަން އަހަރެންނަށް އެނގެއެވެ. އެބިރުވެރިކަން އެއީ ޖާއިޒް ކަމެއްކަންވެސް އަހަރެންނަށް އެނގެއެވެ. " މެހެމަލް ބުންޏެވެ.
ނޫނެކެވެ. ދިލްނަޝީނަކީ ވަރަށް ވިސްނުންތޫނު ކުއްޖެކެވެ. ކުލްސޫމް ހީކުރިވަރަށްވުރެ ދިލްނަޝީންގެ ވިސްނުން ތޫނެވެ. އެހާ މޮޔައެއްނޫނެވެ. ބޮޑުދައިތަގެ ހިތުގައި އޮތްއެއްޗެއް އޭނާގާތު ބުނެވިދާނެކަމަށް މެހެމަލް ބުންޏެވެ. އެކަމާ ، މެހެމަލް އެއްވެސް އެއްޗެއް ހިއެއްނުކުރާނެއެވެ.
" އަހަރެންވެސް ، މިހާރު މިމަސައްކަތްކުރަނީ ، އަހަރެންގެ ހިތުން ޙައިދަރު ފުހެލެވޭތޯއެވެ. އެއްވެސް މީހަކީ ، ގަދަކަމުން އަނެކާގެ ޙަޔާތަށް ގެނެވިދާނެ މީހެއްނޫންކަން އަހަރެންނަށްވެސް ވިސްނިއްޖެއެވެ. ލޯތްބަކީވެސް ވަގުތާއި ޙާލަތާ ގުޅިފައި އޮންނަ އެއްޗެކެވެ. ވަގުތު ފާއިތުވެއްޖެނަމަ ، ޙާލަތު ބަދަލުވެއްޖެނަމަ ، ލޯބީގެ މަތިން ހަނދާން ނައްތައިލާން ޖެހޭނެއެވެ. " ފެންކަޅިވަމުން ، މެހެމަލް ބުނަމުން ގެންދިޔައެވެ.
މިހުރިހާކަމެއް ކުރިމަތިވަމުން އެދަނީ ، މެހެމަލްގެ ސަބަބުންކަމުގައި ކުލްސޫމް ބުންޏެވެ. ދުނިޔެ ބޭނުންވެގެން ، ދުނިޔޭގެ އެދުމަށް މެހެމަލް ނުހެއްލުނުނަމަ ، ކުލްސޫމްމެންނަށް އެލިބެމުންދާ އަނިޔާއާއި ތަކުލީފެއް ނުޖެހުނީއެވެ. ޙައިދަރަށް އަދި އެއުޅެވެނީ ޙަޔާތުގައި އޭނާ އަންނަންވީ ޕޮއިންޓަށް ނާދެވިގެންނެވެ. ކުލްސޫމްގެ ދުވަސްވީ ޙަޔާތުގައި ބުރަމަސައްކަތުން ، އެންމެންވެގެން އެޅި ބިންގާ އެއޮތީ ރޫޅިފައެވެ. ބޮޑުވެގެންވާ މުޞީބާތެއް ކުރިމަތިވަމުން އަންނަ ފަދައެވެ. މެހެމަލްގެ ސަބަބުންނެވެ.
ކުމްސޫމްގެ ވާހަކަތަކުން މެހެމަލްއަށް ރޮވުނެވެ. ކުލްސޫމްގެ ހަމްދަރުދީ ހޯދައި ، ދިލްނަޝީނާމެދު ކުލްސޫމްގެ ހިތުގައި ރުޅިވެރިކަން އުފެއްދުމަށްޓަކައި ، އެއީ އޭނާއަށް ލިބޭނެ ރަނުގެ ފުރުޞަތެއްކަމުގައި މެހެމަލްއަށް ފެނުނެވެ. އޭނާއަށް މާފުކުރުމަށް ކުލްސޫމްގެ ކިބައިން މެހެމަލް އެދެމުން ގެންދިޔައެވެ. ޚުދު މެހެމަލްވެސް އެހުންނަނީ އުފަލުންނެއް ނޫނެވެ. އޭނާ އެހުރީ ދިރިދުނިޔޭގައިކަމެއް އަދި މަރުވެފައިކަމެއް ، ޚުދު މެހެމަލްއަކަށްވެސް ނޭނގެއެވެ. އެހެނަސް ، ދެން އިރާދަ ކުރެއްވިއްޔާ ހުރިހާކަމެއްވެސް ރަނގަޅުވާނެކަމުގައި މެހެމަލް ބުންޏެވެ. މެހެމަލް ނޫންކަމަށް ވަންޏާ ، ޙައިދަރުގެ ޙަޔާތަށް ބާއްޖަވެރިކަން ލިބިގެން ދާނެއެވެ. ދެމީހުންކުރެ އެކަކަށްނަމަވެސް ، އެ ފުރުޞަތު ލިބިގެން ދިއުމަކީ ، ދުރުގައިވާކަމެއްނޫންކަމަށް މެހެމަލް ބުންޏެވެ. މިހާރުގެ ޙާލަތަށް ބަލާއިރު ، އެއްވެސްމީހަކަށް ހަމަޖެހުމެއް ނެތެވެ.
ރޮމުންރޮމުން މެހެމަލް އައިސް ކުލްސޫމްގެ ކޮނޑުގައި ބޯއަޅައިލިއެވެ. ކުލްސޫމްގެ ހިތް އޭނާގެ މައްޗަށް އަނބުރައިލެވިއްޖެކަމުގެ ހިތްހަމަ ޖެހުމާއެކީގައެވެ.
ޙަމްޒާގެޔަށްގޮސް ، އެނދުމައްޗަށް ވެއްޓިފައި ލައިޓަރު ދިއްލައިގެން އޭގެ ހުޅުކޮޅަށް ބަލަހައްޓައިގެން އޮތެވެ. އެވަގުތު ، އޭނާގެ ހިތަށް އަރަމުން އެދިޔައީ ، ދިލްނަޝީން އޭނާއާ މުޚާތަބުކޮށް ދެއްކި ވާހަކަތަކެވެ. އެވާހަކަތައް ފަށްފަށްކޮށްފައި ޙަމްޒާގެ ކަންފަތްދޮށުގައި ގުގުމަމުން ދިޔައެވެ. ކުއްލިޔަކަށް ، ބުޝްރާ އައިސް ކޮޓަރިޔަށް ވަދެ ، ޙަމްޒާއަށް ގޮވައިލުމަށްފަހު ، މައްސަލަޔަކީ ކޮބައިތޯ ޙަމްޒާއާ ސުއާލު ކުރިއެވެ. މައްސަލަޔަކީ ، އޭނާގެ ޙަޔާތުގައި މިއަދު ، ދިލްނަޝީން ނެތުންކަމަށް ޙަމްޒާ ބުންޏެވެ.
" އަހަރެން މިހުންނަނީ ސަބަބެއްގެ ތެރޭގައި ބަންދު ވެފައެވެ. ޙައިދަރުގެ އެއްވެސް މައްސަލައެއް އެކައިވެނީގައި އޮތްނަމަ ، އަހަރެން ޙައިދަރު މަރައިލާނަމެވެ. އެކަމަކު ، ޙައިދަރުގެ އެއްވެސް ކުށެއްނެތެވެ. ހުރިހާވެސް ކުށެއްއޮތީ އަހަރެންގެ މައިންބަފައިންގެ ބޮލުގައި އެޅިފައެވެ. ފަހުން ކޮންމެގޮތެއްވިޔަސް ، އަހަރެން ، ޙައިދަރުގެ ދުވަސް ދުއްވައިލީމުހެވެ. އެކަމަކު ، ކުށްވެރިޔަކީ މަންމަކަން އަހަރެންގެ ހިތް އަހަރެންނަށް ހަނދާންކޮށްދޭ ކޮންމެ ފަހަރަކު ، ހިތަށް ތަދުވެގެންގޮސް ރޮވެއެވެ. " ޙަމްޒާ ބުންޏެވެ.
ކަންކަން ނިމޭނީ ، ނަޞީބުގައި ލިޔެވިފައި އޮތްގޮތަކަށެވެ. އެކަމާ ދެކޮޅު ހެދޭނެ އިންސާނަކު ނުހުންނާނެކަމަށް ބުޝްރާ ބުންޏެވެ. މަވްޟޫޢު ބަދަލުކޮށްލުމަށް ބުޝްރާ ވިސްނިއެވެ. އަދި ، ޙަމްޒާގެ ބޮޑުބޭބެ ޕާކިސްތާނަށް މިއަދު އަންނާނެވާހަކަ ބުޝްރާ ބުންޏެވެ. ބޭބެގެ ވިސްނުމުގައި އޮތްގޮތުން އަފްސިޔާ މިހާރުހުރީ ފިރިފުރާވަރަށް އަޅާފައެވެ. ޙަމްޒާއާ އަފްސިޔާގެ ކައިވެންޏާ ބެހޭގޮތުން ވާހަކަ ދައްކަން ބޭބެ ބޭނުން ވެއެވެ. އެމެރިކާގައި ދިރިއުޅޭކަށް އަފްސިޔާ ބޭނުމެއްނޫނެވެ. އޭނާ ބޭނުންވަނީ ، ޕާކިސްތާނަށް އައިސް ޕާކިސްތާނުގައި ދިރިއުޅުމަށެވެ. ބޭބެގެ ވިސްނުމުގައި ޙަމްޒާގެ ކައިވެނީގެ އުއްމީދުއޮތް އެންމެ ބޮޑު ސަބަބަކީ އެއީކަމަށް ވެދާނެއެވެ. ކައިވެނީގެ ވާހަކަ ބުޝްރާއަށް ނުބުނެވިގެން އުޅެނިކޮށް ، އޭނާ ކައިވެންޏެއްކުރަން ބޭނުންނުވާކަމުގައި ޙަމްޒާ ބުންޏެވެ.
" މިހާރު ކައިވެނިކުރާނެކަމެއް ނެތެވެ. ދެކުދިން އިހަށް ވާހަކަ ދައްކާލައި ، ހަމަޖެހިލައިގެން ކައިވެނީގެ ވާހަކަ ދައްކާނީއެވެ. އެމީހުން ތިބޭނީވެސް މިގޭގައެވެ. އެހެން ގެޔެއް ހޯދައިގެން އެގެޔަށް ބަދަލު ވެވެންދެނެވެ. " ބުޝްރާ ބުންޏެވެ.
ހެނދުނުގެ ފްލައިޓުން ޙައިދަރު ކަރާޗީއަށް އައިސް ގެޔަށް ވަތްތަނުން ، މުޅިގޭތެރެއިން މާމަލުގެ ގުލްދަސްތާތައް ފެނި ، ޙައިރާންވިއެވެ. އެ މާބޮނޑިތަކަކީ ، ދިލްނަޝީނަށް ކޮންމެވެސް މީހަކު ފޮނުވި އެއްޗެކެވެ. އެއިން އެއްވެސް މާބޮނޑިއެއްގައި ފޮނުވިމީހެއްގެ ނަންޖަހާފައެއް ނެތެވެ. ދިލްނަޝީން ހީކުރީ އެއީ ، އޭނާ ހައްދައިލުމަށްޓަކައި ޙައިދަރު ފޮނުވި މާބޮނޑިތަކެއް ކަމުގައެވެ. ދިލްނަޝީނަކަށް ޙައިދަރު އެއިން މާބޮނޑިއެއް ނުފޮނުވައެވެ. އެހިސާބުން މުޅިގޭތެރެ ހޫނުވެގެން ދިޔައެވެ.
އެއީ ކާކު ފޮނުވި މާބޮނޑިތަކެއްތޯ ޙައިދަރު ސުއާލުކުރިއެވެ. އޭނާބެލީ އެއީ ޙައިދަރު ފޮނުވި މާބޮނޑިތަކެއްކަމަށް ކަމުގައި ދިލްނަޝީން ބުންޏެވެ.
" އެވާނީ ޙަމްޒާ ފޮނުވި މާބޮނޑިތަކެއްކަމަށެވެ. އަހަރެން ރަށުން ފުރައިގެންދިޔަތަނުން ޙަމްޒާއާ ވާހަކަ ދައްކަން ފެށީދޯއެވެ ؟ " ޙައިދަރު ދިލްނަޝީނާ ދިމާލަށް ހަޅޭއްލަވައިގަތެވެ.
ކުލްސޫމްވެސް ، ދިލްނަޝީނާ ދިމާލަށް އެއްޗެތިކިޔަން ފެއްޓިއެވެ. ހަމައެކަނި އަނގައިން ނުބުނެހުރީ މެހެމަލްއެވެ. އެއީ ކާކު ފޮނުވި އެއްޗެއްތޯ އަހައި ، ﷲ އަށްޓަކައި އެމީހެއްގެ ނަންބުނާށޭ ބުނެ އަނެއްކާ ވެސް ދިލްނަޝީނާ ދިމާލަށް ޙައިދަރު ހަޅޭއްލަވައިގަތެވެ. އަދި ، ދިލްނަޝީންގެ އަތުގައި ބާރަށް ހިފެހެއްޓިއެވެ. ދިލްނަޝީން ، ޙައިދަރުގެ އަތް ފޮޅުވައިލިއެވެ.
" އަޑުއަހަން ބޭނުންވަނީ ކޮންވާހަކައެއް ހެއްޔެވެ ؟ ބުނަންވީ ކީކޭ ހެއްޔެވެ ؟ އަހަރެންގެ އަމިއްލަ ނަފްސަށް ޔަޤީންކަން ދީ ، އެއްވާހަކައެއް ބުނެބުނެ ވަރުބަލި ވެއްޖެއެވެ. އެކަމަކު އެއްވެސްމީހަކަށް އަހަރެންގެ ވާހަކަ ޤަބޫލެއް ނުކުރެވެއެވެ. ޙައިދަރުމެންނަށް ހީވާގޮތުގައި ، އަހަރެން ފިރިހެނަކާ ގުޅުން އެބަ ބާއްވައެވެ. އެންމެ ރަނގަޅެވެ. އާނއެކެވެ. ގުޅުމެއް އެބަ ބާއްވަމެވެ. ދެން ، ޙައިދަރުކުރާނީ ކީއްހެއްޔެވެ ؟ " ކުލްސޫމް ބުންޏެވެ.
ފިރިމީހާއާ ވާހަކަ ތިދައްކަނީ ކޮން ކަހަލަގޮތަކަށް ހެއްޔޭ ބުނެ ، ކުލްސޫމްވެސް ދިލްނަޝީނާ ދިމާލަށް ހަޅޭއްލަވައިގަތެވެ. އެހެންކަމަށް ވަންޏާ ، އޭނާ ވާހަކަ ދައްކަންވީ ކޮން ބަހުރުވަޔަކުންތޯ ، ދިލްނަޝީން ، ކުލްސޫމާ ސުއާލު ކުރިއެވެ.
" ކަލޭމެން އެންމެން އަބަދު އަބަދު އަހަރެންގެ އަބުރާއި ޢިއްޒަތަށް އަރައިގަނެ ، ކިތަންމެ ވާހަކައެއް ދެއްކިޔަސް އެންމެ ރަނގަޅު ހެއްޔެވެ ؟ އަހަރެން އެއްވެސް އެއްޗެކޭ ނުބުނެ ހުންނަންވީ ހެއްޔެވެ ؟ އެއީ އިންސާފެއްނޫނެވެ. އަހަރެންނަކަށް އެއްވެސް ސުއާލެއް ނުކުރެވޭނެއެވެ. އެހެން ނޫންހެއްޔެވެ ؟ ލޯބިވެރިޔާ ގޭގައި ބަހައްޓައިގެން ، އަހަރެންގެ ލޯކުރިމަތީ ޙައިދަރު ކިތަންމެ ނާޗަރަގީއެއް ކުޅުނަސް އެއީ މައްސަލައެއްނޫނެވެ. ދެމީހުން އެކަނި ބައްދަލުވެސް ކުރަނީއެވެ. ދެމީހުން އެކީ ތަންތަނަށްވެސް ދަނީއެވެ. ކުރީގެ ހަނދާންތައް އާކޮށް ، އެކަކު އަނެކަކަށް ލޯބީގެ ޖަޒުބާތުގައި އޮޔާދަނީއެވެ. އެއިންކަމަކާ އެއްވެސް މީހަކު ސުއާލެއް ނުކުރެއެވެ. އެކަމަކު ، އަހަރެންނާމެދު އުފެދިފައިއޮތް ޝައްކެއްގެ މައްޗަށް ކޮންމެ މީހަކު ވަކިވަކިން ޙުކުމް އިއްވަނީއެވެ. އެއީ ކީއްވެ ހެއްޔެވެ ؟ ޙައިދަރަކީ ފިރިހެނަކަށްވާތީ ހެއްޔެވެ ؟ " ދިލްނަޝީން ބުނަމުން ގެންދިޔައެވެ.
ދިލްނަޝީން މިހާރު ތިޔަ އިމުން ބޭރުވަނީއޭ ބުނެ ، ޙައިދަރު އަނެއްކާވެސް ހަޅޭއްލަވައިގަތެވެ. އަދި ދިލްނަޝީންވެސް ، އޭނާއަށް ކުރަންޖެހޭ އިތުބާރުން ، ޙައިދަރުއެހުރީ އިމުންބޭރުވެފައި ކަމަށްބުނެ ، ޙައިދަރާ ދިމާލަށް އަޑުގަދަ ކޮށްލިއެވެ. އަދި އިތުރަށް އެތަނުގައި މަޑުކުރަން ނުހަދައި ، މައްޗަށް އަރައިގެން ދިޔައެވެ. ( ނުނިމޭ )
