މާލެ ސިޓީގެ މަގުތަކުގައި ހުންނަ ގަސް ކެނޑުމަކީ މާލެ ސިޓީ ކައުންސިލުން ކުރާކަމެއް ނޫން ކަމަށް މޭޔަރ އާދަމް ޢާޒިމް ވިދާޅުވެއްޖެއެވެ.
މޭޔަރ ޢާޒިމް މި ފަދައިން ވިދާޅުވި ސޮސައިޓީ ފޯރ ހެލްތް އެޑިއުކޭޝަން (ޝީ) އާއި މާލެ ސިޓީ ކައުންސިލް އަދި މާލެ ސިޓީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީ (ޑަބްލިޔުޑީސީ) އާ ގުޅިގެން، ބުރާސްފަތި ދުވަހުގެ ހަވީރު ރަސްފަންނުގައި ފެށި "އަންބަލަން" ހަރާކާތް ފެށުމުގެ ގޮތުން ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މޭޔަރ ޢާޒިމް ވިދާޅުވީ މާލޭ ސިޓީ ކައުންސިލުން މަސައްކަތް ކުރަމުން ގެންދަނީ، ރައްޔިތުންގެ އެކިއެކި ބޭނުންތައް ފުއްދައިދިނުމަށް ކަމަށާއި މި ގޮތުން މާލޭގެ މަގުމަތީގައި ހުންނަ ގަސްތައް ބެލެހެއްޓުމުގެ މަސައްކަތް ކުރުމަކީ މި އިދާރާގެ މުހުންމު މަސައްކަތެއް ކަމަށެވެ. އެހެން ނަމަވެސް، ގަސް އުފުރާލުމާއި ގަސްތައް ކެނޑުމުގެ މަސައްކަތަކީ ކައުންސިލުން ކުރުމަށް ގަސްތުކުރާ ނުވަތަ ބޭނުންވާ ކަމެއް ނޫން ކަމަށް ވެސް މޭޔަރ ޢާޒިމް ވިދާޅުވި އެވެ.
ގަސްތަކުގެ ގޮފިތައް ކެނޑުމާއި ގަސް ކޮށުމަކީ މި ކައުންސިލުގެ ޒިންމާތަކުގެ ތެރޭގައި ހިމެނޭ ކަމެއްކަން ފާހަގަ ކުރައްވާ މޭޔަރ ޢާޒިމް ވިދާޅުވީ ގިނަ ފަހަރަށް ރައްޔިތުން މި އިދާރާއަށް ޝަކުވާ ހުށަހަޅަމުންދަނީ، މަގުމަތީގައި ހުންނަ ގަސްތަކުގެ ގޮފިތަކުން ދިމާވާ އުނދަގޫތައް ހައްލުކޮށްދިނުމަށް ކަމަށެވެ. އެ ފަދަ ހާލަތްތަކުގައި ކައުންސިލުން އެކަން ހައްލުކޮށްދެއެއް ވާނެ ކަމަށް ވެސް މޭޔަރ ޢާޒިމް ވިދާޅުވި އެވެ.
މީގެ އިތުރުން މޭޔަރ ޢާޒިމް ވިދާޅުވީ ބައެއް ފަހަރަށް ބޮޑެތި ގަސްތައް ހެދިފައި ހުންނަ ގޮތުން ރައްޔިތުންގެ މުދަލަށާއި ބައެއް ގޭގޭގެ ގޯތި ތެރެއަށް ގަހުގެ ފަތް އެޅި، ގަހުގެ މޫތަކުން ޕޭމަންޓު ގާތަށް ވެސް އުފުލި، ގަލުގައި އަޅައިގަނެ ވެއްޓި ގިނަ ބަޔަކަށް އަނިޔާވަމުން އަންނަ ކަމަށާއި ގަހުގެ ގޮފިތަކުން ގޭގެއަށް މީދަލާއި ދިރޭ ތަކެތި ވަންނަ ކަމުގެ ޝަކުވާތައް ވެސް ލިބެމުން އަންނަ ކަމަށެވެ. އަދި މަގުތަކުން ދަތުރުކުރާ، ބޮޑެތި ހެވީ ވެހިކަލްތައް ގަސްތަކުގެ ގޮފިތަކުގައި އަޅައިގަނެ، އެ އުޅަނދުތައް ދަރުތުކުރަން ދަތިވެ ގަހަށާއި އުޅަންދަށް ގެއްލުން ލިބި އެ ފަރާތްތަކުގެ ޝަކުވާތައް ވެސް ލިބޭ ކަމަށް ވެސް މޭޔަރ ޢާޒިމް ވިދާޅުވި އެވެ.
