ރައްޔިތުންގެ މަޖިލީހުގެ ދިއްގަރުދާއިރާގެ މެންބަރު އަހުމަދު ފާރިސް މައުމޫން ފުލުހުންގެ ބަންދުގައި ހުންނަވާތާ 20 ދުވަސްވީއިރުވެސް ފުލުހުން ސުވާލެއް ނުކުރައްވާ ކަމަށް އޭނާގެ ވަކީލުން ވިދާޅުވެއްޖެއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި އޭނާގެ ވަކީލުން ވިދާޅުވީ މީކުރިން އޭނާއާ ސުވާލުކުރީ ރިޝްވަތުދިނުމާއި ސަރުކާރު ވައްޓާލަން އުޅުނުކަމުގެ ތުހުމަތުގައި ކަމަށެވެ. އެހެންނަމަވެސް މިފަހަރު ހައްޔަރުކޮށްފައިވަނީ އެހެން ކަމެއްގައެވެ. އެކަމަކު ސުވާލެއްވެސް ނުކުރައްވާ ކަމަށް ވިދާޅުވިއެވެ.
ފާރިސްގެ އިތުރަށް ރައީސް މައުމޫންގެ ދަނބިދަރިކަލުން މުހައްމަދު ނަދީމް ބަންދުކޮށްފައިވާތާ 23 ދުވަސްވީއިރުވެސް އޭނާއާ ވެސް ސުވާލެއް ނުކުރައްވާ ކަމަށެވެ. އެބޭފުޅުން ބަންދުގައި ތިއްބެވިއިރު އަސާސީ ހައްގުތަކުން މަހުރޫމްވެފައިވާ ކަމަށް ދެބޭފުޅުންވެސް ވިދާޅުވި ކަމަށް ވަކީލުން ވިދާޅުވިއެވެ. އެބޭފުޅުންގެ ބޭސްފަރުވާގެ ކަންކަންވެސް ހަމަނުޖެހޭ ކަމަށް އެބޭފުޅުންނާ ހަވާލާ ދެއްވައި ވަކީލުން ވިދާޅުވިއެވެ. އޭގެ އިތުރަށް އެދެބޭފުޅުން ތިއްބެވީ އިންސާނުން ބައިތިއްބަން އެކަށީގެންވާ ތަނެއްގައި ނޫންކަމަށް ދެބޭފުޅުންވެސް ވިދާޅުވެފައިވާ ކަމަށް ވަކީލުން ވިދާޅުވިއެވެ.
