ޔޫރަޕިއަން ޔޫނިއަން (އީޔޫ) އިން ރާއްޖެއާމެދު އަޅައިފާނެ ފިޔަވަޅަކާމެދު ވިސްނާ އެއްވެސް ބޭންކަކުން ރާއްޖޭގައި ދެން އިންވެސްޓެއް ނުކުރާނެ ކަމަށް ރާއްޖޭގެ ކުރީގެ ފޮރިން މިނިސްޓަރު އަދި ރައްޔިތުންގެ މަޖިލީހުގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އޭނާ މިހެން ވިދާޅުވީ ޔޫރަޕިއަން ކައުންސިލުން ރާއްޖެއާމެދު މިއަދު ނިންމެވި ގޮތްތަކާ ބެހޭގޮތުން އިދިކޮޅު ފަރާތްތަކުން ދެންމެ ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުންނެވެ.
"ޔޫރަޕްގެ އިއްތިހާދުން ކިހާވަރެއްގެ ފިޔަވަޅުތަކެއްތޯ ރާއްޖެއާމެދު އަޅާނީ ވިސްނަމުން ގެންދާ އެއްވެސް ބޭންކަކުން އެއްވެސް އިންވެސްޓަރަކު މިރާއްޖެއަށް މިހާރު އިންވެސްޓެއް ނުކުރާނެ. އޭގެ އަސަރު ރާއްޖެއަށް ފެނިގެންދާނެ،" ޝާހިދު ވިދާޅުވިއެވެ.
ޝާހިދު ވިދާޅުވީ ޔޫރަޕިއަން ކައުންސިލުން މިއަދު އެނިންމި ގޮތަށް ރާއްޖޭގެ ވަކިވަކި ފަރުދުންނާމެދުވެސް ފިޔަވަޅު އެޅުމަކީ ކަންބޮޑުވާ ކަމެއް ކަމަށެވެ. "މި ޖަރީމާ ހިންގުމުގައި އިސްވެތިބި މީހުންގެ މައްޗަށް ފިޔަވަޅު އަޅާފާނެ ކަމަށް ޔޫރަޕިއަން ޔޫނިއަން ކައުންސިލުން ބުނުމުން އެއިން އަޅުގަނޑުމެންނަށް ދޭހަކޮށްދެނީ ޔޫރަޕުގެ އިންވެސްޓަރުން ޔޫރަޕްގެ ބޭންކުތަކާއި ޔޫރަޕުން މިހާރު ރާއްޖެއަށް ދަތުރުކުރަން ވިސްނަމުންދާ ފަތުރުވެރިންނަށް މީގެ އަސަރުކުރާންނެކަން،" އޭނާ ވިދާޅުވިއެވެ.
ރާއްޖޭގައި މިހާރު ހިނގަމުންދާ ކަންކަން ހިންގުމުގައި އިސްވެތިބި މީހުންނާ ދެކޮޅަށް ފިޔަވަޅު އަޅައިފާނެ ކަމުގެ އިންޒާރު ޔޫރަޕް އިއްތިހާދުގެ ކައުންސިލުން ދިނުމަކީވެސް އޭގެ ޒާތުގައި ވަރަށް ހަރުކަށި ފިޔަވަޅެއް ކަމަށް ޝާހިދު ވިދާޅުވިއެވެ. އޭގެ ނަތީޖާ ރައްޔިތުންނަށާއި، ރާއްޖެއަށް ނުރަނގަޅު ގޮތުގައި ފޯރައިފާނެ ކަމަށްވެސް އޭނާ ވިދާޅުވިއެވެ.
އޭނާ ވިދާޅުވީ ރާއްޖޭގެ ފަތުރުވެރިކަމުގެ އެންމެބޮޑު ހިއްސާއެއް އަދިވެސްކުރާ ފަރާތަކީ ޔޫރަޕާއި، ޔޫރަޕް އިއްތިހާދުގެ ގައުމުތައް ކަމަށެވެ. އެގައުމުތަކުން ރާއްޖެއަށް އަންނަ މީހުންގެ ނިސްބަތް އެހެންހުރިހާ ފަރާތްތަކަށްވުރެ އަދިވެސް ގިނަ ކަމަށް އޭނާ ވިދާޅުވިއެވެ.
"ހަމައެއާއެކު ޔޫރަޕްގެ ބޭންކުތަކުން ރާއްޖޭގައި އިންވެސްޓް ކޮށްފައިވާ އިންވެސްޓްތައްވެސް، ރާއްޖޭގައި ރިސޯޓުތައް ހިންގާ ހިންގުންވެސް، ރާއްޖޭގައި ޓުއައޮޕަރޭޓަރުންގެ ގޮތުގައި މަސައްކަތްކުރާ ފަރާތްތައްވެސް މަދެއްނޫން. އަދި ރާއްޖެއަށް ދަތުރުކުރާ ޔޫރަޕްގެ ފުލައިޓުތައްވެސް މަދެއްނޫން. މިހިރަމިހިރަ ކަންތައްތައް މިހެން ހުއްޓައި މިފަދަ ނިންމުމެއް ޔޫރަޕްގެ އެންމެމަތީ ކައުންސލުން ނިންމީމާ އެއީ އަޅުގަނޑުމެން ކަންބޮޑުވާންޖެހޭ ކަމެއް،" ޝާހިދު ވިދާޅުވިއެވެ.
މިކަލޭގެ ވާނެ އެލުވަން