( 29 ޑިސެމްބަރ 2024 ގައި ޝާއިޢުކުރި ބަޔާގުޅޭ )
(މެހެމަލްގާތު ، އެކަހަލަ ވާހަކައެއް ޙައިދަރެއް ނުދައްކައެވެ. އެހެނަސް ، ޙައިދަރު ދެންމެ އެބުނި ވާހަކައިގެ މާނަ ، މެހެމަލް ނެގީ އެގޮތަށެވެ. ޙައިދަރު އެއުޅެނީ ، އޭނާގެ ހިތުގައިވާ އެއްޗެއް ސާފުކޮށް ބުނަން ނުކެރިގެންނެވެ. ނޫނީ ބުނަން ނޭނގިގެންނެވެ. މެހެމަލްގެ ލޯބި ، ޙައިދަރުގެ ހިތުން ނެރެ ބޭރުކޮށްލުމަކީ ، ޙައިދަރަށް ކުރެވޭނެ ކަމެއްނޫންކަން ، މެހެމަލްއަށް އެނގެއެވެ.)
ކޯޓުގެ މަސައްކަތް ނިންމާފައި ޙައިދަރާއި މެހެމަލްއާ ދެމީހުން ގެޔަށް އައިސް ވަތްތަނުން ، މެހެމަލް ވާހަކަ ދައްކަން ހަދައިގެން ޙައިދަރަކަށް އެހެންކަމެއް ކުރެވޭގޮތެއް ނުވިއެވެ. އޮފީހަށްދާން ޖެހިގެން ލެޕްޓޮޕް ނަގަން ކޮޓަރިޔަށްވެސް ފޮނުވަންޖެހުނީ ނޯކަރެކެވެ. ނޯކަރަށް އެކަން ކުރަން ނުކެރިގެން ، ކުލްސޫމްގާތު ބުނުމާއެކީ ، ޢީޝަލްވެސް ގޮވައިގެން ކުލްސޫމް ތިރިޔަށް އައެވެ.
ކުލްސޫމަށް ފެނުނުއިރު ، ޙައިދަރާއި މެހެމަލްތިބީ ވަރަށް ގައިގޯޅި ކޮށެވެ. ޢީޝަލްގާތު މަންމަގާތަށް ދާށޭ ބުނެ ، މެހެމަލް އަށް ކުލްސޫމް ގޮވައިލިއެވެ.
" ކުލްސޫމްގެ ދަރިފުޅާ ޙަވާލުވެފަ ، އަހަރެންގެ ދަރިފުޅު މިނިވަންކޮށްދޭށެވެ. " ކުލްސޫމް ބުންޏެވެ.
ޙައިދަރު ދެން އެއުޅެނީ ކީއްކުރަންތޯ ކުލްސޫމް ސުއާލު ކުރިއެވެ. ޙައިދަރަށް އޮފީހުން ގުޅާފަ ، މުހިންމުކަމެއްގަ އޮފީހަށް އައިސްދިނުމަށް އެބުނީ ހަމަ ދެންމެއެވެ. އެހެންނަމަވެސް ، މެންދުރުފަހަށް އެޅީމަ ދެން އޮފީހަށްދާނެކަމެއް ނެތްކަމަށް ކުލްސޫމް ބުންޏެވެ. އަދި ، ދިލްނަޝީން ގޮވައިގެން ބާޒާރަށް ދާން އެންގިއެވެ.
ޙައިދަރު ހެނދުނު ގެއިން ނުކުމެގެން ދިޔައީ ދިލްނަޝީން ރުޅިއަރުވައިލާފައެވެ. އެހެންވީމާ ، ދިލްނަޝީނެއް މިއަދަކު އޭނާއާއެކީ ބާޒާރަށް ދާކަށް އެއްބަހެއް ނުވާނެއެވެ. އެހެނަސް ، ކުލްސޫމް އެއައީ ދިލްނަޝީންގާތު ތައްޔާރުވާން ބުނެފައެވެ. ޙައިދަރާއެކީ ބާޒާރަށް ދާށެވެ. ދިލްނަޝީން ދާނެކަންވެސް ނުވަތަ ނުދާނެކަންވެސް އެނގޭނީ އޭނާގާތު އެހީމާ ނޫންހެއްޔެވެ ؟ ފިރިމީހާ ބާޒާރަށް ގެންދަން ހުރިއްޔާ އެކަމަށް އެއްބަސް ނުވާނީ ކޮންއަންހެނެއްތޯ އަހައި ، މެހެމަލް އަށް ދޯ އެއްލިއެވެ. މެހެމަލްވެސް ނުބުނަން ހުރެފައި އާނއެކޭ ބުނެ އެކަމަށް އެއްބަސް ވިއެވެ.
ޙައިދަރު ކޮޓަރިޔަށް އައިސް ވަތްއިރު ، ދިލްނަޝީން ހުރީ ރީތިވާށެވެ. މަންމަ އެބުނީ ރަނގަޅު ވާހަކައެކެވެ. މަޑުމަޑުން އައިސް ، ދިލްނަޝީނާ ގާތަށް ޖެހިލައި ތަނަކަށްދާން ތައްޔާރުވަނީތޯ ޙައިދަރު ސުއާލު ކުރިއެވެ. ދިލްނަޝީންވެސް ، އޭނާ އެ ތައްޔާރުވަނީ ތަނަކަށްދާން ކަމަށް އެއްބަސްވިއެވެ.
" ކާކާ އެކުގައި ހެއްޔެވެ ؟ " ޙައިދަރު ، ދިލްނަޝީނާ އިހުނަށްވުރެ ގާތަށް ޖެހިލަމުން ސުއާލު ކުރިއެވެ.
ދިލްނަޝީން ބާޒާރަށް އެކުގައިދާން މީހަކު އެބަހުރިކަމަށް ބުންޏެވެ. ޙައިދަރުގެ ހިތްތަޅުވައިލުމަށްފަހު ، އެއީ އޭނާގެ ރަޙުމަތްތެރިޔާކަމުގައި ދިލްނަޝީން ބުނުމާއެކީ ، ޙައިދަރުގެ ހިތަށް ތަދެއް އިޙްސާސްވިއެވެ. ފަހަތަށް އެނބުރިލައި ހިނގައިގަތެވެ. ދިލްނަސީނަށް އެކަން ނޯޓިސް ކުރެވުމާއެކު ، އޭނާ ސަމާސާ ކޮށްލީކަމަށް ބުންޏެވެ.
" ސަމާސާ އަކަށް ކަމަށްވިޔަސް ، ގާތް ރަޙުމަތްތެރިޔަކު ކަމަށްވިޔަސް ، އެހެން ފިރިހެނަކު ދިލްނަޝީނާއެކީ ހުރުމަކީ އަހަރެންނަށް ބަރުދާސްތު ކުރެވޭނެކަމެއް ނޫނެވެ. ތިކަހަލަ ވާހަކައިން އަހަރެންގެ ލޭ ކެކި އުތުރިގެން ދާނެއެވެ. " ޙައިދަރު ބުންޏެވެ.
ދިލްނަޝީނާ ގާތަށް ޖެހިލައި ، ކަންބޮޑުވަނީ ކޮންކަމަކާތޯ ޙައިދަރު ސުއާލު ކުރިއެވެ. ފިރިހެނުންގެ ލޯތްބަކީ ހާދަ ފާޑެއްގެ އެއްޗެކެވެ. ވިސްނާނީ އެމީހުން ބޭނުންވާ ގޮތަކަށެވެ. އެހެންމީހުންގެ ފިކުރާއި ޚިޔާލާތަކީ ފިރިހެނުންގެ ހިތުގައި އޮންނަ އެއްޗެއްނޫނެވެ. އެ މިނިވަންކަން ފިރިހެނުންނަށް ލިބިގެން ވެއެވެ. އެހެންކަމާއެކުވެސް ، އަނބިމީހާގެ ވިސްނުމާއި ޖަޒުބާތު ކޮންޓްރޯލް ކުރަން އެހާ ފޯރި ހުންނާނެއެވެ. ދިލްނަޝީން އޭނާގެ ވިސްނުންހުރިގޮތް ބުނެލިއެވެ. އެހެނަސް ، އޭނާހުރީ ކަންބޮޑުވެފައެވެ. ދިލްނަޝީނަށް ސަމާސާއަކަށް އެބުނެވުނު އެއްޗަކުން ، ޙައިދަރަށް ކުރި އަސަރު ފެނިފައެވެ.
އިންސާނާ މަގުން ކައްސާލަނީވެސް އަދި ސީދާކުރަނީވެސް ހަމަ އެ އިންސާނާގެ ވިސްނުމުންކަމުގައި ޙައިދަރު ބުންޏެވެ. އަދި ، ދިލްނަޝީނުގެ ވިސްނުމަކީ ، ދިލްނަޝީންފަދަ ސާފުސީދާ އެއްޗެއްކަން ޙައިދަރަށް އެނގޭކަމަށް ބުންޏެވެ. އެކަން އޭނާ ހިތުގެ އަޑިން ޤަބޫލުވެސް ކުރެއެވެ. ޙައިދަރު ، ވާހަކަ ދައްކަމުންދިޔައިރު ، ދިލްނަޝީންގެ ކަރުގައިއަޅާ ހާރު އަތުލާފައި ދިލްނަޝީންގެ ކަރުގައި އަޅުވައިދިނެވެ. އަދި އެދެމީހުން ހައްދަވާފައިވަނީ އެކަކު އަނެކަކަށްކަމުގައި ބުނެ ، ނިކަން ލޯބިން ދިލްނަޝީންގެ ގައިގާ ބައްދާލިއެވެ. ދިލްނަޝީނަށް ހުރެވުނީ ލޯގަނޑާދިމާލަށް ބަލަހައްޓައިގެން ، ޚިޔާލެއްގެ ތެރެޔަށް ގެއްލިފައެވެ. އެ ޚިޔާލުތައް ގޮސް ގުޅެނީ ޙަމްޒާއާކަމެއް ޚުދު ، ދިލްނަޝީނަކަށްވެސް ނޭނގެއެވެ. ހާރު އަޅުވައިދިނުމަށްފަހު ބޭރަށްދާން ތައްޔާރުވެލަން ޙައިދަރު ދިޔައިރުވެސް ދިލްނަޝީނަށް ހުރެވުނީ ، ކުރިން އޭނާގެ ހިތަށް އަރަމުންދިޔަ ހަނދާންތަކަށް ގެއްލިފައެވެ.
ބާޒާރަށްދާން ނުކުތުމަށްފަހު ، ތަންކޮޅަކަށް ދުއްވާލިއިރަށް ، ދިލްނަޝީންގެ ވިސްނުން ބަދަލު ވެއްޖެއެވެ. އޭނާ ދާން ބޭނުންވީ މަންމަގެ ގެޔަށެވެ. ޙައިދަރުވެސް ހުރީ އެގެޔަށް ދާން ބޭނުންވެފައެވެ. ދިލްނަޝީންގެ މަންމަގެ އަތުން ސައިބޯން އެގެޔަށް އަންނާނެ ވާހަކަ ، އެންމެ ފަހުން ޙައިދަރު އެގެޔަށް ދިޔަދުވަހު ، އަނީސާގާތު އޮތީ ބުނެފައެވެ. އެހެންނަމަވެސް ، ޙައިދަރު ބޭނުންވީ ކޮންމެވެސް ވަރަކަށް ބާޒާރުކޮށްލާފައި އެގެޔަށް ދާށެވެ. ދިލްނަޝީނާއެކީ ބާޒާރަށް ގޮސްލުމަކީ ، ޙައިދަރު ބޭނުންވެފައިހުރި ކަމެއްނަމަވެސް ، އަދި އެ ފުރުޞަތު ތަނަވަސްނުވާތީ އެކަންވެސް ދޫކޮށްލާކަށް ޙައިދަރު ބޭނުމެއް ނޫނެވެ.
ގޭގެ ރަނގަބީލު ވުމާއެކީ ، އިރާކޮޅު އެގެޔަށް އަންނާނީ ކާކުހެއްޔޭ ކިޔަމުން ، އައްވަލްގޮސް ދޮރިހުޅުވައިލިއެވެ. އައްވަލް ދިޔައީ ، ކާގަޑީގައި މީހަކު އައިމަ ކުދިކިޔަމުންނެވެ. ދޮރުހުޅުވާލިއިރު ، ކުރިމަތީގައި އެތިބީ ދިލްމަޝީންގެ ދެމަފިރިންނެވެ.
އެކަކު އަނެކަކަށް ސަލާމް ކޮށްލުމަށްފަހު ، ކާގަޑީގައި އެމީހުން އައީތީ އަނީސާހުރި ވަރަށް އުފާވެފައެވެ. އަދި ކާން އިށީނުމަށް ޙައިދަރުގާތު ބުންޏެވެ. އެހެންނަމަވެސް ، ދިލްނަޝީން ބޭނުންވީ ގެޔަށްގޮސް މަންމަމެންނާއެކީ ކާށެވެ. އަނީސާވެސް އޭނާގެ ގޮތްދުލެއް ނުކުރިއެވެ. އެގެޔަށް އައިސް ކާގަޑީގައި ކާންނުދީ އެމީހުން ފޮނުވައިލާކަށް އަނީސާ ހިތްހަމައެއް ނުޖެހުނެވެ. އެންމެފަހުން ދިލްނަޝީނާއި ޙައިދަރަށް މަޖުބޫރުވީ ކާން އިށީންނާށެވެ.
ޙައިދަރަށް ރަނގަޅަށް އިށީނދެނުލެވިގެން އުޅެނިކޮށް ފޯނެއް އައެވެ. އެއީ މަންމަގެ ފޯނެއްކަމަށް ވާތީ ފޯނު ނުނަގައެއް ނުކެރުނެވެ. ކުލްސޫމް ބޭނުންވީ ، ޙައިދަރުމެން އުޅޭހިސާބެއް ބަލައިލާށެވެ. ދިލްނަޝީންމެންގެޔަށް އައިތަނުން ، ދިލްނަޝީންގެ މަންމަ ކުރުނުކޮށްގެން އެމީހުން އެތިބީ އެގޭގައި ކާންކަމަށް ޙައިދަރު ބުންޏެވެ. އަދި އެމީހުންނަށް މަޑުނުކޮށް މަންމަ ކެއުމަށްވެސް ޙައިދަރު ބުންޏެވެ. ކުލްސޫމްގެ ހިތަށް ވަރަށްބޮޑު ހަމަޖެހުމެއް ލިބުނެވެ. އެއީ އޭނާއެދޭ މަގުން ކަންކަން ފުރިހަމަވަމުންދާހެން ހީވާތީއެވެ.
އަނެއްކޮޅުން ، ޙައިދަރުމެންގޭގައި ، ރޭގަނޑުގެ ކެއުންތައްޔާރު ކުރުމަށްޓަކައި ، މޭޒުދޮށުގައި މިރޭ އުޅެނީ މެހެމަލް އެވެ. މެހެމަލް ބޭނުންވީ ޙައިދަރު އަންނަންވާއިރަށް ، ކެއުން ތައްޔާރުކޮށް ، އޭނާވެސް ރީތިވެ ، ތައްޔާރުވެލައިގެން ހުރުމަށެވެ.
ކާންހަދައިގެން ގަޑިޔަށް ބަލަމުން މެހެމަލް ދެކޮޅަށް ހިނގާލަހިނގާލަ ހުއްޓާ ، ޙައިދަރުމެން ގެޔަށް އައެވެ. މެހެމަލް އެހުންނަނީ ކެއުން ތައްޔާރުކޮށްގެން ހައިދަރުގެ އިންތިޒާރުގައިކަމަށް މެހެމަލް ބުންޏެވެ. އެހެނަސް ، އެމީހުން އެއައީ ބޭރުން ކައިގެންކަމަށް ޙައިދަރު ބުނުމާއެކީ މެހެމަލް ދިޔައީ މިލާމޯޅި ވެގެންނެވެ. ވީ ރަކިން ، އިތުރަށް ބުނާނެ އެއްޗެއް މެހެމަލްއަކަށް ނުވިސްނުނެވެ. މެހެމަލް ދެރަވެފައިހުރިތަން ފެނިފައި ޙައިދަރަށް ހިނގައިގަންނަން ނޭނގިފައި ހުއްޓެވެ، އެކަމަކު ، ޙައިދަރުގެ އަތުގައި ހިފައި ދިލްނަޝީން އޭނާ މައްޗަށް ގެންދިޔައެވެ. ދިލްނަޝީންހުރީ ، މަލާމާތުގެ ހިނިތުންވުމަކުން މެހެމަލްއާ ދިމާލަށް ބަލަހައްޓައިގެންނެވެ.
ކާއެއްޗެތިތައް ނަގަން ނޯކަރުގާތު ބުނެ ، މެހެމަލްވެސް ނުކައި އޭނާގެ ކޮޓަރިޔަށް ދިޔައެވެ. ކޮޓަރިޔަށްގޮސް މެހެމަލްއަކަށް ހިމޭނަކުން ނުއިނދެވުނެވެ. ނޭނގިނަމަވެސް މެހެމަލްއަށް އެ އިންތިޒާރު ކުރެވެނީ ، މެހެމަލްގާތަށް ، އެކޮޓަރިޔަށް ޙައިދަރު އަންނާނެ ވަގުތަކަށެވެ. އޭނާ ކާންހެދީމަ ޙައިދަރަށް ނުކެވިގެން މެހެމަލް ދެރަވާނެތީ ، އެކަމަށް މަޢާފަށް އެދެން ޙައިދަރު އަންނާނެކަމަށް މެހެމަލްއަށް އުއްމީދު ކުރެވުނެވެ. އެހެންނަމަވެސް އެކަން އެހެންނެއް އެރެޔަކު ނުވިއެވެ.
ހެނދުނު ތެދުވެގެން އޮފީހަށްދާން ޙައިދަރު ނުކުތްތަނާ ސާރާގެ ފޯނެއް އައެވެ. ފޯނުނެގުމާއެކީ ސާރާ ޝަކުވާކޮށްގަތެވެ. ކައިވެންޏަށްފަހު ފިރިހެނުން އެމީހުންގެ އަންހެން ކޮއްކޮއިންގެ މަތިން ހަނދާންނައްތާލާވާހަކަޔަކީ ، ތެދެއްކަމަށް ސާރާއަށް ހީވާކަމަށް ބުންޏެވެ. ކައިވެނިކުރިފަހުން ، ވީހާދުވަހެއް ވީއިރު ، ސާރާމެންގެޔަށް ޙައިދަރު ޖައްސާލާފައެއް ނުވެއެވެ. ކައިވެނި ނުކުރާއިރު ، އެންމެ މަދުވެގެންވެސް ހަފުތާޔަކު އެއްފަހަރު ސާރާމެންގެޔަށް ޙައިދަރު ޒިޔާރަތް ކުރާނެއެވެ. ސާރާގެ ފިރިމީހާ ޢާޞިމް އަކީވެސް ވިޔަފާރިވެރިޔަކަށްވާތީ ، އެދެމީހުންގެ ދެމެދުގައި އޮންނަނީ ހަމައެކަނި ޅިޔަންފަހަރިކަމުގެ ގުޅުން އެކަންޏެއްނޫނެވެ.
ސާރާ ވާހަކަ ދައްކަމުންދަނިކޮށް ، ޢާޞިމް ފޯނު އަތުލިއެވެ. ޢާޞިމްވެސް ކުރީ ހަމަ އެއް ޝަކުވާއެކެވެ. އަދި ، އެރެޔަށް އެގޭގައި ރޭގަނޑުގެ ކެއުމެއް ތައްޔާރު ކުރި ވާހަކަ ބުނެ ، ޙައިދަރު އެ ކެއުމަށް ނައިސް ނުވާނެކަމުގައި ޢާޞިމް ބުންޏެވެ.
ޙައިދަރަށް ދެވޭނެކަމުގެ ޔަޤީންކަމެއް ނުދެވުނެވެ. އެއަށްވުރެ އޭނާގެ މަސައްކަތް މާބޮޑީއެވެ. ޙައިދަރުގެ ޝަކުވާތައް ގިނަވުމާއެކީ ، ދިލްނަޝީނަށް ފޯނު ދިނުމަށް ޢާޞިމް އެދުނެވެ. ޙައިދަރު އެރޭ އެގެޔަށް ގެނައުމަކީ ދިލްނަޝީންގެ ކަމެއްކަމަށް ޢާޞިމް ބުންޏެވެ. އަދި ، ދިލްނަޝީންވެސް ، އޭނާ އެކަން ކޮށްދޭނެކަމަށް ވަޢުދު ވިއެވެ.
އަދި އެއްކަމެކެވެ. ހިނގައިގަންނަމުން ޙައިދަރު ބުންޏެވެ. ހެޔޮވަރުކުރަން ފަހާމީހާއަތަށް ދިލްނަޝީންދިން ހެދުން އޮތީ ނިމިފައެވެ. ކޮންމެވެސް ވަގުތަކުން އެހެދުން ގެންނާށެވެ. މިރޭ ، ސާރާމެންގެޔަށްދާއިރު ، ދިލްނަޝީން ލައިގެން ހުންނަން އަހަރެން ބޭނުންވަނީ އެހެދުމެވެ. އަހަރެންގެ އަނބިމީހާއަކީ ، ކިހާވަރެއްގެ މީހެއްކަން ސާރާމެންނަށް އަންގައިލާން އަހަރެން ބޭނުމެވެ. އާނއެކޭ ބުނެ ދިލްނަޝީން ބޯޖަހައިލިއެވެ. ފަރި ހިނިތުންވުމަކާއެކީ ، ޙައިދަރާ ދިމާއަށް ބަލައިލަމުން ، ދިލްނަޝީން ޙައިދަރާ ސަލާމް ކޮށްލިއެވެ.
އޮފީހަށްދާން ޙައިދަރު ގެއިން ނުކުމެގެން ތަންކޮޅަކަށް ދިޔަތަނާ ، ތަނބަކާއެޅި ނިވާވެގެންހުރި މެހެމަލް ކުއްލިޔަކަށް ނުކުތެވެ. ޙައިދަރަށް ކުއްލިޔަކަށް ހުއްޓިލެވުނެވެ.
" އިންތިޒާރަކީ ، އިންސާނާ މަރާލާ އެއްޗެކެވެ. އަހަރެން ފިލާމިހުރީ ، މަރަށް ފިލަންވެގެންނެވެ. އިންސާނަކަށް މީހަކު ދެކެ އިންތިހާއަށް ލޯބިވެވިއްޖެނަމަ ، ފުރާނަ ނުކުމެގެންދާއިރު އަޅާވޭން އެހާ ގަދަވާނެއެވެ. އެހާ ވޭނާއި ތަކުލީފު ލިބިގެންދާނެއެވެ. އެލޯބި ޙާޞިލްކުރުމަށްޓަކައި އިންސާނާގެ ފުރާނަ ދުއްވާލަނީ އެސަބަބަށްޓަކައެވެ. އުއްމީދާއެކީ އެންމެ ނޭވާއެއްވެސް ލެވޭތޯ އިންސާނާ މަސައްކަތްކުރަނީވެސް އެ ސަބަބަށްޓަކައެވެ. " މެހެމަލް ބުންޏެވެ.
އެއުއްމީދު މެހެމަލްގެ ހިތުން ނެރެލުމަށް ޙައިދަރު ބުންޏެވެ. އެއީ ދެން އެއްވެސް ޙާލައްގައި މެހެމަލްއަށް ޙާޞިލްކުރެވޭނެ އުއްމީދެއްނޫނެވެ. ޙައދަރުގެ ސަބަބުން މެހެމަލްއަށް އެއްވެސް ތަކުލީފެއް ލިބޭކަށް ޙައިދަރު ބޭނުމެއްނޫނެވެ.
ޙައިދަރާގާތަށް މެހެމަލް ޖެހިލިއެވެ. މެހެމަލްގެ ނޭވާގެ އަޑާއި ހަށިގަނޑުންދުވާ މީރުވަސް ފޯރާ ހިސާބަށެވެ. މީހަކަށް ފެނިދާނެތީ މެހެމަލް ކަންބޮޑެއް ނުވެއެވެ. އޭނާގެ ލޮލުންފައިބާ ކަރުނައިގެ ސަބަބަކަށް ޙައިދަރު ނުވުމަށް މެހެމަލް އެދުނެވެ. އަދި އޭނާގެ ހިތުގެ އުފާވެރކަމުގެ ސަބަބަށް ވުމަށްވެސް އެދުނެވެ.
މެހެމަލް އެޖަހަމުންދާ ސަކަރާތް ބަލަން ، ބެލްކަނީގައި ކުލްސޫމް ހުއްޓިލައިގެން ހުށްޓެވެ. މެހެމަލްގެ އަތް ޙައިދަރުގެ އަތުގެ ތެރެއިން ފޮޅުވާލައި މެހެމަލް އޭނާއާ ދުރަށް ކޮށްޕާލިތަން ކުލްސޫމަށް ފެނުނެވެ. ބޯހޫރަމުން ، ނޫނެކޭ ބުނަމުން ޙައިދަރު އޮފީހަށްދާން ނުކުތެވެ.
ހެޔޮވަރުކޮށްފައި އޮތް ހެދުން ނެގުމަށްޓަކައި ، ފަހާތަނަށްގޮސް ، ދިލްނަޝީން ހެދުން ހެޔޮވަރު ކޮށްލިއެވެ. ހެޔޮވަރުކޮށްލާފައި އޮތީ އޭނާ ބޭނުންވާ ގޮތަށެވެ. ލޯގަނޑާދިމާލަށް ބަލަހައްޓައިގެން ފަރިބަލަން ހުރެފައި ފަހަތަށް އެނބުރިލިއިރު ، ކުރިމަތީހުރި މީހާ ފެނިފައި ދިލްނަޝީންގެ ފައިދަށުން ބިންގަނޑު ދެމިގަތެވެ. ދިލްނަޝީންގެ ކުރިމަތީގައި އެހުރީ ޙަމްޒާގެ ކޮއްކޮ ރިދާއެވެ.
" ވައިސަރީއެވެ. ނަލަކަމުގެ ކޮޅެއް ނެތެވެ. ތިހިރަ އަޅައިގެންހުރި ހެދުމެއް ނިކަން ދެކިބަލާށެވެ. އެންމެ އަގުބޮޑު ފޮއްޗެވެ. އެންމެ އަގުބޮޑު ފެހުމެވެ. އެންމެ ފަހުގެ ފެޝަން ޑިޒައިނެވެ. އަތުގައި އަޅައިގެން ތިހުރި ތަނޑުތަކުންނާއި ކަރުގައި އަޅާފައި ތިޔައޮތް ހާރުން ތިއީ މުއްސަންޖެއްގެ އަނތްބެއްކަން އެނގެއެވެ. ދިލްނަޝީނަށް ހަމަ ސާބަހެވެ. އަހަރެންގެ ބޭބެ ދޫކޮށްލާފައި ފާޑެއްގެ މުސްކުޅިޔަކާ ދިލްނަޝީން ކައިވެނިކުރި ސަބަބު ، އަހަރެންނަށް މިއެނގުނީ އަދި ކިރިޔާއެވެ. ތިއީ ކޮންކަހަލަ އިންސާނެއް ހެއްޔެވެ ؟ އަހަރެންގެ ބޭބެ އެއުޅޭ ޙާލު ދިލްނަޝީނަށް އެނގޭ ހެއްޔެވެ ؟ އަހަރެން ދިލްނަޝީނަށް ނުކޮށްދެނީ ކޮންކަމެއް ހެއްޔެވެ ؟ އަހަރެމެންނަށްވުރެ ބޮޑު މުއްސަންޖެއް ފެނުނީމަ ، ބޭބެ ދޫކޮށްލާފައި އެފަކީރު ދުނިޔެއަށް ގިނަކޮށްލިއިރު ، ތިހަށިގަނޑުގައި ހިތެއްނެތީ ހެއްޔެވެ ؟ ތި އިނދެގެންއުޅޭ މީހަކާ އިނދެގެން ތިއުޅެނީ ހަށިގަނޑުގައި ނެތް ހިތަކައިގެން ހެއްޔެވެ ؟ ހަމަ ގައިމުވެސް ހިތަކުން ފުރިހަމަކޮށްދޭންޖެހޭނެ އެއްވެސްކަމެއް އެފިރިހެނަކަށް ނުލިބޭނެއެވެ. ދިލްނަޝީންގެ ހިތަކީ އަހަރެންގެ ބޭބެގެ ޙައްޤެކެވެ. ތިއީ އެއްއިރެއްގައި އަހަރެންގެ ރަޙުމަތްތެރިޔެކޭ ބުނަންވެސް މިހާރު ލަދުގަނެއެވެ. އެހެން އިންސާނުންގެ މައްޗަށް ދިލްނަޝީންގެ ހިތުގައި އެއްވެސް ރަޙުމެއް ކުލުނެއް ނުއޮންނަނީ ހެއްޔެވެ ؟ އަހަރެންގެ ބޭބެގެ މައްޗަށް ދިލްނަޝީންގެ ހިތުގައި އޮތް ލޯތްބަކީ އެހާ އަނިޔާވެރި ރަޙުމެއްނެތް އެއްޗަކީ ހެއްޔެވެ ؟ " ރިދާ ހުއްޓައިނުލާ ، ދިލްނަޝީނާ ދިމާލަށް އެތިވަރު ގޮވަމުން ގެންދިޔައެވެ.
ދިލްނަޝީން ހުރީ އަނގައިންވެސް ބުނަން ނޭނގި ގަބުވެފައެވެ. އެދެމީހުންގެ ފަހަތުގައި ، ރިދާ އެދައްކާ ވާހަކަ އަޑުއިވޭ ހިސާބުގައި އެހެންމީހަކު ހުރިކަމެއް ރިދާއަކަށްވެސް އަދި ދިލްނަޝީނަކަށްވެސް ނޭނގެއެވެ.
މެހެމަލްވެސް އައިސް ، އެތަނަށް ވަތްއިރު ދިލްނަޝީން ފަރިބަލަން ހުއްޓާ ފެނިގެން ، ދިލްނަޝީނާ ދިމާލަށް ހިނގައިގަތްތަނާ ، އެތަނަށް ރިދާ އައިސް ، ދިލްނަޝީނާ ދިމާލަށް އެއްޗެތި ކިޔަން ފެށީއެވެ.
ދިލްނަޝީނާ ދިމާލަށް ރިދާ ގޮވާނެ އެއްޗެއް ގޮވަންދެން ، ދިލްނަޝީން އަނގައިން ނުބުނެ މަޑުން ހުށްޓެވެ. މެހެމަލްވެސް ހުރީ ރިދާ އެދައްކާ ވާހަކަތައް އަޑުއަހާށެވެ. އެއީ މެހެމަލްއަށް ، އެތައް މިލިއަން ޑޮލަރަކަށްވުރެ އަގުބޮޑު ވާހަކަ ތަކެކެވެ. އެހާމެ މުހިންމު ސިއްރެކެވެ. އޭނާގެ މަގަށް ހުރަހަކަށްވެފައިހުރި ދިލްނަޝީން ، އެއްފަހަރުން ހަޔަކަށް ޖަހައި ދަނޑުން ބޭރުކޮށްލެވޭނެ ފަންޑިތައެކެވެ. ( ނުނިމޭ )
2024 އާއަހަރާ އެކީ ދިލްނަޝީންގެ ޙަޔާތްވެސް ތިނިމުނީ. މެހެމަލް ދެންއުކާ ވިހަ ތީރުތަކުން ، ދިލްނަޝީނަކަށް ސަލާމަތެއް ނުވެވޭނެ. ޔަޤީން
ވވ.ރީތި ޝުކުރަން
އާ އަހަރުގެ މުނާސަބަތުގައި މެހެމަލް ، ދިލްނަޝީނަށް ރަނގަޅު ހަދިޔާއެއް ދޭނެކަމަށް ފެނޭ. މިފަހަރު އެފަކީރުގެ ދުވަސް ދުއްވާލާނެކަން ޔަޤީން. ދިލްނަޝީންގެ ދިރިއުޅުން އެފުށް މިފުށަށް ޖަހާލާނެ. މިރޭ ސާރާމެންގެޔަށް ކާން ދެވޭނެ ހެންނެއްވެސް ހިއެއް ނުވޭ.
ދިލްނަޝީންގެ ދުވަސް ތި ދިޔައީ. މެހެމަލްއަށް ދިލްނަޝިނާއި ޙައިދަރާ ދެމެދަށް ވަންނަން މަގެއް ތިހުޅުވުނީ. މެހެމަލް ޖަހާ މަޅިތަކުން ދިލްނަޝީނަށް ސަލާމަތްވެވޭނެ ކަމެއްވެސް ނޭނގޭ. ބަަލަން ތިބެމާ.