(8 ޑިސެމްބަރ 2024 ގައި ޝާއިޢުކުރި ބަޔާގުޅޭ)
( އެވަރު ދިލްނަޝީނަށް ނުފުދެނީތޯ އަނީސާ ސުއާލު ކުރިއެވެ. އެމިންވަރަކީވެސް ، މިޒަމާނުގައި ކޮންމެ ކޮންމެ އަންހެނަކަށް ލިބޭނެ ރަޙުމަތެއްނޫނެވެ. އެކަމާ ދިލްނަޝީން އުފާކުރަންވީ ނޫން ހެއްޔެވެ ؟ ޙައިދަރުވަރުގެ ފިރިޔަކު ، ދިލްނަޝީނަށް ނުލިބޭނެކަމަށް އަނީސާ ބުންޏެވެ. )
" އަހަރެންގެ ފިރިމީހާ ބޭނުންވަނީ އެހެން އަންހެނެކެވެ. އެކަމަކު ތިބުނަނީ އެކަމަށް ޝުކުރުވެރިވާށޭ ހެއްޔެވެ ؟ ތިޔައީ ކޮންކަހަލަ މަޔެއް ހެއްޔެވެ؟ " ދިލްނަޝީން އޭނާގެ މަންމައާ މުޚާތަބުކޮށް ބުންޏެވެ.
އެއްވެސް ލަހެއްފަހެއް ނެތި ، އަނީސާ އާއނއެކޭ ބުންޏެވެ. ﷲ ގެ ރަޙުމަތްފުޅު ، އަބަދުވެސް އޮންނާނީ އެކަލާނގެ ދެއްވާ ނިޢުމަތަށް ޝުކުރުވެރިވާ މީހުންނާ އެކުގައެވެ. އެކަލާނގެ ވޮޑިގެންވަނީ ކެތްތެރިންނާ އެކުގައެވެ. އެނގޭނީ ކިހިނެއް ހެއްޔެވެ ؟ މާދަމާވެސް ، ދިލްނަޝީންގެ މަސްއޫލިއްޔަތު ، ނުހަނު ލޯތްބާއެކީ އުފުއްލަން ޙައިދަރު ކުރިމަތިލައިފާނެއެވެ. އަނީސާގެ ވާހަކަ ދިލްނަޝީނަށް ޤަބޫލެއް ނުކުރެވުނެވެ. އެއީ ވާނެކަމެއްނޫނެވެ. އެއަށްވުރެ ބޮޑަށް އެމީހުން އެތިބީ ހިތާވެގެންގޮސް ތަތްތެޅިފައެވެ. މަންމަގެ ކުރިމަތީ އެކަހަލަ ވާހަކަ ދައްކަން ދިލްނަޝީން ލަދުގަތެވެ. އެހެނަސް ، އޭނާ ބުނަން ބޭނުންވާ އެއްޗެއް ބުނުމަކީ ދިލްނަޝީންގެ އާދަ އެކެވެ. އެއީ އިޚްލާސްތެރި ، ޚުލްޤުހެޔޮ މީހުންގެ ސިފައެކެވެ.
ޙައިދަރާއި މެހެމަލް ބޮޑުވެގެންއައީ އެއްގޭތެރޭގައި އެކީގައި އުޅެއެވެ. ދެމީހުން ރައްޓެހިވެގެން އެތައްދުވަހެއްވަންދެން އުޅުނެވެ. ދިލްނަޝީންގާތަށް ރުޅިއައެވެ.
" ތިޔައީ އެ އަންހެންކުއްޖާއެވެ. އެހެންމީހަކަށް ދެވިފައި އޮތް ހިތަކުން ، އެހިތުގައި ޙައިދަރުގެ މައްޗަށް ލޯބިއުފެދެން ޙައިދަރު ފުރުޞަތު ދިން އަންހެންކުއްޖާއެވެ. އެއީ އުފާކުރަންޖެހޭނެ ކަމެއްނޫން ހެއްޔެވެ ؟ " އަނީސާގެ ވާހަކައިން ދިލްނަޝީންގެ އަނގަ ބެދުނެވެ.
ދިލްނަޝީން އޭނާގެ ބޯ ދެފަރާތަށް ހޫރައިލިއެވެ. އަންހެންކުއްޖާގެ ފިރިމީހާ ލޯބިވަނީ އެހެން އަންހެނަކު ދެކެއެވެ. އެކަމަކުވެސް ، އެފިރިހެނާގެ ގެ އާބާދުކުރަން އަންހެންކުއްޖާ ކުރިމަތިލާންވީ ހެއްޔެވެ ؟ އެއީ ކޮންކަހަލަ އިންޞާފެއް ހެއްޔެވެ ؟
އިންޞާފަކީ އެއީކަމަށް އަނީސާ ބުންޏެވެ. އެއީ ދުނިޔެ ހިނގަމުން އަންނަގޮތެވެ. އެއީ އަންހެނުންނަށް ދުނިޔެދައްކާ ޙަޤީޤަތެވެ. އެ ޙަޤީޤަތް ޤަބޫލުކުރަން ، އަންހެނުންގެ މައްޗަށް ދުނިޔެވަނީ މަޖުބޫރު ކޮށްފައެވެ. ދުނިޔެއާ ހަނގުރާމަކުރުމުގެ ބާރެއް އަންހެނުންނަށް ލިބިގެންނެއް ނުވެއެވެ. އަދި އަންހެނުންގެ މައްޗަށް ހިނގާ ސަޤާފަތު ބަދަލުކުރުމުގެ ފުރުޞަތުވެސް އަންހެނުންނަކަށް ނޯވެއެވެ. ދެތިންދުވަހެއްވަންދެން ، ދިލްނަޝީން އެގޭގައި މަޑުކޮށްފައި ، ފިރިމީހާގެ ގެޔަށް ދިއުމަށް އަނީސާ ބުންޏެވެ.
ދިލްނަޝީންހުރީ ބުނާނެ އެއްޗެއް ނޭނގި ، އަނގަހުޅުވިފައެވެ. މަންމަ އެހާ ބޯދާ ޚިޔާލު އެގެންގުޅެނީ ކީއްވެތޯ ޢާފިޔާކުރެން ދިލްނަޝީން އެހިއެވެ. މަންމަ އެބުނި އެއްޗެއް އެބުނީ ، ދިލްނަޝީނަށް ހެޔޮއެދިގެންކަމުގައި ޢާފިޔާ ޖަވާބު ދިނެވެ.
މައިން ، އެމީހުންގެ އަންހެން ދަރިންނަށް އޮންނަ ، އެންމެ ތަކުލީފުބޮޑު ގޮތްތަކައް އެދެނީ ކީއްވެތޯ ، ދިލްނަޝީން ސުއާލު ކުރިއެވެ. ދިލްނަޝީންގެ އެސުއާލަށް ދޭނެޖަވާބެއް ޢާފިޔާއަކަށް ނުފެނުނެވެ. ޢާފިޔާ އެހެން ބުނިނަމަވެސް ، އޭނާވެސް ހުރީ އެކަމުގައި ދިލްނަޝިނާ އެއްކޮޅަށެވެ. އޭނާއަކީވެސް އަންހެނެކެވެ. ޙައިދަރުގެ ޢަމަލުތައް ހުރިގޮތް ، ޢާފިޔާވެސް އެހުރީ ލޮލުންދެކެ އަތުން ހިފާފައެވެ. އެވާހަކަތައް އައްވަލްގާތު ދައްކައިގެން ، ދިލްނަޝީނަށް ގޮތެއް ހޯދައިދިނުމަށް ޢާފިޔާ ނިންމިއެވެ. ޢާފިޔާ އޭނާގެ ކޮޓަރިޔަށް އައިސް ، އެކަމާބެހޭގޮތުން ، ޙައިދަރާ ވާހަކަ ދައްކައިލަންވީ ނޫންތޯ އައްވަލް ގާތު ބުންޏެވެ.
އެވާހަކަ ބުނީމަ އައްވަލް ގާތަށްވެސް އައީ ރުޅިއެވެ. އެކަމާ ވާހަކަ ދައްކަންވީ ޙައިދަރަކާ ނޫނޭ ، އޭނާ ވާހަކަ ދައްކާނީ ދިލްނަޝީނާއޭ ބުނެ ، ދިލްނަޝީންގެ ކޮޓަރިޔާ ދިމާލަށް އައްވަލް ހިނގައިގަތެވެ. ދިލްނަޝީނާ ދައްކަންވީ ވާހަކައަކީ ކޮބައިތޯ އެހިނަމަވެސް ، ޢާފިޔާއަށް ޖަވާބުނުދީ ، އައްވަލް ހިނގައިގަތީ ދިލްނަޝީނުގެ ކޮޓަރިޔާ ދިމާލަށެވެ. އެކަން ހުއްޓަން ޢާފިޔާކުރި މަސައްކަތް ވީ ބޭކާރެވެ.
އައްވަލް ދިޔަގޮތަށްގޮސް ، ދިލްންޝީންގެ ފޯނު އޭނާއަތަށް ދޭށޭބުނެ ހަޅޭއްލަވައިގަތެވެ. ދިލްނަޝީންގެ އަތުގައި އެވަގުތު ފޯނެއް ނެތެވެ. އައްވަލް ނިންމީ ، ދިލްނަޝީންގެ ފޯނު އޭނާއަތަށް ނުދޭންވެގެން ބަހަނާ ދައްކަނީ ކަމަށެވެ. ފިރިމީހާގެ ގެއިން ނުކުމެގެން ، ދިލްނަޝީން އެގެޔަށް އެއައީ ޙަމްޒާއާ ދެމީހުން ރާވައިގެންކަމަށް އައްވަލް ބުންޏެވެ. އެހެންނަމަވެސް ދިލްނަޝީން އެކަމަކަށް އެއްބަހެއް ނުވެއެވެ. ދިލްނަޝީނަކީ އެހާ ގޮތެއްފޮތެއްނެތް މީހެއްގެ ގޮތުގައި ބޭބެ ދުށީތީ ، ދިލްނަޝީންހުރީ ޢަޖައިބުވެފައެވެ. ދިލްނަޝީން ، އެފަހަރު ، އޭނާގެ ބޭބެއަކަށް ދުލެއް ނުކުރެއެވެ. އޭނާގެ އަތުގައި ފޯނުނެތްކަމަށް ، ތަކުރާރުކޮށް ދިލްނަޝީން ބުނަމުން ގެންދިޔައެވެ.
" އެހެންކަމަށް ވަންޏާ ، ގެޔަށްއައި މަގުމަތީ ޙަމްޒާއާ ވާހަކަ ދެއްކީ ކިހިނެއް ހެއްޔެވެ ؟ " އައްވަލް ބުންޏެވެ.
އޭނާ ގެޔަށްއައި މަގުމަތީ ، ޙަމްޒާއާ ވާހަކަ ދެއްކިކަމަށް ބޭބެގާތު ބުނީ ކާކުތޯ ދިލްނަޝީން ސުއާލު ކުރިއެވެ. ބޭބެ އެބުނި ވާހަކަޔަކުން ދިލްނަޝީން އިނީ ޙައިރާންވެފައެވެ. ދިލްނަޝީން އެއައީ ފިރިމީހާގެ ގެއިން ނުކުމެގެންނެވެ. އެކަން މެދުވެރިވުމުގެ ސަބަބަކަށްވާނީ ޙަމްޒާއެވެ. އައްވަލަށް ހީކުރެވުނު ގޮތުގައި އޭނާވެސް ހިފެހެއްޓިއެވެ. އެހެނަސް ، އުފަންނުވާ ޙާލަތެއް އަމިއްލަޔަށް އުފައްދައިގެން ، ވާހަކަތަކެއް ހަދަނީ ކޮންސަބަބަކާ ހުރެތޯ ، ދިލްނަޝީން އޭނާގެ ބޭބެއާ ސުއާލު ކުރިއެވެ. އޭގެ ސަބަބަކީ ، ފިރިއެއްގެ ގޮތުގައި ދިލްނަޝީން އަދިވެސް ، ޙައިދަރު ޤަބޫލު ނުކުރުމެވެ. އައްވަލަށް އެކަން އެނގެއެވެ. އެހާ ކުޑަކުޑަކަމެއް މާބޮޑު ކަމަކަށް ހަދައިގެން ، ގެޔަށް އެއައީ އެހެންވެގެންކަމުގައި އައްވަލް ބުންޏެވެ. އައްވަލް ޤަބޫލުކުރާގޮތުގައި އެ ހިނގީކީ ، އަންހެނަކަށް ބަލާއިރު ބޮޑުކަމެއްނޫނެވެ. އެހެންނަމަވެސް ، އެއީ ދިލްނަޝީނަށް ވަރަށްބޮޑު ކަމެކެވެ.
އެކަމެއްގައި ފިރިހެނުން ، އަންހެނުންގެ ހިތާއި ފުރާނަޔާކުޅެ ، އަމިއްލަ އެދުން އިސްކޮށް ، ހިލޭ އަންހެނުން ގޮވައިގެން ބޭނުންގޮތަކަށް އުޅޭ ޙާލަތަކަށް ، ކުޑަކުޑަކަމެކޭ ނުކިޔޭނެކަމަށް ދިލްނަޝީން ބުންޏެވެ. ފިރިހެނަކަށް އެއީ ކުޑަކަމަކަށް ވެދާނެއެވެ. އެކަމަކު އަންހެނުންނަށް އެއަށްވުރެ ބޮޑު އެހެންކަމެއް ނޯންނާނެއެވެ. ޙައިދަރުގެ ފަރާތުން އެހިނގާކަމެއް ދިލްނަޝީންގެ ހިތުން ފިލުވާލައި ، ފިރިމީހާގެ ގޭގައި ރީތިކޮށް އުޅެން ނުވިސްނާ ކަމަށްވަންޏާ ، އެއީ ބޮޑުކަމަކަށް ވެދާނެކަމަށް އައްވަލް ބުންޏެވެ. ދިލްނަޝީން ކުރަންވީ ކަމަކީ ، ޙައިދަރު އުޅޭނޫޅޭގޮތެއް ނުބަލައި ، އެގޭގައި ހަމަޖެހިލައިގެން އުޅެންވީއެވެ. ލިބުނު މިންވަރަށް ޝުކުރުކޮށްގެން ، ޙައިދަރުގެ އަޅައިލުން ޤަބޫލުކޮށް ، އިތުރުކަމަކަށް އުއްމީދު ނުކޮށް ދިރިއުޅުމެވެ. އެއީ ، އޭނާގެ ބޭބެ އައްވަލް އެދޭގޮތެވެ.
އަންހެނުންނަކީ ހަމައެހާ ނިކަމެތި ބައެއް ހެއްޔެވެ ؟ މެހެމަލް އޭނާގެ ފިރިމީހާގެ ގެއިން ، ނުކުމެގެން އެއައީވެސް ހަމަ އެނިކަމެތިކަމަށް ކެތްނުކުރެވިގެންނެވެ. އަންހެންކުދިން މީހުންނާ އިނީމަ ކުރިމަތިލާންޖެހެނީ ، އެފަދަ ނިކަމެތި ކަމަކާ ހެއްޔެވެ ؟ އެއަށްވުރެ ، މީހަކާ ނީނދެހުރުންވެސް ދިލްނަޝީނަށް މާ ރަނގަޅެވެ. އެކަމަކު ، މަންމައާއި ބޭބެގެ ބަހަށް ، އޭނާއަށް މިހާރު އެއޮތީ މީހަކާ އިނދެވިފައެވެ. ދެންހަދާނީ ކިހިނެއް ހެއްޔެވެ ؟ އުފަލާއި އަރާމާ އަދި ހިތްހަމަޖެހުމަށް ކުރިހާ އުއްމީދެއް ދޫކޮށްލައި ، ހިތާމައާއި ހިތްދަތިކަމުން ފުރިގެންވާ ތަކުލީފުތަކަށް އޭނާގެ ނަފްސު ދޫކޮށްލަންވީ ހެއްޔެވެ ؟ މިއީ ކޮންކަހަލަ ދުނިޔެއެއް ހެއްޔެވެ ؟ ދިލްނަޝީންގެ ލޮލުން އޮހޮރިގެންދިޔަ ކަރުނަތައް އޭނާގެ އުނގުމައްޗަށް ފައިބަމުން ދިޔައެވެ.
ޢީޝަލްއަށް ކުޅޭ އެއްޗެތިތަކެއް ހިފައިގެން ހޮޓަލަށްގޮސް ، ޙައިދަރު އެތަކެތި ޢީޝަލްއަށް ދިނެވެ. މެހެމަލް ހުރީ ހިތްހަމަ ނުޖެހިފައެވެ. މެހެމަލްއަށް އިޙްސާސްވާ ގޮތުގައި ޙައިދަރު އެހުރީ މިހާރު ބަދަލުވެފައެވެ. މިހާރު އެއީކީ ، އޭނާދެކެ އެހާ ލޯބިން ކުރިން އުޅުނު ޙައިދަރެއް ނޫނެވެ. ޙައިދަރު ބަދަލުވީ ދުނިޔެ ބަދަލުވެގެންކަމަށް ޙައިދަރު ބުންޏެވެ. އެއީ ދުނިޔެ ހިނގާ ގޮތެވެ. ދުނިޔެ އަބަދުވެސް ދަތުރުކުރާނީ ތޮށަލި ދުޅަޔަށެވެ. އެއްވަތު މަތިން އަނެއްވަތު ދަށުންނެވެ.
މެހެމަލްއަށް އެކަން ޤަބޫލެއް ނުކުރެވުނެވެ. ވަޤުތާމެދު އޭނާގެ އެއްވެސް ޝަކުވާއެއް ނެތެވެ. މެހެމަލްގެ ހިތުގައި ޝަކުވާއެއް އޮތްނަމަ އޮތީ ، ޙައިދަރުގެ މައްޗަށެވެ. އެހެނަސް ، ޙައިދަރު ޤަބޫލުކުރާގޮތުގައި ، އޭނާގެ މައްޗަށް މެހެމަލްއަކަށް އެއްވެސް ޝަކުވާއެއް ނުކުރެވޭނެއެވެ. އެކަމުގައި ޙައިދަރުގެ އެއްވެސް ކުށެއް ނެތެވެ. ޝަކުވާއަކީ ޙާލަތެއް ކުރިމަތިވެގެން އުފަންވާ އެއްޗެކެވެ. ޙައިދަރުގެ މައްޗަށް މެހެމަލްގެ ހިތުގައި އެއްވެސް ޝަކުވާއެއް އުފެދޭފަދަ ޙާލަތެއް ، ޙައިދަރުގެ ފަރާތަކުން ނުއުފެދެއެވެ. ހުރިހާވެސް މައްސަލައެއް އުފެދުނީ މެހެމަލްގެ ޢަމަލުންނެވެ. މެހެމަލްއަށް ދުނިޔެ ބޭނުންވި ޙާލަތެއްގައި ޙައިދަރު ދޫކޮށްލައި އޭނާގެ ލޯތްބަށް ފުރަގަސްދީ ، އަމިއްލަ އެދުން މެހެމަލް އިސްކޮށްގެންނެވެ. ޙައިދަރުގެ މައްޗަށް ޝަކުވާއެއް ކުރުމުގެ ޙައްޤު ، މެހެމަލްއަކަށް މިހާރަކު ނެތެވެ. އެޙައްޤު ޙާޞިލްކުރީ އެހެން މީހެކެވެ. އޭނާ މިހާރު އެވަނީ ޙައިދަރުގެ ގެއިން ނުކުމެގެން ގޮއްސައެވެ. އޭނާ ގެޔަށް އެދިޔައީ ، ޙައިދަރާއި މެހެމަލްއާ ދެމީހުން އެހޮޓަލުގައި އެކުގައި ތިބިތަން ފެނިގެންނެވެ.
އެހެންކަމަށް ވަންޏާ ، އެކަމާގުޅިގެން ހަދަހަދައިގެން ، ދިލްނަޝީން އެތައްވާހަކައެއް މިހާރު އޮންނާނީ ދައްކާފައިކަމަށް މެހެމަލް ބުންޏެވެ. އެރޭ ދިލްނަޝީނަށް ނުވެސް ނިދޭނެއެވެ. ބިރުވެރި ހުވަފެންތައް ފެނި ، ހުންނާނީ ހިތްބިރުގެންފައެވެ.
" އެހެންވެ ، އަހަރެން މިހާރު މިއުޅެނީ ، ދިލްނަޝީންގެ ހިތުގައި އޮތް ބިރުވެރިކަން އެހިސާބުން ނިންމައި ލުމަށެވެ. " ޙައިދަރު ބުންޏެވެ.
އެކަން ކުރާނީ ކިހިނެއްތޯ މެހެމަލް ސުއާލު ކުރިއެވެ. ޙައިދަރު ނިންމައިގެން އެހުރީ ، ދިލްނަޝީންގެ ގެޔަށްގޮސް މާފަށް އެދި ، ދިލްނަޝީން އަނބުރާ އޭނާގެ ގެޔަށް ގެނައުމަށެވެ. އޭނާގެ ޙަޔާތުން ނުކުމެގެން ނުދިއުމަށް ދިލްނަޝީނަށް އާދޭސް ކުރުމަށެވެ. އަދި އޭގެފަހުން ، ދުވަހަކުވެސް ، މެހެމަލްގާތަށް އޭނާއަށް ނާދެވިދާނެކަމަށް ޙައިދަރު ބުންޏެވެ.
އޭނާއަށް އެހެން ނުހެދުމަށް ޙައިދަރުގެ ކިބައިން މެހެމަލް އެދުނެވެ. އެހެނަސް ، ޙައިދަރަށް ކުރިމަތިވެފައިވާ މަޖުބޫރީ ޙާލަތުން އެކަން އެގޮތަށް ކުރަންޖެހޭކަމަށް ޙައިދަރު ބުންޏެވެ. މަޖުބޫރީ ޙާލަތުގައި ކުރާ އެއްވެސްކަމެއް ކާމިޔާބެއް ނުވާނެއެވެ. ކާމިޔާބީއެއްގެ ޙާލަތުގައި ކުރާ ހުރިހާކަމެއް ކާމިޔާބުވީ ކޮންއިރަކުތޯ ޙައިދަރު ސުއާލު ކުރިއެވެ.
އޭނާ އެހިސާބުން ، ދޫކޮށްލަނީތޯ މެހެމަލް ސުއާލު ކުރިއެވެ. ނޫނެކެވެ. މީހުން ދޫކޮށްލުމަކީ މެހެމަލްގެ ކަމެއްކަމަށް ޙައިދަރު ބުންޏެވެ. ތަޤްދީރާ ކުޅުމަކީ އިންސާނާގެ ބާރުގެދަށުގައި ނެތްކަމަކަށް ވާއިރު ، ކުރިމަތިވާ ކަންކަމަށް ކެތްތެރިވެ ، އިންތިޒާރުކޮށްގެން ހުންނާނެއެވެ. ތަޤްދީރަށް ކޔަމަންވެ ، ﷲ އަށް ވަކީލުކޮށްގެން އެހުންނަ ހުރުމުގައި ، އޭނާއަކަށް އެއްވެސް ތަކުލީފެއް ނުލިބޭނެއެވެ.
" އެހެންނަމަވެސް ، ހުރިހާ އެއްޗެއް އެމީހެއްގެ އަތުގައި ހުރެ ، އެއްވެސް އެއްޗެއް ޙާޞިލްނުވުމަކީ ، އެ އިންސާނާ މާޔޫސްކޮށް ދުނިޔެއިން ބާކީކޮށްލާނެ ކަމެކެވެ. އެކަމުން އޭނާއަށް ލިބޭނީ ހުސް ތަކުލީފެވެ. އަހަރެންނާ ކުރިމަތިނުލުމަށް ތަކުރާރުކޮށް ، މެހެމަލްގާތު މިބުނަނީ އެހެންވެގެންނެވެ. އަހަރެންގެ އޙްސާސްތަކާ ކުޅެން ތިގޮތަށް ދިމާނުކުރާށެވެ. " ޙައިދަރު ބުންޏެވެ.
ޙައިދަރުގެ އަތުގައި މެހެމަލް ހިފައިލިއެވެ. ހުރިހާކަމެއް ޙައިދަރު އެދޭގޮތަށް ފުރިހަމަކޮށްދޭނެކަމަށް ، މެހެމަލް ވަޢުދު ވިއެވެ. އޭނާއަށް މިހާރު ލައްކަ ކަންކަން ދަސްވެއްޖެއެވެ. އެއީ މިހާރު ، ކުޑައިރުގެ މެހެމަލްއެއް ނޫނެވެ. މެހެމަލްއަށް ޙައދަރު ނޫނެކޭ ބުންޏެވެ. ދެވަނަ ފަހަރަށް އެ ކެހިވެރިކަމުން އޭނާގެ ހިތުގައި އެއްވެސް ތަކުލީފެއް އުފެދޭކަށް ޙައިދަރު ބޭނުމެއް ނޫނެވެ. ޙައިދަރު ބޭނުންވަނީ ، މެހެމަލްގެ ކަސްތޮޅުން ސަލާމަތްވެ ، އޭނާއަށް މިހާރު ލިބިފައިވާ ޖަވާހިރެއްފަދަ އަނބިމީހާގެ އުފާތައް ފުރިހަމަ ކޮށްދޭށެވެ.
" އަހަރެން މިބުނަނީ ނޫންހެއްޔެވެ ! ފަހަރެއްގައި ދެން އެނބުރި މެހެމަލްގާތަށް އަހަރެންނަށް ނާދެވިދާނެއެވެ. " ޙައިދަރު ބުންޏެވެ.
އެތަނުގައި އިތުރު ވަގުތު ހޭދަނުކޮށް ، ކުއްލިޔަކަށް ޙައިދަރު ތެދުވިއެވެ. މެހެމަލްގެ އަތް އޭނާގެ އަތުން ފޮޅުވާލައި ، ކޮޓަރިން ނުކުންނަން ހިނގައިގަތެވެ.
ޙައިދަރު އެދަނީ އޭނާގެ ނިންމުމުގެ ބަލިކަށިކަން ޤަބޫލުކުރަމުންކަމުގައި މެހެމަލް ބުންޏެވެ. މެހެމަލްގެ ވާހަކަ އަޑުއަހަން މަޑުކޮށްލުމަށްފަހު ، ޙައިދަރު އެކޮޓަރިން ނުކުތެވެ. މެހެމަލް ހިންދެމިލައި ، މަކަރުން ފުރިގެންވާ ހިނިތުންވުމަކުން އޭނާގެ މޫނުމަތި ތާޒާ ކޮށްލިއެވެ. ފޮރުވިފައިވާ ސިއްރުތަކަކުންނާއި ، ނޭނގޭ ޙީލަތްތެރި ރޭވުންތަކުން ފުރިގެންވާ އެހިނިތުންވުމުގެ ހިތިކަން އެހެން އެއްވެސް މީހަކަށް ނޭނގޭނެއެވެ. ވާގޮތެއް އެނގިދާނެތާއެވެ ! ( ނުނިމޭ )
ހަމަ ވަރަށްވެސް ރީތި
ޙައިދަރުގެ ހިތްވަރަށް ހަމަ ސާބަސް. ދިލްނަޝީންގާތަށް ދިޔައިމަ ދެންވާނެގޮތެއް ބަލަން މިތިބީ.