ކުއްލި ނުރައްކަލުގެ ހާލަތު އުވާލައި، ޑިމޮކްރަސީގެ އުސޫލުން ގައުމު ހިންގުމަށް ދިވެހި ދައުލަތުން ދެކޮޅު ހަދާނަމަ ރާއްޖެއާ މެދު ފިޔަވަޅު އަޅާނެ ކަމުގެ އިންޒާރު ޔޫރަޕިއަން ޔުނިއަން (އީޔޫ) ގެ ކައުންސިލުން ދީފި އެވެ.
އީޔޫގެ ފޮރިން އެފެއާޒް ކައުންސިލުން މިއަދު ފާސްކުރި ގަރާރުގައި ގޮވާލައިފައިވަނީ ކުއްލި ނުރައްކަލުގެ ހާލަތު އުވައިލުމުގެ އިތުރަށް ގާނޫނުއަސާސީން ކަށަވަރުކޮށްދީފައިވާ ހުރިހާ ހައްގެއް ރައްޔިތުންނަށް ދިނުމަށެވެ.
ސިޔާސީ ބޭފުޅުން ބަންދު ކުރަމުންދާތީ އެކައުންސިލުންވަނީ އެކަން ކުށްވެރިކޮށް އެމީހުން ވަގުތުން މިނިވަން ކުރުމަށް ގޮވާލައިފައެވެ.
އީޔޫގެ ކައުންސިލުން ބުނެފައިވަނީ، ތިން ބާރު ވަކިވެފައިވާ ޑިމޮކްރަޓިކް ނިޒާމެއްގެ ހަމަތަކާ އެއްގޮތަށް ރާއްޖޭގެ ކަންކަން ހިނގަމުންދާ ކަމަށް ގަބޫލުނުކުރެވޭ ކަމަށެވެ. އެކަންކަން ރަނގަޅު ކުރުމަށްޓަކައި ރައްޔިތުންގެ މަޖިލީހާއި، ޖުޑީޝަރީގެ ހިންގުން، ގާނޫނު އަސާސީއާ އެއްގޮތްވާ ގޮތުގެ މަތިން ކުރިއަށް ގެންދިޔުމަށްވެސް ވަނީ ގޮވާލާފައެވެ.
ދިވެހި ރާއްޖޭގައި، ގަޑުބަޑު ވެފައި މިވަގުތުއޮތް ސިޔާސީ މަސްރަހުގެ ކަންތައް ހައްލުކުރުމަށް ސަރުކާރުން އިދިކޮޅު ފަރާތްތަކާ އެކު މަޝްވަރާ ކޮށްގެން ހައްލުކުރުމަށް ވެސް ކައުންސިލުން ވަނީ ގޮވާލައިފައެވެ.
އީޔޫގެ މި ގަރާރަށް ދިވެހި ސަރުކާރުން އެއްބާރުލުން ދެއްވާނެ ކަމަށް އުންމީދު ކުރާ ކަމަށް ވެސް އެ ކައުންސިލުން ބުނެފައިވެއެވެ. އަދި ހަމަ އެއާއެކު، ދިވެހި ސަރުކާރުން ޑިމޮކްރަސީގެ އުސޫލުން، ދައުލަތުގެ ބާރުތައް ވަކިކޮށް، ކުއްލިހާލަތު ނިމުމަކަށް ނުގެނެސްފިނަމަ ވަކިވަކި ފަރާތް ތަކާއި މެދު ފިޔަވަޅު ތަކެއް އަޅަން ޖެހިދާނެ ކަމަށް ވެސް އެކައުންސިލުން ވަނީ ބުނެފައެވެ.
އީޔޫގެ ކައުންސިލުން މިފަދަ ނިންމުމެއް ނިންމާފައި މިވަނީ، ރާއްޖޭގައި މިވަގުތު އޮތް ސިޔާސީ ހަލަ ބޮލިކަން ދުނިޔޭގެ ބޮޑެތި ގައުމުގެ ސަމާލު ކަމަށް އައިސް ފައިވާ ދަނޑި ވަޅެއްގައެވެ.
