ދިވެހި ދައުލަތަށް އެންމެ ދިހަރުފިޔާވެސް ދޭންއޮތް މީހަކު ކަމަށްވާނަމަވެސް ލަސް ނުކޮށް އެފައިސާ އަވަހަށް ދެއްކުމަށް ޕީޕީއެމްގެ ޕީޖީ ލީޑަރު އަހުމަދު ނިހާން ހުސައިން މަނިކު ގޮވާލައްވައިފިއެވެ.
އޭނާ ވިދާޅުވީ އެފައިސާއަކީ ރައްޔިތުންނަށް ތަފާތު ޚިދުމަތްތައް ފޯރުކޮށްދެއްވުމަށް ބޭނުންވާ ފައިސާ ކަމަށާއި އެފައިސާ ނުލިބި ތާށިވެފައި ހުރުމުން ޚިދުމަތް ދިނުމަށް ދަތިވާނެ ކަމަށެވެ.
އެފައިސާތައް ދައްލުތަށް ހޯދައި ދެއްވުމުގައި ކޯޓުތަކަށް ދަތިވާކަމަށްވާނަމަ އެ ސަބަބެއް ވިދާޅުވެ ދެއްވުމުން މަޖިލީސްތެރެއިންނަމަވެސް އެކަން ހައްލުކޮށް ދެއްވާނެ ކަމަށް އޭނާ ވިދާޅުވިއެވެ.
ނިހާން ވިދާޅުވީ ޖުމްހޫރީޕާޓީގެ ލީޑަރު ގާސިމް އިބްރާހީމްވެސް ދައުލަތަށް 194 މިލިއަން ޑޮލަރު ދައްކަވަންޖެހޭ ކަމަށެވެ. އެފައިސާ ހިފަހައްޓާފައި ބެހެއްޓުމުގެ ބަދަލުގައި ވީހާވެސް އަވަހަކަށް އެ ރައްޔިތުންނާ ހަވާލު ކުރަންޖެހޭ ކަމަށް ވިދާޅުވިއެވެ. ނިހާންގެ އިތުރަށް ޕީޕީއެމްގެ ނާއިބު ރައީސް އަބްދުއްރަހީމްވެސް ވަނީ އެފައިސާ ދެއްކެވުމަށް ގާސިމަށް ގޮވައި ލައްވައިފައެވެ.
"ރާއްޖޭގެ ޝަރުއީ ކޯޓުތަކަށް އާދޭހާއެކު ދެފައިގައި ހިފައި ދަންނަވަން ދިވެހި ރައްޔިތުންނަށް މި ލިބެންޖެހޭ ލާރިން ކިތަންމެ ރަށެއްގައިވެސް އަޅުގަނޑުމެން އެއްޗެހި އަޅައިދޭން އެބަޖެހެޔޭ. ފައިސާކޮޅު ދޭށޭ އަޅުގަނޑުމެންނަށް. އާދޭސްކޮށް މިދަންނަވަނީ މިފައިސާކޮޅު އަޅުގަނޑުމެންނަށް ލިބޭނެ ރިވެތި އަވަސް މަގެއް އަޅުގަނޑުމެންނަށް ހޯދައިދެއްވާށޭ. ތިޔަ ބޭފުޅުންނަށް (ކޯޓުތަކަށް) އެކަން ދަތިވާ ކަމުގައިވާނަމަ އަޅުގަނޑު މިތާގައި މިދަންނަވާލަނީ (އަޅުގަނޑު ރައީސްގެ އަރިހުން މިކަމަށް އަދި އިސްވެ އިޒްނައެއް ނުހޯދަން) ތިޔަބޭފުޅުންނަށް މިމަސައްކަތް ކުރުމުގައި އިތުރު ފަނޑިޔާރުން ބޭނުންވަންޏާ އެކަމާއި، ފަނޑިޔާރުގެއަށް ބޭނުންވާ ޖާގައިތުރު ކުރުމަށާއި، އެހެން ކަންތައްތަކަށްވެސް އެހީތެރިކަން ފޯރުވަންވެސް އަޅުގަނޑުމެން މިތިބީ ތައްޔާރަށް،" ނިހާން ވިދާޅުވިއެވެ.
ޕީޕީއެމްގެ ރުމާލު 2 ގެ ޖަގަހައިގައި ރޭ ވާހަކަ ދައްކަވަމުން ނިހާންވަނީ ގާސިމް އިބްރާހީމަށް "މިރިމިއްޔަށް ވަށިވަށްޓަށް" އަޅުއްވައި ދެއްވައިފައެވެ. އޭނާ ވަނީ ގާސިމަށް ރިސޯޓުތައް ލިބިވަޑައިގެންނެވި ގޮތާއި ގާސިމްގެ "ދޮލަނގެއް" ގެ ވާހަކަވެސް ދައްކަވައިފައެވެ.
"ގާސިމްގެ ދޮލަނގުގެ މައްސަލަ މިޖެހެނީ. މި ދޮލަނގުވެއްޖެ އުވާލަން. މިވެއްޖެ ރާއްޖޭގެ ރައްޔިތުންނަށް މުސީބާތަކަށް. ހަމަ ކޮންމެ ފަހަރަކު މިދޮނަލަގަށް އެއްޗެހި އަޅަން ހަދައިގެން ރާއްޖޭގެ ވެރިކަން ވައްޓަން އެބަޖެހޭ، ބަޣާވާތް ކުރަން އެބަޖެހޭ. ރައްޔިތުންނަށް ނޭވާ ލެވޭކަށްނެތް.،" ނިހާން ވިދާޅުވިއެވެ.
ރާއްޖޭގެ ކަންކަން މިހާރުދާ ގޮތަށް ދާކަމަށްވާނަމަ ބަނޑަށްޖެހިދާނެ ކަމަށް ގާސިމް ވިދާޅުވެފައިވާތި އެކަމަށްވެސް ނިހާން ރައްދު ދެއްވިއެވެ. "ރާއްޖެ ބަނޑަށްޖެހޭ ވާހަކަ ގާސިމް ދައްކަވާނެ ކަމެއްނެތް. ﷲ ރަހުމަތްފުޅާއެކު އަތުންފައިން މަސައްކަތްކޮށްގެން އަޅުގަނޑުމެންގެ ކާބަފައިން ކައިއުޅުނީ. އަޅުގަނޑުމެންނަށް ބިރު ދައްކަވަން ނުހައްދަވާ. ރާއްޖެއިން ބޭރުގެ މީހުން ރާއްޖެ އަރުވަން ނުގޮވާ. އެހެންވީމާ (ގޮވަންޏާ) އަޅުގަނޑުމެންގެ މުޅިސަފު އެއްކޮށްވެސް ބަވާނެ،" ނިހާން ވިދާޅުވިއެވެ.
