ރާއްޖެއަށް މިހާރު ދިމާވެފައިވާ މައްސަލަތަތަކުން އަރައިގަތުމަށްޓަކައި ދައުލަތުގެ މުއައްސަސާތަކުގެ ގާނޫނީ ވާޖިބު އަދާކުރެއްވުމަށް ޖުމްހޫރީޕާޓީގެ ލީޑަރު ގާސިމް އިބްރާހީމް ގޮވައިލައްވައިފިއެވެ.
ރާއްޖެޓީވީއަށް ފޯނުން ދެއްވި އިންޓަވިއުއެއްގައި ގާސިމް ވިދާޅުވީ ފެބުރުއަރީ 1 ގައި ސްޕްރީމްކޯޓުން ނެރުނު އަމުރަށްފަހު ރާއްޖޭގެ ހާލަތުވަނީ ވަރަށް ދަށަށްގޮސްފައި ކަމަށެވެ. އެހެންކަމުން ސިފައިންނާއި ފުލުހުންނާއި އަދިވެސް އެހެން މުއައްސަސާތަކުގެ ވާޖިބު އަދާކޮށްގެން މިކަމުން ރާއްޖެ ސަލާމަތް ކުރެއްވުމަށް އޭނާ ގޮވައިލެއްވިއެވެ.
މިހާރުގެ ހާލަތުން ރަނގަޅު ހާލަތަކަށް ބަދަލު ނުވެއްޖެ ކަމަށްވާނަމަ ބައިނަލްއަގުވާމީ މުޖުތަމައުރުން ރާއްޖެއާ ދެކޮޅަށް ފިޔަވަޅު އެޅުމުގެ ފުރުސަތު ވަރަށްބޮޑު ކަމަށް އޭނާ ވިދާޅުވިއެވެ. އިގްތިސާދީ ގޮތުން ދަތި ކުރުމުގެ ފިޔަވަޅު އަޅައިފި ކަމަށްވާނަމަ ބަނޑަޖެހި ބޭރުގައި ކިޔަވަންތިބޭ ކުދިންނަށް ޚަރަދު ކުރާނެ ފައިސާއެއްވެސް ނުލިބޭނެ ކަމަށް ގާސިމް ވިދާޅުވިއެވެ. އޭގެ އިތުރަށް ކަރަންޓުގެ އަލިކަމެއް ނުލިބޭނެ ކަމަށް ވިދާޅުވިއެވެ.
ގާސިމް ވިދާޅުވީ ރާއްޖެއަށް ބަޣާވާތެއް ގެންނަން އުޅުއްވި ކަމުގެ ތުހުމަތުކޮށް އޭނާ ފައިސާ ޚަރަދުކުރިކަމަށް ސަރުކާރުން ވިދާޅުވާ ވިދާޅުވުމަކީ އެއްވެސް އަސްލެއްނެތް ވާހަކަތަކެއް ކަމަށެވެ. އެފަދަ އެއްވެސް ކަމެއްކޮށްފައި ނުވާނެކަމަށް ﷲ ގަންދީ ހުވައި ކުރައްވާ ކަމަށްވެސް ވިދާޅުވިއެވެ.
ގާސިމް މިއަދުވަނީ ސްޕްރީމްކޯޓުގައި މިހާރު ތިއްބެވި ތިން ފަނޑިޔާރުންނަށްވެސް މެސެޖެއް ދެއްވައިފައެވެ. ގާސިމް ވިދާޅުވީ ފަސް ފަނޑިޔާރުންގެ ސޮޔާއެކު ފެބުރުއަރީ 1 ގައި ސްޕްރީމްކޯޓުން ނެރެފައިވާ އަމަރު ބާތިލްކޮށް ތިން ފަނޑިޔާރަކު ނެރުނު އަމުރަށްވުރެ ކުރީގެ އަމުރުގެ ސައްހަކަން ބޮޑުވާނެ ކަމަށް ގަބޫލު ކުރައްވާ ކަމަށެވެ.
އެހެންވީމާ "ބިރުދައްކައިގެން މިހާރު ނެރެމުންދާ ހުކުމްތަކަކީ އެއްގޮތަކަށްވެސް ސައްހަ ހުކުމްތަކަށް ނުވާނެ. އަޅުގަނޑަށް ކަށަވަރު ނުވާނެކަން،" ގާސިމް ވިދާޅުވިއެވެ.
ގާސިމް ވިދާޅުވީ ރައްޔިންގެ މަޖިލީހުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމަވާފައިވާ 12 މެމްބަރުންގެ ގޮނޑީގެ މައްސަލަ ސްޕްރީމްކޯޓުން ފެބުރުއަރީ އެކެއްގައި ނެރެފައިވާ ހުކުމާ ޚިލާފު ގޮތަކަށް ނިންމަވައިފި ކަމަށްވާނަމަ "މިތިންބޭފޭޅުން (ސްޕްރީމްކޯޓުގައި މިހާރު ތިއްބެވި ތިންފަނޑިޔާރުން) ކްރިމިނަލް ކޯޓަށް ގެންގޮސްގެން ހުކުމްކުރުން ނޫންގޮތެއް ނޯންނާނެކަމަށް އަޅުގަނޑަށް ޔަގީން،" ކަމަށެވެ.
