އައްޑޫސިޓީގައި ހެދުމަށް ހަމަޖެހިފައިވާ ރީޖަނަލް ވޭސްޓް މެނޭޖްމަންޓް ސިސްޓަމް ގާއިމް ކުރުމަށް ބޭނުންވާ އެންވަޔަރަންމެންޓް އިމްޕެކްޓް އެސެސްމެންޓް (އީއައިއޭ ހެދުމަށް ބަޔަކާ ހަވާލުކޮށްފިއެވެ.
އެ މަސައްކަތް ހަވާލުކޮށްފައިވަނީ ސީޑީއީ ޕްރައިވެޓް ލިމިޓެޑާ އެވެ. އެ މަސައްކަތް ހަވާލުކުރުމުގެ އެއްބަސްވުމުގައި އެކުންފުންޏާއި ސަރުކާރާ ދެމެދު ސޮއި ކުރައްވައިފައިވަނީ އިއްޔެވެ.
އެންވަޔަރަންމެންޓް މިނިސްޓްރީގައި ބޭއްވި ރަސްމިއްޔާތުގައި ސަރުކާރުން ފަރާތުން އެއްބަސްވުމުގައި ސޮއިކުރެއްވީ އެންވަޔަރަންމެންޓް މިނިސްޓަރ ތާރިގު އިބްރާހީމެވެ. ސީޑީއާ ޕްރައިވެޓް ލިމިޓެޑުގެ ފަރާތުން ސޮއިކުރެއްވީ އެކުންފުނީގެ ސީއީއޯ ޑރ. އަހުމަދު ޝާރިގެވެ.
މި މަސައްކަތް އެކުންފުންޏާ ހަވާލުކޮށްފައިވަނީ ހަތަރު މަސް ދުވަހުގެ ތެރޭގައި ނިންމާ ގޮތަށެވެ. މަސައްކަތުގެ އަގަކީ 324,890 (ތިންލައްކަ ސައުއްވީސްހާސް އަށްސަތޭކަ ނުވަދިހަ ރުފިޔާ) އެވެ.
މި ސިސްޓަމް އައްޑޫސިޓީގައި ގާއިމް ކުރުމުން އައްޑުއާއި، ފުވައްމުލަކާއި، ހުވަދު އޮތޮޅުގެ ކުނި ޖަމާކުރާނީ އެ ތަނަށެވެ. މައުލޫމާތު ލިބިފައިވާ ގޮތުގައި މި ސިސްޓަމް ގާއިމް ކުރުމަށް ހަމަޖެހިފައިވަނީ އައްޑޫ ސިޓީ ހިތަދޫ ކުނިކޮށި ހުންނަ ސަރަހައްދުގައެވެ.
