އައްޑޫ ތާރީޚު ކޮމިޓީ އުފައްދަވައި، ރައީސަކަށް އަބްދުﷲ ނައީމް އިންތިޚާބު ކޮށްފި

އައްޑޫ ސިޓީގެ ތާރީޚާއީ ސަގާފަތަށް ޚިދުމަތްކުރާ ކޮމިޓީ އުފައްދައި ކޮމިޓީގެ މަގާމްތަކަށް މީހުން ހޮވައިފިއެވެ.

ޖުމްލަ 7 މެންބަރުން ހިމެނޭ ކޮމިޓީގެ މެންބަރުންގެ މެދުގައި މިއަދުނެގި ވޯޓުން ކޮމިޓީގެ ރައީސަކަށް ހޮވިވަޑައޮގެންނެވީ އާފަތިސް ނޫހުގެ އެޑިޓަރ، ފޭދޫ، އާރާމުގޭ، އަބްދުﷲ ނައީމް އިބްރާހީމެވެ. ނާއިބު ރައީސަކަށް ހޮވިވަޑައިގެންގެންނެވީ ސ. މީދޫ، އަންދަލީބުގޭ، ސަފްވާން ޝަފީގެވެ.

އެދެބޭފުޅުންގެ އިތުރަށް ކޮމިޓީގައި ހިމެނިވަޑައިގަންނަވާ ބޭފުޅުންނަކީ، ހިތަދޫ، ފިސްފިސާގޭ، ސައުދުﷲ ހަމީދާއި، ހިތަދޫ، ޓޯކިޔޯވިލާ، އިބްރާހީމް ފިރާގާއި، ހިތަދޫ، ސިލްވަރުގޭ، އަލީ އަހުމަދާއި، ފޭދޫ، އާފަހި، އަލީ ފަހުމީ އަހުމަދާއި، މަރަދޫ، ނަރުގިސްގޭ، އާމިނަތު އަމީޒާ ޚަލީލެވެ.

އައްޑޫސިޓީގެ ޑެޕިޔުޓީ މޭޔަރު މުހައްމަދު ޔަސްރިފް ވިދާޅުވީ މި ކޮމިޓީގެ މައިގަނޑު މަސައްކަތަކަށްވާނީ އައްޑޫ ސިޓީގެ ތާރީޚާއި ސަގާފަތް ދިރުވައި އާލާ ކުރެއްވުމެވެ. އެކަން ފުރިހަމަ ކުރެއްވުމަށް އައްޑޫ ސިޓީގެ ތާރީޚު ދިރާސާކޮށް އޭގެ ހަގީގަތް ހޯދައި އެއްގޮތް ކުރެއްވުމުގެ މަސައްކަތް ކޮމިޓީން ކުރައްވާނެއެވެ.

"އައްޑޫގެ ތާރީޚުގެ ވާހަކަ ދައްކާ ކަމަށްވާނަމަ އެއްވާހަކައެއް އެންމެންވެސް ދެއްކުން މަގުސަދަކީ. ތަފާތު ވާހަކަ ދައްކާ ކަމަށްވާނަމަ އަންނަންއޮތް ޖީލަށްވެސް އޮޅުން ބޮޅުން އަރައި ވާނުވާނޭނގޭނެ. އެހެންވީމާ އަންނަންއޮތް ޖީލަށް އައްޑޫގެ ތާރީޚާއި ސަގާފަތާއި، ކުރީގެ ދިރިއުޅުމުގެ ވާހަކަ އޭގެ އަސްލު ގޮތުގައި ފޯރުކޮށްދިނުމުގެ މަސައްކަތް މިކޮމިޓީން ކުރައްވާނީ،" ޔަސްރިފް ވިދާޅުވިއެވެ.

އޭނާ ވިދާޅުވީ އައްޑޫގެ ތާރީޚު އެއްކުރެއްވުމަށްފަހު މި ކޮމިޓީގެ ފަރާތުން ފޮތެއްވެސް ލިޔުއްވާނެއެވެ. ފޮތުގައި ހިމަނާނެ ބައިތަކާއި، ވާހަކަތައް ކަނޑައަޅުއްވާނީ ކޮމިޓީން ކަމަށްވެސް އޭނާ ވިދާޅުވިއެވެ. ކޮމިޓީއަށް ލަފާ ދެއްވާނީ އައްޑޫ ސިޓީ ކައުންސިލުންނެވެ.