މިމަހު 5 ވަނަދުވަހުގެ ރޭ ރާއްޖޭގައި ރައީސުޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް 15 ދުވަހަށް އިއުލާން ކުރެއްވި ކުއްލި ނުރައްކަލުގެ ހާލަތު 30 ދުވަހަށް އިތުރު ކުރުމަށް ރައްޔިތުންގެ މަޖިލީހުގެ މިއަދުގެ ޖަލްސާއިން ފާސްކޮށްފިއެވެ.
ދައުރުން ބޭރުގައި މިއަދު ބޭއްވި ޖަލްސާގައި ކުއްލި ނުރައްކަލުގެ ހާލަތު އިއުލާން ކުރުމުގެ ގަރާރާއި މިހާރު އިއުލާން ކުރައްވައިފައވާ ކުއްލި ނުރައްކަލުގެ ހާލަތު 30 ދުވަހަށް އިތުރުކުރަން ފާސްކޮށްފައިވަނީ ޖަލްސާގައި ބައިވެރިވި 38 މެންބަރުންގެ އިއްތިފާގުންނެވެ.
ޕީޕީއެމްގެ ޕީޖީލީޑަރު ކުރިން ވިދާޅުވެފައިވަނީ މަޖިލީހުގެ ފުލޯގައި 43 މެންބަރުން ނެތީސް އެގަރާރު ފާސްނުކުރެވޭނެ ކަމަށެވެ. އެހެންނަމަވެސް ގަރާރު އެންމެފަހު ވަގުތު ފާސްކޮށްފައިވަނީ 38 މެންބަރުންގެ ވޯޓުންނެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހު ވިދާޅުވީ ކުއްލި ނުރައްކަލުގެ ހާލަތަކީ ރައްޔިތުން އެއަށް އަމަލުކުރުން ލާޒީމްކުރާ ކަންތައްތަކުގެ ތެރޭގައި ހިމެނޭ ކަމެއްނޫން ކަމަށެވެ. އެހެންވީމާއި މިއަދުގެ ޖަލްސާގައި ވޯޓަށް އައްސަވައި ގަރާރު ފާސްކޮށް ކުއްލި ނުރައްކަލުގެ ހާލަތު 30 ދުވަހަށް އިތުރު ކުރުމަށް ނިންމީ ކުރިން އަމަލުކުރާ އާންމު އުސޫލުގެ ދަށުން ކަމަށެވެ.
މިއަދުގެ ޖަލްސާގައި އިދިކޮޅު އެއްވެސް މެންބަރަކު ބައިވެރިއެއް ނުވެއެވެ.
