ސަރުކާރަށް އައްޔަން ކުރައްވާފައިވާ ވަޒީރުންގެ ތެރެއިން 19 ވަޒީރަކަށް ރުހުން ދީފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓްރީ އޮފް ސިޓީ، ލޯކަލް ގަވަނަންސް މިނިސްޓަރު އާދަމް ޝަރީފަށް ރުހުން ދޭން ފެންނަ ކަމަށް ނިންމީ ވޯޓުގައި ބައިވެރިވެވަޑައިގެންނެވި 70 މެމްބަރުންގެ އިއްތިފާގުންނެވެ. އަދި ޔޫތު މިނިސްޓަރު އިބްރާހިމް ވަހީދު (އަސްވާޑް) އަށް ރުހުން ދިނުމަށް ފާސްވީ ވޯޓުގައި ބައިވެރިވެވަޑައިގެންނެވި 68 މެމްބަރުންގެ އިއްތިފާގުންނެވެ.
މީގެ އިތުރުން އެގްރިކަލްޗާ މިނިސްޓަރު ޑރ. އައިޝަތު ރަމީލާ އަށް 70 މެމްބަރުން ވޯޓުދއްވިއިރު، ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބަށް 70 މެމްބަރުން، ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ އަށް 66 މެމްބަރުން ވޯޓުދެއްވިއެވެ. އަދި ދިވެހި ލެންގުއޭޖް، ކަލްޗާ އެންޑް ހެރިޓޭޖް މިނިސްޓަރު އާދަމް ނަސީރަށް 63 މެމްބަރުން ވޯޓުދެއްވިއެވެ.
ޓްރާންސްޕޯޓް މިނިސްޓަރު މުހައްމަދު އަމީނަށް ރުހުން ދޭން ފެންނަ ކަމަށް 66 މެމްބަރުން ވޯޓު ދެއްވިއިރު، އެންވަޔަރަމަންޓް މިނިސްޓަރު ތޯރިގް އިބްރާހިމަށް ރުހުން ދިނުމަށް ފާސްވީ 69 މެމްބަރުންގެ އިއްތިފާގުންނެވެ. އަދި ސްޕޯޓް މިނިސްޓަރު އަބްދުﷲ ރާފިއު އަށް 70 މެމްބަރުން ވޯޓުދެއްވިއެވެ. އަދި ޖެންޑާ މިނިސްޓަރު ޑރ. އައިޝަތު ޝިހާމަށް ރުހުން ފާސް ކުރީ ވޯޓުގައި ބައިވެރިވެވަޑައިގެންނެވި 71 މެމްބަރުންގެ އިއްތިފާގުންނެވެ.
ޓޫރިޒަމް މިނިސްޓަރު އިބްރާހިމް ފައިސަލް އަށް ރުހުން ދިނުމަށް ފެންނަ ކަމަށް 58 މެމްބަރުން ވޯޓު ދެއްވާފައިވާއިރު،ފިޝަރީޒް މިނިސްޓަރު އަހުމަދު ޝިޔާމަށް69 ވޯޓު، އިކޮނޮމިކް މިނިސްޓަރު މުހައްމަދު ސައީދަށް 37 މެމްބަރުން ވޯޓު، ހެލްތު މިނިސްޓަރު ޑރ. އަބްދުﷲ ހަލީލަށް 69 މެމްބަރުންގެ ވޯޓު ލިބުނެވެ. އަދި އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އަށް 55 މެމްބަރުން ވޯޓު، ނޭންސް މިނިސްޓަރު ޑރ. މުހައްމަދު ޝަފީގަށް 70 މެމްބަރުން ވޯޓުދެއްވިއެވެ.
މީގެ އިތުރުން މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާނަށް ރުހުން ދޭން ކަމަށް ފާސްވީ 68 މެމްބަރުންގެ އަޣުލަބިއްޔަތުންނެވެ. އަދި ފޮރިން މިނިސްޓަރު މޫސާ ޒަމީރަށް 70 މެމްބަރުންގެ އިއްތިފާގުން ރުހުން ދިންއިރު، ޑިފެންސް މިނިސްޓަރު ޣައްސާން މައުމޫން އަށް ރުހުން ދިނުމަށް ފާސްވީ ވޯޓުގައި ބައިވެރިވެވަޑައިގެންނެވި 71 މެމްބަރުންގެ އިއްތިފާގުންނެވެ.
އެހެންނަމަވެސް ހައުސިން މިނިސްޓަރު ޑރ. އަލީ ހައިދަރަށް ރުހުން ނުދިނުމަށް މަޖިލިހުން ފާސްވީ 46 މެމްބަރުންގެ އަޣުލަބިއްޔަތުން. ހައިދަރަށް ރުހުން ދޭން ފެނުނީ 24 މެމްބަރުންނަށްނެވެ. އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށްވެސް ރުހުން ނުދިނުމަށް ވަނީ ފާސްކޮށްފައެވެ. ރުހުނެްދޭން ނުފެންނަ ކަމަށް 31 މެމްބަރުން ވޯޓު ދެއްވިއިރު، ރުހުން ދޭން ފެންނަ ކަމަށް ވޯޓު ދެއްވީ 30 މެމްބަރުންނެވެ.
މީގެ އިތުރުން ބަންޑާރަ ނައިބު އަހުމަދު އުޝާމަށް ވެސް ރުހުން ދިނުމަށް ފާހެއް ނުވިއެވެ. އޭނާ އަށް ރުހުން ދޭން ނުފެންނަ ކަމަށް 44 މެމްބަރުން ވޯޓު ދެއްވިއިރު، ރުހުން ދޭން ފެންނަ ކަމަށް ވޯޓު ދެއްވީ 24 މެމްބަރުންނެވެ.
