އައްޑޫ ސިޓީ ހުޅުދޫ އާއި ހިތަދޫއާ ދެމެދު ބްރިޖު މަޝްރޫއުގެ މަސައްކަތް ފަސް އަހަރު ތެރޭ ނިންމަވާނެ ކަަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ވިދާޅުވީ އަޅާނީ އަނގަ ބަހަކުން ނޫން ކަމަށާއި މި ބްރިޖު އެޅުމުގެ މަސައްކަތަށް ބޭނުންވާ ސާވޭއަށް މި އަހަރުގެ ބަޖެޓުގައި 30 މިލިއަން ރުފިޔާ ހިމަނާފައިވާ ކަމަށެވެ.
ބްރިޖުގެ މަސައްކަތް މިއަހަރު ތެރޭ ފެށުމަށް ބޭނުންފުޅުވާ ކަމަށް މީގެކުރިން ވެސް ވިދާޅުވެފައިވާއިރު، ދާދި ފަހުން ސަރުކާރުން ހާމަކުރެއްވިގޮތުގައި އެ ބްރިޖްގެ މަޝްރޫއު ކުރިއަށް ގެންދިއުމަށް މިސްރުގެ ކުންފުންޏަކުންޝައުގުވެރިކަން ފާޅުކޮށްފައެވެ. އަދި އެކަމަށް ބޭނުންވާ ސާރވޭ ހިލޭ ފުރިހަމަކޮށް ދިނުމަށް ދިވެހި ސަރުކާރަށް ހުށަހަޅާފައެވެ.
އެމަނިކުފާނު ވިދާޅުވީ ކުރެހުމާއި، އިންޖިނިއަރިންގ ޑިޒައިނެއް ނިންމާފައި، އެ ބުރިޖްގެ މަސައްކަތް، މި ދައުރުގެ ތެރޭގައި ނިންމަވާނެ ކަމަށެވެ.
ރައީސް ދާދިފަހުން ޗައިނާ އަށް ކުރެއްވި ދަތުރުފުޅުގައި ޗައިނާގެ އިންވެސްޓަރުން ބައިވެރިވެވަޑައިގެންނެވި ފޯރަމްގައި އިންވެސްޓްކޮށް ދެއްވުމަށް އެދިވަޑައިގެންނެވި އެއް މަޝްރޫއުގެ ތެރޭގައި ވެސް އައްޑޫ ބްރިޖު ހިމެނެއެވެ.
ޗައިނާގެ ކުންފުންޏަކުން އެކަމަށް ޝައުގުވެރިކަން ފާޅުކުރި ކަމަށް ވެސް ކޮންސްޓްރަކްޝަން މިނިސްޓަރު އަބްދުالله މުއްތަލިބު ވިދާޅުވެފައިވެއެވެ.
ހުޅުމީދު އާއި ހިތަދޫ ބްރިޖަކުން ގުޅާލާ ވާހަކައަކީ އެކިއެކި ރިޔާސީ ކެމްޕޭންތަކުގައި މީގެ ކުރިން އެކިއެކި ބޭފުޅުން ދައްކަވާފައި ހުރި ވާހަކައެކެވެ. އެގޮތުން ކުރީގެ ރައީސް އަބްދުﷲ ޔާމީން ވަނީ 2018 ވަނަ އަހަރުގެ ރިޔާސީ ކެމްޕެއިންގެ ތެރޭގައި އެ ބްރިޖު ހަގީގަތަކަށް ހައްދަވައި ދެއްވުމަށް ވައުދުވެވަޑައިގެންފައެވެ.
އައްޑޫގައި ހަދާ ބްރިޖު ވާނީ ރާއްޖޭގައި ހަދާނެ އެންމެ ބޮޑު ބްރިޖަށެވެ. ހިތަދު އާއި ހުޅުމީދޫ ގުޅާލުމަށް ގާތްގަނޑަށް 13-15 ކިލޯމީޓަރުގެ ދިގު ބްރިޖެއް އަޅަން ޖެހެއެވެ
