ރާއްޖެއަށް މަސްތުވާތަކެތި އެތެރެކުރަން އުޅުނު ދެމަފިރިން ހައްޔަރުކޮށްފިއެވެ.
މޯލްޑިވްސް ޕޮލިސް ސަރވިސް އިން ވިދާޅުވީ ވައިގެ މަގުން ރާއްޖެއަށް އެތެރެކުރި ގިނަ އަދަދެއްގެ މަސްތުވާތަކެއްޗާއެކު ދިވެހި ދެމަފިރިއަކު ފުލުހުން ހައްޔަރުކޮށްފައިވާ ކަަމަށެވެ.
އެގޮތުން ވައިގެ މަގުން ރާއްޖެ އައިއިރު ގެނައި ލަގެޖު ފޮށިން އެކި ބާވަތުގެ، ގިނަ އަދަދެއްގެ މަސްތުވާތަކެތި ފެނުމާއި ގުޅިގެން ހައްޔަރުކޮށްފައިވަނީ އުމުރުން 27 އަހަރުގެ ފިރިހެނަކާއި 20 އަހަރުގެ އަންހެނެއް ކަަމަށް ފުލުހުން ވިދާޅުވެއެވެ. އަދި އެދެމީހުން ހައްޔަރުކޮށް އެ މީހުންގެ ކުޑަކަމުދާތަކެތި ޓެސްޓް ކުރިއިރު، ޑްރަގްގެ ބާވަތެއް ކަމަށްވާ ސީއޯސީ އާއި ޓީއެޗްސީ އާއި ބެންޒޯއަށް ޕޮސިޓިވްވެފައިވާ ކަމަށް ވެސް ވިދާޅުވެއެވެ.
މި މައްސަލާގައި އެ ދެ މީހުން ބަންދާ މެދު ގޮތެއް ނިންމުމަށް ކްރިިމިނަލް ކޯޓަށް ހާޒިރުކޮށް، ފުލުހުން ވަނީ މަސްތުވާތަކެތި ފެނުނު ފޮށިގަނޑުން އެ ދެ މީހުންގެ އަންނައުނު ވެސް ފެނިފައިވާ ކަމަށް ބުނެފައެވެ. އެހެންނަމަވެސް އެ ދެމީހުން ވަނީ އެ ފޮށިގަނޑަަކީ އެމީހުންގެ އެއްޗެއްކަމަށް އިންކާރުކޮށް، އެއީ މީހަކު އެމީހުންނާ ހަވާލުކުރި އެއްޗެއްކަމަށް ބުނެފައެވެ.
މި މައްސަލައިގައި ހުށަހަޅާފައިވާ ހެކިތަކަށް ރިއާޔަތްކޮށް އެ ދެ މީހުންގެ ބަންދަށް 15 ދުވަސްވަނީ ޖަހާފައެވެ.
މީގެ އިތުރުން ކޯޓުން ނެރުނު އަމުރުގައި، ފުލުހުންނާ ހަވާލާދީ ބުނެފައިވަނީ މިކަމުގައި އިތުރު ބަަޔަކު ބައިވެރިވާކަމަށް ބުރަވެވޭ ކަމަށާއި ކުށް ކޮށްފައިވަނީ ޖަމާއަތް ހަދައިގެން ކަމަށް ބެލެވޭ ކަމަށެވެ.
