ދެކުނު އެފްރިކާގެ ރައީސް ކަމުގެ މަގާމުގެ ހުވައި އެގައުމުގެ ބޮޑުވަޒީރަކަށް ހުންނެވި ސީރިލް ރަމަފޯސާ ކުރައްވައިފިއެވެ.
ދެކުނު އެފްރިކާގެ ރައީސް ކަމުގެ މަގާމާ ހަވާލުވެ ވަޑައިގެން މަގާމުގެ ހުވައި އެމަނިކުފާނު ކުރައްވައިފައިވަނީ މިއަދުގެ ވަގުތެއްގައެވެ. އެ މަނިކުފާނު ހުވައި ކުރައްވައިފައިވަނީ ރައީސް އޮފިހުގައި ބޭއްވި ރަސްމިއްޔާތެއްގައެވެ. ރައީސް ކަމުގެ ހުވައި ލައިދެއްވީ އެ ގައުމުގެ އުއްތަމަ ފަނޑިޔާރު މޮގެންގް މޮގެންގް އެވެ.
ރަމަފޯސާ ރައީސް ކަމަށް އައްޔަން ކުރައްވައިފައިވަނީ އެގައުމުގެ ރައީސަކަށް ހުންނެވި ޖެކޮބް ޒުމާ އިސްތިއުފާ ދެއްވުމުގެ ސަބަބުންނެވެ. އަންނަ އަހަރު އެގައުމުގައި ބޭއްވުމަށް ހަމަޖައްސާފައިވާ ރިޔާސީ އިންތިޚާބާ ހަމައަށް ރަމަފޯސާ ރައީސް ކަމުގައި ހުންނަވާނެއެވެ.
ޒުމާ އިސްތިއުފާ ދެއްވާފައިވަނީ ހިޔާނަތާއި ފަސާދައިގެ މައްސަލަ ތަކެއްގެ ތުހުމަތު އޭނާގެ މައްޗަށް ކުރެވުމުންނެވެ. އެ ތުހުމަތައް ކުރެވުމުން ވެރިކަންކުރާ ޕާޓީ އެފްރިކަން ނޭޝަނަލް ކޮންގްރެސް (އޭއެންސީ) އިން ވަނީ އިސްތިއުފާ ދެއްވުމަށް ޒުމާއަށް އަންގަވައިފައެވެ.
ދެކުނު އެފްރިކާގައި ދިރިއުޅެމުންދާ އިންޑިއާގެ މުއްސަނދި ދަރިކޮޅެއް ކަމަށްވާ ގުޕްތާ ޚާންދާނާ ގުޅިގެން ގައުމުގައި ފަސާދަ އާއި ކޮރަޕްޝަން ހިންގުމުގެ ތުހުމަތުގައި އިދިކޮޅު ފަރާތްތަކުން ޒުމާގެ އިތުބާރުނެތް ކަމުގެ މައްސަލަ އެ ގައުމުގެ ގާނޫނުހަދާ މަޖިލީހަށް ދެ ފަހަރެއްގެ މަތިން ހުށަހެޅިއެވެ. އެހެން ނަމަވެސް އެ ދެފަހަރުވެސް އޭއެންސީ އިން ވަނީ ޒުމާ ދިފާއުކުރައްވާފައެވެ.
ގުޕްތާ ޚާންދާނާއެކު އޮންނަ ގާތްގުޅުމަށް އިއުތިރާފުވެ ޒުމާ ވަނީ އެ އެކުވެރިކަމުގެ ސަބަބުން އެއްވެސް ކަހަލަ ކޮރަޕްޝަނެއް ހިނގަވާފައި ނުވާ ކަމަށް ވިދާޅުވެފައެވެ. ނަމަވެސް މިދިޔަ ޑިސެމްބަރުމަހު އޭއެންސީގެ ލީޑަރުކަމަށް ރަމަފޯސާ އައްޔަން ކުރުރެވުނު ފަހުން އެޕާޓީން ގެންދިޔައީ ޒުމާ އިސްތިއުފާ ދެއްވުމަށް ބާރު އަޅަމުންނެވެ.
އެގޮތުން އެޕާޓިން އެންމެ ފަހުން ބޭއްވި ބައްދަލު ވުމަށްފަހު އެޕާޓީން ޒުމާ އަށް އަންގަވާފައިވަނީ މަގާމުން އިސްތިއުފާ ނުދެއްވައިފިނަމަ އިތުބާރުނެތް ކަމުގެ ވޯޓެއް ނަގައި ވެރިކަމުން އަޒުލް ކުރައްވާނެކަމަށެވެ.
ޒުމާގެ މައްޗަށް ކުރެވިފައިވާ ތުހުމަތުތަކުގެ ތެރޭގައި، ވެރިކަމަށް އިސް ކުރެވުމާއެކު އޭނާގެ އެންކަންޑްލާ ގެކޮޅުގެ މަރާމާތަށް ދައުލަތުގެ ޚަޒާނާއިން ބޮޑެތި ހޭދަތަކެއް ކުރައްވައިފައެވެ.
މީގެ އިތުރުން މަގާމުގެ ނުފޫޒާއި ބާރު ބޭނުން ކުރަވައިގެން މުއައްޒަފުން ވަޒީފާއިން ވަކި ކުރެއްވުމާއި ބޭނުން ފަރާތްތަކަށް ވަޒީފާގެ ފުރުސަތު ހޯއްދަވައިދެއްވުންވެސް ހިމެނެއެވެ.
