އަމިއްލައަށް ވިޔަފާރިއެއް ފަށަން ބޭނުންވާ އަންހެނުންނަށް ލޯނު ދޫކުރާ ސްކީމް ފުރަތަމަ ފަހަރަށް މިއަދު ތައާރަފްކޮށްފިއެވެ.
އެސްކީމް ހުޅުވުމަށްފަހު މިއަދުވަނީ އެއަށް ކުރިމަތިލުމުގެ ފުރުސަތުވެސް ހުޅުވައިފައެވެ. މިސްކީމުގެ ދަށުން ލޯނު ލިބޭނީ އަލަށް ވިޔަފާރި ފަށަން ބޭނުންވާ އަންހެނުންނަށާއި، މިހާރުވެސް ވިޔަފާރިކުރަމުންދާ އަންހެނުންގެ ތެރެއިން އެ ވިޔަފާރު ތަރައްގީ ކުރަން ބޭނުންވާ ކަނބަލުންނަށެވެ.
މިނިސްޓްރީއޮފް އިކޮނޮމިކް ޑިވެލޮޕްމެންޓުން ވިދާޅުވިގޮތުގައި މިސްކީމް ފެށީ 20 މިލިއަން ރުފިޔާގެ ބަޖެޓަކުންނެވެ. މި ބަޖެޓުން ދޫކުރާނީ 50،000
ރުފިޔާއާއި، 100،000 ރުފިޔާގެ ލޯނެވެ.
ފަންސާސް ހާސް ރުފިޔާއަށްވުރެ ބޮޑު ލޯނެއް ނަގާކަމަށްވާނަމަ، އެ ލޯނަށްވާ އަދަދުގެ 130 ޕަސެންޓްގެ އަގުހުރި ރަހުނެއް ބަހައްޓަންޖެހެއެވެ. އެ ލޯނުގެ އިންޓަރެސްޓް ރޭޓަކީ ނުވަ ޕަސެންޓް ކަމަށްވެސް މިނިސްޓްރީން ވިދާޅުވިއެވެ. ލޯނަށް އެދޭ އަދަދުގެ 15 ޕަސެންޓް ފައިސާ އިންވެސްޓް ކުރަންޖެހޭނީ އަމިއްލައަށެވެ. ލޯނު ދައްކަން ޖެހެނީ 8 އަހަރަށް ބަހައިގެންނެވެ. ލޯނު ދައްކަން އަހަރުގެ ގްރޭސް ޕީރިއަޑެއް ލިބޭނެ ކަމަށްވެސް މިނިސްޓްރީން ވިދާޅުވިއެވެ. މުއަދަތު 6 މަހަސްވެސް ކުޑަކޮށްލެވިދާނެއެވެ. ގްރޭސް ޕީރިއަޑެއް ދެއްވިޔަސް އެމުއްދަތުގައިވެސް އިންޓަރެސްޓަށް އަރާ ފައިސާ ދައްކަންޖެހޭނެ ކަމަށް މިނިސްޓްރީން ވިދާޅުވިއެވެ.
ލޯނަށް އެދޭ ފޯމު ބަލައިގަތުމަށް ހަމަޖެހިފައިވަނީ ފެބުރުއަރީ 26 އިން މާޗު އެކެއްގެ ނިޔަލަށެވެ. ލޯނަށް އެދި ހުށަހަޅާ ފޯމާއި ބިޒްނަސް ޕްލޭން ފޯމެޓް، އިކޮނޮމިކް މިނިސްޓްރީގެ ވެބްސައިޓުން ލިބެން ހުންނާނެއެވެ. މައުމޫމާތު ލިބިފައިވާ ގޮތުގައި އޮންލައިންކޮށްވެސް މި ލޯނަށް އެދުމުގެ މަގުވަނީ ތަނަވަސް ކޮށްދެއްވައިފައެވެ. މިނިސްޓްރީގެ ވެބްސައިޓުގެ އިތުރަށް ރާއްޖޭގެ 6 ސަރަހައްދުގައި ގާއިމްކޮށްފައިވާ 6 ރީޖަނަލް ސެންޓަރުތަކުންވެސް ފޯމު ލިބިވަޑައިގަންނަވާނެއެވެ.
