ރައީސް ނަޝީދަކީ އަބަދުވެސް އެހެން މީހުންގެ މަސައްކަތުން ފޮނިބޯ މީހެއް ކަމަށް ޕީޕީއެމްއިމް ބުނެފިއެވެ.
އެޕާޓީން މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިންނަށް މައުލޫމާތު ދެއްވަމުން އެޕާޓީގެ ނާއިބު ރައީސް އަބްދުއްރަހީމް އަބްދުﷲ ވިދާޅުވީ މިދޭތެރެއަކުން ވަރަށް ހަރަކާތްތެރިވެފައި މިހާރު މަޑުން ހުންނެވީ ރައީސް ނަޝީދަށް ދެން ދައްކާނެ ވާހަކައެއްވެސް ނެތިގެން ކަމަށެވެ.
އެހެން ހުންނަވާފައި އެހެންބަޔަކު މަސައްކަތެއް ފަށައިގެން ފުރުސަތެއް ލިބިވަޑައިގެންފި ކަމަށްވާނަމަ އަނެއްކާވެސް އެމަނިކުފާނުގެ އަޑު އިވެން ފަށާނެ ކަމަށެވެ. "ނަޝީދަކީ އަބަދުވެސް އެހެން މީހުންކުރާ މަސައްކަތުން ފޮނިބޯން މަސައްކަތް ކުރަމުން ގެންދާމީހެއް. އޭނާއަކީ އަމިއްލަ ގާބިލް ކަމާއެކީ އެއްވެސް ކަމެއް ކުރެވޭނެ މީހެއްނޫން،" އަދުރޭ ވިދާޅުވިއެވެ.
ރާއްޖެއަށް މިހާރު ދިމާވެފައިވާ ސިޔާސީ ހަލަބޮލި ކަމުން އަރައިގަތުމަށް މަންދޫބަކާއެކު އަސްކަރީ ފައުޖެއް ރާއްޖެ ފޮނުވައި ދެއްވުމަށް ނަޝީދު ވަނީ އިންޑިއާގެ ކިބައިން އެދިފައެވެ. އެކަމާ ގުޅިގެން ބައެއް ފަރާތްތަކުން އެމަނިކުފާނަށް ވަރަށްބޮޑަށް ފާޑިވިދާޅުވިއެވެ. ފާޑުވިދާޅުވި ބޭފުޅުންގެ ތެރޭގައި ޖުމްހޫރީ ޕާޓީގެ ލީޑަރު ގާސިމް އިބްރާހީމް ހިމެނި ވަޑައިގަންނަވައެވެ.
