އިދިކޮޅު ފަރާތްތަކުން ބޭނުންވަނީ ކޮންމެ ގޮތެއް ހަދައިގެންވެސް ރިޔާސީ އިންތިޚާބުގެ ކުރިން ވެރިކަން ވައްޓާލަން ކަމަށް ޕީޕީއެމްގެ ނާއިބު ލީޑަރު އަބްދުއްރަހީމް އަބްދުﷲ ވިދާޅުވެއްޖެއެވެ.
ޕީޕީއެމްއިން މިއަދު ބޭއްވި ނޫސްވެރިންގެ ބައްދަލުވުމެއްގައި އަދުރޭ ވިދާޅުވީ އިންތިޚާބުގެ ކުރިން ވެރިކަން ވައްޓައެއް ނުލެވޭނެ ކަމަށެވެ. ސަރުކާރުން ގެންދަވަނީ އެއަށްވުރެ ބޮޑަށް ރައްޔިތުންނަށް ޚިދުމަތްކޮށްދީ ތަރައްގީގެ މަޝްރޫއުތައް ހިންގައި ބޭރު ގައުމުތަކާ ގުޅުން ބަދަހިކުރަމުން ކަމަށް އޭނާ ވިދާޅުވިއެވެ.
"އިންތިޚާބު ވަކިވަރަކަށް ކާމިޔާބުވީމާ އިދިކޮޅު މީހުންނަށް އެބައެނގޭ މިނިވަން އިންސާފުވެރި އިންތިޚާބެއްގައި ރައީސް ޔާމީނާ ވާދަކޮށްގެން ކާމިޔާބު ނުކުރެވޭނެ ކަމަށް. މިއީ ދުވާލެއްހާ ޔަގީން ކަމެއް އަޅުގަނޑުމެންނަށް އިރާދަކުރެއްވިއްޔާ،" އަދުރޭ ވިދާޅުވިއެވެ.
ރައީސް ޔާމީނާ ވާދަކޮށްގެން އިންތިޚާބުގައި ކާމިޔާބު ނުވާނެކަން ކަށަވަރުވާތީ ވެރިކަން ވައްޓާލުމަށް އިދިކޮޅު ފަރާތްތަކުން ނުކުތީ ކޮންމެ ފަދަކަމެއްވެސް ކުރަން ތައްޔާރު ވެގެން ކަމަށް އޭނާ ވިދާޅުވިއެވެ. "އެއީ ދީނާ ޚިލާފުކަމެއް ކަމަށްވިޔަސް، ގާނޫނާ ޚިލާފު ކަމެއް ކަމަށްވިޔަސް އަދި އެއީ ރައްޔިތުންނަށް ކިތަންމެ ބޮޑު ގެއްލުމެއް ލިބޭނެ ކަމެއް ކަމަށްވިޔަސް އެއީ ދައުލަތް ހުއްޓޭވަރުގެ ކަމެއްކަމަށްވިޔަސް މިގައުމުގެ އިސްތިގުލާލަށް ބުރޫއަރާކަމެއް ކަމަށްވިޔަސް އެކަމެއްކޮށްގެން އެމީހުން ބޭނުންވަނީ ވެރިކަން ނިންމާލަން ކަމަށް އަދުރޭ ވިދާޅުވިއެވެ.
ރިޝްވަތު ދިނުމަކީ ދީނީ ގޮތުން ހަރާމް ކަމެއްކަން އެންމެ ރަނގަޅަށް ބުނެދިން މީހުން ވެރިކަން ވައްޓާލަން ކުރި މަސައްކަތުގައި ބައިވެރިވެފައިވާކަން ޕޮލިހުންގެ ބަޔާންތަކުން ފެންނަމުންދާ ކަމަށްވެސް އޭނާ ވިދާޅުވިއެވެ. ރިޝްވަތު ދިނުމުގެ ނުބައިކަމުގެ ވާހަކަ ގުރުއާނުގެ އާޔަތްތަކުން ދައްކައިދިން މީހުން ވަނީ އެންމެ ފަހުން ވެރިކަން ވައްޓާލަން ކުރި "ބަޣާވާތުގައި" ބައިވެރިވެ ރިޝްވަތު ދީފައި ކަމަށް އޭނާ ވިދާޅުވިއެވެ.
ގާނޫނު އަސާސީން ލިބިފައިނުވާ ބާރެއް ބޭނުންކޮށްގެން ސްޕްރީމް ކޯޓުގައި ތިބި ދެ ފަނޑިޔާރަކު ލައްވައި ދައުލަތް ހުއްޓުމަކަށް ގެނައުމަށް މަސައްކަތް ކުރުމަކީ ގާނޫނާ ޚިލާފު ކަމެއް ކަމަށްވެސް އޭނާ ވިދާޅުވިއެވެ.
