ރާއްޖޭގެ ގާނޫނީ ސަރުކާރު ވައްޓާލުމަށް ބޮޑުކުންފުންޏަކުން 2.4 މިލިއަން ޑޮލަރު އުއްތަމަ ފަނޑިޔާރު އަބްދުﷲ ސައީދަށް ލިބިވަޑައިގެންފައިވާ ކަމަށް ފުލުހުން ވިދާޅުވެއްޖެއެވެ.
"ރިޝްވަތުގެ ގޮތުގައި ލިބިފައިވާ އެ ފައިސާ ބޭނުން ކޮށްގެން ރާއްޖެއިންނާއި ރާއްޖެއިން ބޭރުން އަގުބޮޑެތި ޕްރޮޕަޓީސް ގަތުމަށް އެތަންތަން ބަލަން ދަތުރުކޮށް އެތަންތަނަށް ޒިޔާރާތްކޮށް މިވިޔަފާރިތައް މިގޮތަށްހިންގާ ކަމުގެ ކިތާބީހެކި އަޅުގަނޑުމެންނަށް ލިބިފައިވަނީ. މިކަންކަންވަނީ ފުލުހުންގެ ތަހުގީގަށް ޔަގީން ކުރެވިފައި،" ޝިފާން ވިދާޅުވިއެވެ.
މީގެ އިތުރަށް އަބްދުﷲ ސައީދު މައްޗަށް ޔަގީންވެފައިވާ އަނެއްކަމަކީ ދައުލަތް ހިންގުމަށް ގަސްތުގައި ހުރަސްއެޅުމާއި، އެކަން އެ ގޮތަށް ކުރުމަށް ސްޕްރީމްކޯޓުގެ އައިޓީ ވިއުގަ ހުއްޓުވުމަކަށް ގެނައުމެވެ. އެކަން ކޮށްފައިވަނީ ސީދާ އަބްދުﷲ ސައީދު އަމުރު ކުރައްވައިގެން ކަމަށް ތަހުގީގަށްވަނީ ކަށަވަރުވެފައި ކަމަށް ޝިފާން ވިދާޅުވިއެވެ.
ވެރިކަން ވައްޓާލަން ކުރި މަސައްކަތުގައި އަބްދުﷲ ސައީދުގެ މައްޗަށް ކޮށްފައިވާ ތުހުމަތަކީ ރިޝްވަތުގެ ގޮތުގައި ފައިސާގައި ހިފައި ޝަރުއީ ހުކުމްތައް ވަކިގޮތަކަށްކުރުމާއި، ގާނޫނީ ގޮތުން އުފެދިފައިވާ ސަރުކާރު ގާނޫނާ ޚިލާފަށް ބަދަލު ކުރުމަށް މަގާމުގެ ނުފޫޒު ބޭނުން ކޮށްގެން މަސައްކަތްކުރެއްވުމެވެ. އޭގެ އިތުރަށް ދައުލަތް ހިންގުމަށް ހުރަސްއެޅުމާއި، ޖިނާއީ އަދުލުގެ ނިޒާމް ހިންގުމަށް ގަސްތުގައި ހުރަސް އެޅުމެވެ.
