ރާއްޖޭގައި ގާނޫނީ ގޮތުން އުފެދިފައިވާ ސަރުކާރު ގާނޫނާ ޚިލާފަށް ވައްޓާލަން މަސައްކަތް ކުރެއްވި ކަމުގެ ތުހުމަތުގައި ހައްޔަރުކޮށްފައިވާ ސްޕްރީމް ކޯޓުގެ ފަނޑިޔާރު އަލީ ހަމީދަށް ނިސްބަތްވާ ދަބަހަކުން ގިނައަދަދެއްގެ ފައިސާ ފެނިފައިވާ ކަމަށް ފުލުހުން ވިދާޅުވެއްޖެއެވެ.
ސަރުކާރު ވައްޓާލަން މަސައްކަތް ކުރިކަމުގެ ތުހުމަތާ ބެހޭގޮތުން ފުލުހުން ހިންގަމުންދާ ތަހުގީގުގެ މައުލޫމާތު ހާމަކުރަމުން ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ އަލީ ހަމީދުގެ ދަބަހުން ފެނިފައިވަނީ 215،000 (ދެ ލައްކަ ފަނަރަ ހާސް) ޔޫއެސް ޑޮލަރާއި 150،000 (އެއްލައްކަ ފަންސާސް ހާސް) ދިވެހި ރުފިޔާ ކަމަށެވެ.
"އޭގެ އިތުރަށް އަލީ ހަމީދު މުހައްމަދު ރިޝްވަތުގެ ފައިސާ ބޭނުންކޮށްގެން ފުލެޓެއް ގަނެފައިވާ ކަމުގެ ޑޮކިޔުމެންޓް އެވިޑެންސް ވަނީ ޔަގީން ކުރެވޭ ވަރަށް ލިބިފައި. އޭގެ އިތުރަށް އަލީ ހަމީދުގެ އާއިލާއަށް ދިވެހިރާއްޖޭގައި ވިޔަފާރި ކުރަމުންއަންނަ ބިޔަ އަދި ބޮޑު ކުންފުންޏަކުން 2.4 މިލިއަން ޔޫއެސް ޑޮލަރުގެ އެހީއެއް ލޯނެއްގެ ގޮތުގައި ދީފައިވާކަން ޔަގީންކުރެވޭ. އަދި މިކަންތައްތަކުގެ ތެރޭގައި ތަފާތު އެކިކަންކަން ހިނގާފައިވާކަން އަޅުގަނޑުމެން ޔަގީންކޮށް އަރުވަން. އެކަންކަން ފުލުހުން އަންނަނީ ވަރަށް ފުޅާދާއިރާއެއްގައި ތަހުގީގު ކުރަމުން،" ޝިފާން ވިދާޅުވިއެވެ.
މި މައްސަލައާ ގުޅިގެން ހައްޔަރުކޮފައިވާ ޖުޑީޝަލް އެޑުމިނިސްޓްރޭޝަންގެ ވެރިޔާ، ހަސަން ސައީދުގެ މައްޗަށް ކޮށްފައިވާ ތުހުމަތަކީ ފަނޑޔާރުންގެ މަސައްކަތަށް ނުފޫޒު ފޯރުވުމާއި، ރިޝްވަތުގެ ގޮތުގައި ފައިސާދިނުމާއި، ރިޝްވަތުގެ ގޮތުގައި ހޯދައިފައިވާ ފައިސާ ބޭނުންކޮށްގެން މަންފާ ހޯދުމުމެވެ. "މިއަދު އަޅުގަނޑު ޔަގީންކޮށް އަރުވަން މިކަންތައްތަކާގުޅޭ ޑޮކިޔުމެންޓް އެވިޑެންސް ނުވަތަ ހެކި އަޅުގަނޑުމެންނަށްވަނީ ލިބިފައި. އެކަން އަޅުގަނޑު ޔަގީންކޮށް އަރުވަން،" ޝިފާން ވިދާޅުވިއެވެ.
ޝިފާން ވިދާޅުވީ މި މައްސަލައިގައި ތުހުމަތު ކުރެވޭ މީހުން ރާއްޖެއިން ބޭރުން އަގުބޮޑެތި މުދަލާއި، ފުލެޓާއި އެޕާޓްމެންޓް ފަދަތަކެތި ގަނެފައިވާކަން ޔަގީންކުރެވޭ ވަރަށް ޑޮކިޔުމެންޓް އެވިޑެންސް ލިބިފައިވާ ކަމަށެވެ.
