ގާނޫނީ ގޮތުން އުފެދިފައިވާ ސަރުކާރު ވައްޓާލުމަށް ބަޔަކުކުރި މަސައްކަތުގެ ތަހުގީގުން މިހާތަނަށް ގޮސްފައިވާއިރު ކުރީގެ ރައީސް މައުމޫން އަބްދުލްގައްޔޫމް ސްޕްރީމްކޯޓުގެ ފަނޑިޔާރ އަލީ ހަމީދުގެ އާއިލާއަށް އެކިގޮތް ގޮތުން އެހީތެރިވަމުން ގެންދެވިކަން ފާހަގަ ކުރެވިފައިވާ ކަމަށް ފުލުހުން ވިދާޅުވެއްޖެއެވެ.
"އަލީ ހަމީދުގެ އާއިލާއަށް ތަފާތު އެކިގޮތްގޮތުން ކުރީގެ ރައީސް މައުމޫން އެހީތެރިވަމުން އަންނަކަން ތަހުގީގަށްވަނީ ޔަގީންކުރެވިފައި،" ޝިފާން ވިދާޅުވިއެވެ.
އޭގެ އިތުރަށް ރައީސް މައުމޫން ދިރިއުޅުއްވާ މާފަންނު އެންދެރިމާގެއިން ސިއްރުން ނެރެގެންދިޔަ ކަޅު ފޮއްޓެއްވެސް ފުލުހުންވަނީ ޚާއްސަ އޮޕަރޭޝަނެއް ހިންގައި ހޯދައިފައެވެ. އޭގެ ތެރެއިން މައްސަލައިގެ ތަހުގީގަށް ބޭނުންވާ ހެކި ލިބިފައިވާ ކަމަށް ޝިފާން ވިދާޅުވިއެވެ.
"ޚާއްސަކޮށް އެ ކަޅުފޮށީގެ ތެރެއިން ފަނޑިޔާރުންނަށް ކަނޑައެޅިގެން ނުފޫޒު ފޯރުވުމަށް އަހުމަދު ފާރިޝް މައުމޫން މަސައްކަތް ކޮށްފައިވާ ކަމުގެ ޑޮކިޔުމެންޓް އެވިޑެންސް އަޅުގަނޑުމެންނަށް ލިބިފައިވޭ،" ޝިފާން ވިދާޅުވިއެވެ.
އެ ފޮށި ހޯދައިފައިވަނީ ރައީސް މައުމޫން އަރިހުގައި ކުރިން މަސައްކަތް ކުރެވި ނަޖުމާ ކިޔާ އަންހެއްނެއްގެ ގެއިން ކަމަށްވެސް ޝިފާން ވިދާޅުވިއެވެ. އޭނާ މިހާރުވަނީ ފުލުހުންގެ ބެލުމުގެ ދަށުގައެވެ.
ސަރުކާރު ވައްޓާލުމަށް މަސައްކަތްކުރެއްވި ކަމުގެ ތުހުމަތުގައި މިހާތަނަށްވަނީ ކުރީގެ ރައީސް މައުމޫން އަބްދުލްގައްޔޫމް، އުއްތަމަ ފަނޑިޔާރު އަބްދުﷲ ސައީދު، ފަނޑިޔާރު އަލީ ހަމީދު މުހައްމަދު، ޖުޑީޝަލް އެޑުމިނިސްޓްރޭޝަންގެ ވެރިޔާ ހަސަން ސާއިދު ހައްޔަރުކޮށްފައެވެ.
އެބޭފުޅުންގެ އިތުރަށް އެ މައްސަލައިގެ ތުހުމަތުގައި ވަނީ ޖޭޕީގެ ލީޑަރު ގާސިމް އިބްރާހީމްގެ ދަރިފުޅު، އިބްރާހީމް ސިއާދު ގާސިމާއި، ސ. ހުޅުދޫ، ފާތިމަތު ނާސީރާ، ދިއްގަރުދާއިރާގެ މެންބަރު އަހުމަދު ފާރީޝް މައުމޫނާއި، މ. ބެނިއަންފަރު އަބްދުﷲ ސިނާން ހައްޔަރު ކޮށްފައެވެ.
އެ މައްސަލައިގެ ތުހުމަތުގައި ފުލުހުންގެ ބެލުމުގެ ދަށުގައި މިހާރު ޖުމްލަ 8 މީހަކު އެބަތިބި ކަމަށް ޝިފާން ވިދާޅުވިއެވެ. އޭގެ އިތުރަށް ފުލުހުން މިހާރު ގެންދަވަނީ ދިއްހަރު ދާއިރާގެ މެންބަރު އިލްހާމް އަހުމަދު ހޯދުމުގެ މަސައްކަތްވެސް ކުރައްވަމުން ނެވެ.
މިމައްސަލައާ ގުޅިގެން ފުލުހުންވަނީ 30 މީހުންނާ ސުވާލުކޮށްފައެވެ. އޭގެ އިތުރަށް މައްސަލައާ ގުޅުންހުރި މައުލޫމާތާއި، ހެކި ހޯދުމަށް 15 ތަނެއްވަނީ ބަލައިފާސްކޮށްފައެވެ.
