ރާއްޖޭގައި މިއަހަރު ބޭއްވުމަށް ހަމަޖެހިފައިވާ ރިޔާސީ އިންތީޚާބުގައި ވާދަކުރެއްވުމާބެހޭ ގޮތުން އަދި ގޮތެއް ނުނިންމަވާ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އުމަރު ކުރިންވަނީ ރިޔާސީ އިންތިޚާބުގައި މިނިވަން ކެންޑިޑޭޓެއްގެ ގޮތުގައިނަމަވެސް ވާދަ ކުރައްވާނެ ކަމަށް ވިދާޅުވެފައެވެ. އެހެންނަމަވެސް ޖުމްހޫރީޕާޓީއަށް އަލުން ސޮއި ކުރެއްވުމަށްފަހު އޭނާ ވިދާޅުވެފައިވަނީ ރިޔާސީ އިންތިޚާބަށް ގާސިމް ނުކުމެ ވަޑައިގަންނަވަންޏާ އެމަނިކުފާނުގެ ފަހަތްޕުޅަށް އަރައި ވަޑައިގަންނަވާނެ ކަމަށެވެ. ގާސިމް ވާދަ ނުކުރައްވާ ކަމަށްވާނަމަ އިންތިޚާބުގައި ވާދަކުރައްވާނެ ކަމަށް ވިދާޅުވެފައިވެއެވެ.
އުމަރު ނަސީރަކީ ރާއްޖޭގެ ސިޔާސީ މަސްރަހުގައި ވަރަށް ކެރިވަޑައިގެން ވާދަވެރިންނަށް ރައްދު ދެއްވާ ބޭފުޅެކެވެ. ޚާއްސަކޮށް ރައީސް ނަޝީދަށް ރައްދު ދެއްވުމަކީ އުމަރު އާންމުކޮށް ކުރައްވާ ކަމެކެވެ.
ބޭރުގެ އަސްކަރީ ފަރާތްތައް ރާއްޖެ އައިސް ސިޔާސީކަންކަން ހައްލުކޮށްދެއްވުމަށް ރައީސް ނަޝީދު ގޮވައިލެއްވުމުންވެސް އުމަރުވަނީ ނުރުހުން ފާޅުކުރައްވައިފައެވެ. ނަޝީދު އެގޮތަށް ވިދާޅުވިޔަސް އިންޑިއާ ފަދަ ގައުމެއްގެ އަސްކަރިއްޔާއިން ރާއްޖެއަށް އަންނާނެ ކަމަށް ގަބޫލުފުޅު ނުކުރައްވާ ކަމަށް އުމަރުވަނީ ވިދާޅުވެފައެވެ. "އެއީ ވުމަށްވުރެ ނުވުން ގާތްކަމެއް،" އޭނާ ވިދާޅުވިއެވެ.
