ސީރިއާ، އިރާގު ފަދަ ގައުމުތަކުގައި ހިނގާ ހަނގުރާމަތަކުގައި ބައިވެރިވެފައިވާ ދީނީގޮތުން ހައްދުފަހަނަޅައިފައިވާ ދިވެހިން އެނބުރި ރާއްޖެ އައިސް މޯލްޑިވްސް ޕޮލިސް ސާވިސް ގައި މަސައްކަތް ކުރައްވާ ކަމަށް ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅު ފުލުހުން ދޮގު ކުރައްވައިފިއެވެ.
ރައީސް ނަޝީދު އިންޑިއާގެ "ދަ ޓައިމްސް އޮފް އިންޑިއާ" އަށް ދެއްވި އިންޓަވިއުއެއްގައި ވިދާޅުވެފައިވަނީ ސީރިއާއި، އިރާގު ފަދަ ގައުމުތަކުގައި ހަރަކާތްތެރިވާ އައިއެސް ޖަމާއަތުގެ މީހުން އެތަންތަނުން ބޭރުކުރުމުން އޭގެ ތެރޭގައި ހމެނޭ ބައެއް ދިވެހިން އެނބުރި ރާއްޖެ އައިސް ދައުލަތުގެ ބައެއް މުއައްސަސާތަކުގައި އުޅެމުންދާ ކަމަށެވެ. އޭގެތެރޭގައި ފުލުހުންގެ އިދާރާ، ސިފައިންގެ އިދާރާ، ކަސްޓަމްސް، އިމިގްރޭޝަން ފަދަ ތަންތަން ހިމެނޭ ކަމަށް ވިދާޅުވެފައިވެއެވެ.
ފުލުހުން މިއަދު ނެރުއްވައިފައިވާ ނޫސް ބަޔާނެއްގައި ވިދާޅުވެފައިވަނީ އެވާހަކަތަކީ ފުލުހުންގެ އަގުވައްޓަވާލެއް ވުމަށް ރައީސް ނަޝީދު ދެއްކެވި އެއްވެސް ހަގީގަތެއްނެތް ދޮގުވާހަކަތަކެއް ކަމަށެވެ. އެވާހަކަ ތަކަކީ ރައީސް ނަޝީދުގެ އަމިއްލަފުޅު އެދުމަށް ދެއްކެވި ވާހަކަފުޅުތަކެއް ކަމަށްވެސް އެބަޔާނުގައި ވިދާޅުވެފައިވެއެވެ.
އެފަދަ ހަގީގަތެއްނެތް ވާހަކަތައް ފަތުރާ މީހުންގެ މައްސަލަތައް ބައްލަވައި ފިޔަވަޅު އަޅުއްވާނެ ކަމަށްވެސް އެބަޔާނުގައި ވިދާޅުވެފައިވެއެވެ. އެހެންވީމާ ފުލުހުންގެ އިދާރާ ބަދުނާމު ކުރުމަށް އެއްވެސް ފަރާތަކުން އެފަދަ ވާހަކަތައް ނުފެތުރުމަށް ފުލުހުންވަނީ އިލްތިމާސް ކުރައްވައިފައެވެ.
