ދިވެހިރާއްޖޭގެ ފަސްގަނޑުން ރައީސް ނަޝީދަށާއި، އެމަނިކުފާނަށް ތަބާވާ ބަޔަކަށް އެއްވެސް ޖާގައެއްނެތް ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު ޔާމީން ރަޝީދު ވިދާޅުވެއްޖެއެވެ.
އޭނާ ވިދާޅުވީ މި ގައުމާއި، މާތްވެގެންވާ އިސްލާމްދީން ހިމާޔަތް ކުރުމަށް ރައީސް ޔާމީން ވަރުގެ ލީޑަރެއް މިހާރު މި ގައުމަކުނެތް ކަމަށެވެ. "މިގައުމާއި މާތްވެގެންވާ އިސްލާމްދީން ގައުމުގައި ހިމާޔަތްކޮށްދޭ ހަމައެކަނި ލީޑަރަކީ ރައީސް ޔާމީންކަން އެނގޭ. އެކަން ރައީސް ނަޝީދަށް ހަޖަމްވިޔަސް ނުވިޔަސް އެމަނިކުފާނާއި އެމަނިކުފާނަށް ތަބާވާ މީހުންނަށް މިފަސްގަނޑުން ޖާގައެއްނެތް،" ހުޅުމާލޭގައި މިހާރު ކުރިއަށް ގެންދާ އެއްވުމެއްގައި ވާހަކަ ދައްކަވަމުން ޔާމީން ރަޝީދު ވިދާޅުވިއެވެ.
އޭނާ ވިދާޅުވީ މިގައުމު ބޭރުމީހުންގެ އަތްމައްޗަށް ދޫނުކުރެވޭނެ ކަމަށާއި، ބޭރުގެ ފަރާތްތަކަށް ވިއްކައެއްވެސް ނުލެވޭނެ ކަމަށެވެ. "މިގައުމެއް ބޭރުގެ ފަރާތަކަށް ވިއްކައެއް ނުލެވޭނެ. މިގައުމު ދޮންމީހުންނަށް ވިއްކާލާކަށް އަޅުގަނޑުމެން ޖާގައެއް ނުދޭނަން. މިއަދު ހީކޮށްގެނުވާނެ ރާއްޖެއިން ބޭރުގައި ތިބެގެން މި ދިވެހި ފަސްގަނޑަށް މިދިވެހި އުންމަތަށް ބޭނުންހާ އެއްޗެއް ހެދޭނެ ކަމަށް،" ރާއްޖެއިން ބޭރުގައި މިހާރު ދިރިއުޅުއްވަމުން ގެންދަވާ ރާއްޖޭގެ ސިޔާސީ ލިޑަރުންނަށް ނިސްބަތް ކުރައްވައި އޭނާ ވިދާޅުވިއެވެ.
ރައީސް ޔާމީނަށް ތާއިދު ކުރެއްވުމުގެ ގޮތުން އެމަނިކުފާނުގެ ސަޕޯޓަރުން މިއަދު ގެންދަނީ ރާއްޖޭގެ އެކި ކަންކޮޅު ތަކުގައި ހަރަކާތައް ބާއްވަމުންނެވެ.
