ދިވެހިރާއްޖެއަކީ ކިތަންމެ ކުޑަވެފައި މީސްކޮޅު މަދު ގައުމަކަށްވިޔަސް ގައުމުގެ ހަމައިސްކޮޅަށް ރާއްޖެ ނަންގަވަން ބޭނުންފުޅުވާ ކަމަށް ރައީސް ޔާމީން ވިދާޅުވެއްޖެއެވެ.
ޕީޕީއެމުން ރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން އެމަނިކުފާނު ވިދާޅުވީ "އަޅުގަނޑުމެންގެ ރާއްޖެއަކީ ކުޑަރާއްޖެއެއް. ކުޑަގައުމެއް. މީސްކޮޅު މަދު، ވަސީލަތްވެސް މަދު ގައުމެއް. އެކަމަކު އަޅުގަނޑު ދެކެން ބޭނުންވަނީ އަޅުގަނޑުމެން ކޮންމެ މީހަކުވެސް ހަމަ އިސްކޮޅަށް ތެދުވާތަން. އަޅުގަނޑުމެންގެ ގައުމު ހަމައިސްކޮޅަށް ނަގަން ބޭނުންވޭ އަޅުގަނޑު،" އެމަނިކުފާނު ވިދާޅުވިއެވެ.
ރައީސް ވިދާޅުވީ އޭގެ އިތުރަށް ދިވެހިންނަކީ ތަނަވަސް ބަޔަކަށް ހައްދަވަން ބޭނުންފުޅުވާ ކަމަށެވެ. އެއީ ޒުވާނުންނަށާއި ދޮށީއުމުގެ މީހުންނަށް ދެއްވަން ބޭނުންފުޅުވާ މެސުޖު ކަމަށްވެސް އެމަނިކުފާނު ވިދާޅުވިއެވެ. "މިއީ މުޅި ދިވެހި މުޖުތަމައާމެދު އަޅުގަނޑު ދެކޭ ހުވަފެން. މި ހުވަފެން ހަގީގަތަށް ހެދުމަށް އަޅުގަނޑަށް ފުރުސަތު ދެއްވާ،" ރައީސް ވިދާޅުވިއެވެ.
"އަޅުގަނޑުމެން ދެކެން ބޭނުންވޭ އަޅުގަނޑުމެން ކޮންމެ މީހެއްގެ އިސްކޮޅުގެ އެފެންނަ ހިޔަންޏަކީ ހަވީރުގެ ހިޔަނި ކަމަށްވާން. އަޅުގަނޑު ބޭނުމެއްނޫން މެންދުރު ބާރަ ޖަހާއިރު އެހުންނަ ހިޔަނި ދެކޭކަށް. މިއީ އަޅުގަނޑުގެ އުންމީދު. މިއީ އަޅުގަނޑުގެ ޝައުގުވެރިކަން ރައްޔިތުންނާ ދޭތެރޭ،" ރައީސް ވިދާޅުވިއެވެ.
ރޭގެ ޖަލްސާއާ ބެހޭގޮތުން އެމަނުކުފާނު ވިދާޅުވީ އެ އެއްވުމަކީ ދިވެހީންގެ ކަންކަން ނިންމާނީ ދިވެހީންނޭ ބުމަށް އެއްވިއެއްވުމެއް ކަމަށެވެ. އެ އެއްވުމަކީ ދިވެހި ރަށްތަކުން އަބަދުވެސް ބަންގީގެ އަޑު ކެނޑިގެން ނުދާނޭކަން ސާބިތުވެތިބެ އެނޫން އިތުރު ދޮރެއް ނުދައްކާނެ ކަމަށް ބުނުމަށް އެއްވި އެއްވުމެއް ކަމަށްވެސް ރައީސް ވިދާޅުވިއެވެ.
