ދިވެހިރާއްޖޭ އާއި ބުރުންޑީއާ ދެމެދު ވެވުނު ވިސާ ވެއިވަރ އެއްބަސްވުމުގެ ދަށުން އެ ގައުމުގައި ދިވެހީންނަށް ވިސާ އާ ނުލާ 30 ދުވަހު އުޅެވޭގޮތް ހަދައިފިއެވެ.
ހަމަމިއާއެކު ބުރުންޑީގެ ރައްޔިތުންނަށް ވެސް ވިސާނެގުމަކާއި ނުލާ 30 ދުވަހުގެ މުއްދަތަކަށް ދިވެހިރާއްޖެއަށް ދަތުރުކުރެވޭނެއެވެ. އަދި ޓްރާންސިޓް ކުރުމުގައި ވެސް މި އެއްބަސްވުމުގެ ދަށުން ވިސާ ނަގަން ނުޖެހޭ ގޮތަށް މިހާރުވަނީ ނިންމާފައެވެ.
ނިއުޔޯކުގައި ހުންނަ ދިވެހިރާއްޖޭގެ ދާއިމީ މިޝަނުގައި ބޭއްވި ރަސްމިއްޔާތެއްގައި، މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ، އދ. އަށް ކަނޑައަޅައިފައި ހުންނަވާ ދާއިމީ މަންދޫބު ތިލްމީޒާ ޙުސައިނެވެ. ބުރުންޑީ ސަރުކާރުގެ ފަރާތުން ސޮއިކުރެއްވީ އދ. އަށް ކަނޑައަޅައިފައި ހުންނަވާ އެ ޤައުމުގެ ދާއިމީ މަންދޫބު ޒެފްރިން މަނިރަތަންގައެވެ.
ތިލްމީޒާ ވަނީ، ދެޤައުމުގެ ގުޅުން އިތުރަށް ހަރުދަނާކުރުމަށް ބުރުންޑީ ސަރުކާރުން ދޭ އެއްބާރުލުމަށް ޝުކުރު އަދާކުރައްވާފައެވެ. އަދި ސޮއިކުރެވުނު މި އެއްބަސްވުމާއެކު ދެޤައުމުގެ ރައްޔިތުން އެއް ޤައުމުން އަނެއް ޤައުމަށް ފަސޭހަކަމާކާއެކު ދަތުރުކޮށް، ދެ ޤައުމުގެ ގުޅުން އިތުރަށް ހަރުދަނާވާނެ ކަމަށްވެސް ތިލްމީޒާ ވިދާޅުވިއެވެ.
ބުރުންޑީއާއެކު ވެވުނު މިއެއްބަސްވުމާއެކު ރާއްޖޭގެ ރައްޔިތުންނަށް ވިސާ ނުލާދެވޭ ޤައުމުތަކުގެ އަދަދުމިވަނީ 93އަށް އަރާފައެވެ.
Habaru kiyaaa nimunu irugaves neygunu mieee konthaaaku onna gaumehkameh