މިއަހަރުގެ ފިތުރި އީދު ދުވަހަކީ މި އޭޕްރިލް މަހުގެ 21 ވަނަ ދުވަސް ކަމުގައި އިސްލާމިކް މިނިސްޓްރީން ކަނޑައަޅައިފިއެވެ.
އެ މިނިސްޓްރީން މިގޮތަށް ނިންމާފައިވަނީ ޝައްވާލު މަހުގެ ހަނދު ސާބިތުކުރުމަށް ބޭއްވި ރަސްމިއްޔާތުގައެވެ.
މި ރަސްމިއްޔާތުގައި އިސްލާމިކް މިނިސްޓަރު ޑރ. އަހްމަދު ޒާހިރު ވިދާޅުވީ 20 އޭޕްރިލް ވަނަ ދުވަހުގެ އިރުއޮއްސޭ ވަގުތު ރާއްޖޭގެ ހުރިހާ ސަރަހައްދުތަކަށާއި އިސްލާމީ ހުރިހާ ގައުމުތަކަށް ވެސް 1444ވަނަ އަހަރުގެ ޝައްވާލު މަހުގެ ހަނދު ފެން މަތީގައި ހުންނާނެކަމަށް އިތުބާރު ހުރި ފަލަކީ ހިސާބުން ކަށަވަރުވެފައިވާ ކަމަށެވެ.
މީގެ އިތުރުން އިސްލާމީ ބައެއް ގައުމުތަކަށް ހަނދު ފެނިފައިވާކަން ރަސްމީކޮށް އެނގިފައިވާ ކަމަށެވެ.
އެހެންވެ، މިއަހަރުގެ ފިތުރު އީދު ދުވަހަކީ މި އޭޕްރިލް މަހުގެ 21 ވީ ހުކުރު (މިއަދު) ކަމުގައި ނިންމާފައިވާ ކަމަށް މިނިސްޓަރ ވިދާޅުވިއެވެ.
ރާއްޖެއަށް މިއަހަރުގެ ފިތުރު އީދު ދުވަހަކީ މިއަދު ކަމަށް ނިންމާފައިވާއިރު، ސައުދީ ގައި ވެސް އީދު ދުވަހަކީ މިއަދެވެ.
އެހެންނަމަވެސް މެލޭޝިއާ، ސިންގަޕޫރު، އިންޑޮނޭޝިއާ އަދި އޮސްޓްރޭލިއާ އިން އީދު ދުވަހުގެ ގޮތުގައި ކަނޑައަޅާފައި ވަނީ އަންނަ ހޮނިހިރު ދުވަހެވެ.
މި އަހަރުގެ ފިތުރު އީދު ނަމާދު މާލެ އާއި ވިލިމާލެ އަދި ހުޅުމާލޭގައި ތިން ތަނެއްގައި ބޮޑު ޖަމާއަތް ބާއްވަން ހަމަޖެހިފައި ވާއިރު، އެއީ މާލެއިން މާފަންނު ސްޓޭޑިއަމް ސަރަހައްދު، ވިލިމާލެ ބޯޅަދަނޑު އަދި ހުޅުމާލެ ފޭސް 2ގެ ކްރިކެޓް ސްޓޭޑިއަމް ކަމަށް އިސްލާމިކް މިނިސްޓްރީން ބުނެއެވެ.
ބޮޑު ޖަމާއަތުގެ އިތުރުން މާލެ ސަރަހައްދުގެ ބައެއް މިސްކިތްތަކުގައި ވެސް އީދު ނަމާދު ކުރާނެއެވެ.
