ސަލާމްލެއްވި އިދްރީސް ޢަލައިހިއްސަލާމަކީ ، ތެދުވެރި ނަބީބޭކަލެއްކަމުގައި ﷲ ސުބްޙާނަހޫ ވަތަޢާލާވަނީ ، ކީރިތި ޤުރުއާނުގައި ބަޔާންކުރައްވައި އަންގަވާފައެވެ. ކީރިތި ޤުރުއާނުގެ މަރިޔަމް ސޫރަތުގެ 56 ވަނަ އާޔަތުގައި ﷲ ސުބްޙާނަހޫ ވަތަޢާލާ ވަޙީކުރައްވާފައި ވެއެވެ.
وَٱذْكُرْ فِى ٱلْكِتَابِ إِدْرِيسَ إِنَّهُ كَانَ صِدِّيقاً نَّبِيَّاً
" ކަލޭގެފާނު މިފޮތުން ، އިދްރީސްގެފާނުގެ ވާހަކަ ވިދާޅުވެ ދެއްވާށެވެ ! ހަމަކަށަވަރުން ، އެކަލޭގެފާނަކީ ، ތެދުވެރިކަންބޮޑު ނަބިއްޔަކުކަމުގައި ވިއެވެ. "
އިދްރީސް ޢަލައިހިއްސަލާމް އުފަންވެވަޑައިގެން ، ބޮޑުފުޅުވީ އަލްޙިއްލާ އެވެ ކިޔުނު ސަހަރެއްގައެވެ. އެއީ މިހާރުގެ ގޮތުން ބަލާއިރު ޢިރާޤުގެ ވެރިރަށް ބަޣުދާދުގެ މެދުތެރޭ ، 83 ކިލޯމީޓަރު ދުރުގައި އޮންނަ އަވަށެކެވެ. އެކަލޭގެފާނު ތަބާވެވަޑައިގެން ކުރިޔަށްވަޑައިގަތީ ، ސަލާމްލެއްވި އާދަމްގެފާނާއި ، އެކަލޭގެފާނުގެ ދަރިކަލުން ސީޘްގެ ދީނެވެ. އިދްރީސްގެފާނަކީ ، ސަލާމްލެއްވި އާދަމްގެފާނުގެ 5 ވަނަ ޖީލުގެ ބޭފުޅެކެވެ. އެކަލޭގެފާނުގެ ކާބަފައިންގެ ދީނަށް ތަބާވުމަށް ، އިދްރީސްގެފާނު މީސްތަކުންނަށް ގޮވައިލައްވަމުން ގެންދެވިއެވެ. އެކަލޭގެފާނުގެ ބަސްފުޅު ޤަބޫލުކޮށް ، އެކަލޭގެފާނަށް ތަބާވީ މަދު ބަޔެކެވެ. ގިނަމީހުން އެކަލޭގެފާނަށް ފުރަގަސް ދިނެވެ.
އިދްރީސް ޢަލައިހިއްސަލާމު ، އެކަލޭގެފާނަށް ތަބާވީ މީސްތަކުންނައިގެން މިޞްރަށް ހިޖުރަކުރެއްވިއެވެ. މިޞްރަށް ވަޑައިގެން ، ދީނަށް ގޮވާލައްވަން ފެށްޓެވިއެވެ. ޢަދްލު އިންސާފު ޤާއިމްކުރުމަށް ގޮވާލައްވައި ، ނަމާދު ޤާއިމްކުރުމަށާއި ރޯދައަށް ތިބެންވީ ދުވަސްތައް ދަސްކޮށްދެއްވަމުން ގެންދެވިއެވެ. އަދި ފަޤީރުންނަށް އެހީތެރިވެ ، ޞަދަޤާތްދިނުމާއި މީހުންނަށް ހެތޮކޮށް ހިތުމަށް ބާރު އަޅުއްވަމުން ގެންދެވިއެވެ.
އިދްރީސް ޢަލައިހިއްސަލާމަކީ ، އާދަމުގެފާނުގެ ދަރިކޮޅުން ، އާދަމުގެފާނާއި ސީޘަށްފަހު ނަބީކަން ލިބިވަޑައިގެންނެވި ފުރަތަމަ ބޭފުޅެވެ. އެކަލޭގެފާނަކީ ، ބުނެވޭގޮތުގައި ފުރަތަމަފަހަރަށް ދުނިޔެއަށް ހުނަރެއްގެ ގޮތުގައި ލިޔެކިއުން ގެންނެވި ނުވަތަ ލިޔެކިއުން އުފެއްދެވި ބޭފުޅާއެވެ. އެކަލޭގެފާނުގެ މަތިވެރި ބަސްފުޅުތަކުން ބަސްފުޅެއްގައި ވެއެވެ.
" އުފާވެރި ކާމިޔާބު އިންސާނާއަކީ ، އޭނާގެ އަމިއްލަ ހެޔޮޢަމަލަށް ފާރަވެރިވާ މީހާއެވެ. އަދި ، އޭނާގެ ވެރި ރަސްކަލާނގެއަށް އެ ޢަމަލުތައް ޚާލިޞްކުރާ މީހާއެވެ. "
" އިންސާނާގެ މުދަލުން މީހުން ނުމިނާށެވެ ! އެހެނީ އެއީ ، މަދު ހިނދުކޮޅަކަށް އޭނާއަށް ލިބިގެންވާ އެއްޗެކެވެ. "
" ޙަޤީޤީ އުފާވެރިކަމަކީ ، ޙިލްމާއި ޢިލްމާ ، ތަޖުރިބާއާއި ޢަދްލުއިންސާފުން ގަތާލެވޭ ހާރެކެވެ. "
އިދްރީސްގެފާނު ، 365 އަހަރުވަންދެން ދުނިޔޭގައި ހުންނެވިކަމަށް ވެއެވެ.
