ޔޫރަޕިއަން ޔޫނިއަން (އީޔޫ) އާއި، އިނގިރޭސިވިލާތުން ރާއްޖެއަށް އައި ވަފުދަށް މަރުހަބާ ކިޔައި ފުރިހަމަ އެއްބާރުލެއްވުން ދެއްވި ކަމަށް ރައީސް އޮފީހުން ވިދާޅުވެއްޖެއެވެ.
ރައީސް އޮފީހުން ވިދާޅުވެފައިވަނީ އެވަފުދު ރާއްޖެ ވަޑައިގެންނެވީ ބައިދުވަހަށް ކަމަށެވެ. އެހެންނަމަވެސް އެ ވަފުދުން އެދިވަޑައިގެންނެވި ކަންކަން ސަރުކާރުން އިންތިޒާމް ކޮށްދެއްވި ކަމަށްވެސް ރައީސް އޮފީހުން ވިދާޅުވިއެވެ.
އީޔޫގެ ވަފުދު ރާއްޖެ ވަޑައިގެންނެވިއިރު ފޮރިން މިނިސްޓަރު ޑރ. މުހައްމަދު އާސިމް ހުންނެވީ ރައީސްގެ ޚާއްސަ މަންދޫބެއްގެ ހައިސިއްޔަތުން ޕާކިސްތާނަށް ވަޑައިގެންފައެވެ. އެހެން ކަމުން އެ ވަފުދާ ބައްދަލު ކުރެއްވީ ރާއްޖޭގެ ފޮރިން ސެކްރެޓަރީ އަހުމަދު ސަރީރާއި، ފޮރިން މިނިސްޓްރީގެ ވަފްދެކެވެ.
ފޮރިން މިނިސްޓްރީގެ ވަފުދުން ވަނީ އީޔޫގެ ވަފުދާ ބައްދަލު ކުރައްވައި ރާއްޖޭގެ ސިޔާސީ މަސްރަހާ ބެހޭގޮތުން މައުލޫމާތު ހިއްސާ ކުރައްވައިފައި ކަމަށް ރައީސް އޮފީހުންވަނީ ވިދާޅުވެފައެވެ. އެ ވަފުދުންވަނީ ވަޒީރުންގެ މަޖިލީހުންގެ މެންބަރުންނާ ބައްދަލު ކުރެއްވުމަށް އީޔޫގެ ވަފުދުން އެދިވަޑައިގެންނެވި ކަމަށެވެ.
އެ ބައްދަލުވުމުން މިއަދު މެންދުރުފަހު 3:00 އަށް ހަމަޖައްސަވައި ދެއްވި ކަމަށްވެސް ރައީސްއޮފީހުން ވިދާޅުވިއެވެ. ނަމަވެސް ވަޒީރުންގެ މަޖިލީހުގެ ބޭފުޅުންނާ ބައްދަލު ނުކުރައްވައި އެވަފުދުވަނީ ރާއްޖެއިން ފުރައިވަޑައިގެންފައި ކަމަށް ރައީސް އޮފީހުން ވިދާޅުވިއެވެ.
ދިވެހި ސަރުކާރުން އީޔޫވަފުދަށް މަރުހަބާ ވިދާޅުވެއް އެއްބާރުލެއްވުން ދެއްވިޔަސް އެވަފުދުގެ ބޭފުޅުން ވިދާޅުވެފައިވަނީ އެ ބޭފުޅުންނާ ސަރުކާރުގެ އިސްވެރިން ބައްދަލު ނުކުރެއްވި ކަމަށެވެ. އެބޭފުޅުން ވިދާޅުވީ ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރައްވަން ޖެހިވަޑައިގެންނެވި ސަބަބާމެދު އިތުރަށް އެނގިވަޑައިގަންނަވަން ބޭނުންފުޅާވާ ކަމަށެވެ. އަދި ވާހަކަ ދައްކައިގެން ރާއްޖޭގެ ކަންކަން ހައްލު ކުރައްވަން ބޭނުންފުޅުވާ ކަމަށްވެސް އެވަފުދުން ވިދާޅުވެފައިވެއެވެ.
