ރާއްޖޭގައި މިހާރު އުފެދިފައިވާ ސިޔާސީ ގުޖަޑު (ހަމަނުޖެހުން) ތައް ހައްލުއް ކުރެއްވުމަށް ސަރުކާރުން މަޝްވަރާއަށް ގޮވައިލައްވައިފިއެވެ.
ސަރުކާރުން މަޝްވަރާއަށް ގޮވައިލެއްވީ ފިޝަރީޒް މިނިސްޓަރު މުހައްމަދު ޝައިނީއެވެ. އޭނާ ވިދާޅުވީ ސަރުކާރުން މަޝްވަރާއަށް ގޮވައިލެއްވީ އެއްވެސް ވަރަކަށް ބޭރުގެ ޕްރެޝަރު ރާއްޖެއަށް އޮވެގެންނޫން ކަމަށެވެ. އޭނާ ވިދާޅުވީ ބޭރުގެ ޕްރެޝަރު "ނޮޓު އެޓު އޯލް" ކަމަށެވެ.
މީގެކުރިންވެސް ސަރުކާރުންވަނީ އިދިކޮޅު ފަރާތްތަކާއެކު މަޝްވަރާ ކުރުމަށް އެތައް ފަހަރަކުމަތިން ދައުވަތު ދެއްވައިފިއެވެ. އެފަހަރުތަކުގައިވެސް އެކަމަށް އިސްކޮށް ހުންނެވީ ޝައިނީއެވެ. އެފަހަރު އިދިކޮޅު ފަރާތްތަކުން މަޝްވަރާއަށް ނައީ ސިޔާސީ ހައްޔަރީން މިނިވަން ނުކޮށްގެންނެވެ.
ޝައިނީ މިއަދު ވިދާޅުވީ ރާއްޖޭގެ ވެރިކަން ބަދަލުކޮށްލަން ބަޣާވާތެއް ގެންނަން އުޅުނު މީހުންނާ ދެކޮޅަށް ފުލުހުން މިހާރުވެސް ބައެއްހެކި ހޯދައިފައިވާ ކަމަށެވެ. އެހެންކަމުން ސަރުކާރާއެކު މަޝްވަރާ ކުރުމަށް އިދިކޮޅު ފަރާތްތަކުން އަންނާނެ ކަމަށް އުންމީދު ކުރައވާ ކަމަށް އޭނާ ވިދާޅުވިއެވެ.
އޭނާ ވިދާޅުވީ އަމިއްލަ އެދުންވެސް އޮންނަވާނީ ހައްދެއްގެ ތެރޭގައި ކަމަށެވެ. އެކަމަކު ގައުމަށް ޣައްދާރުވެ ބާޣީން އުޅުނީ "އަހަރެމެންގެ ލޯބިވާ ގައުމު ހަލާކުކޮށްލަން،" ކަމަށް ޝައިނީ ވިދާޅުވިއެވެ. ފުލުހުންގެ ޔަހުގީގަށްފަހު ހާމަކޮށްފައިވާ ހެކިތަކަށްފަހު އިދިކޮޅުގައި މިހާރު ތިއްބެވި ލީޑަރުން، ސަރުކާރާ މަޝްވަރާ ކުރަން އަންނާނެ ކަމަށް ގަބޫލުކުރައްވާ ކަމަށް މިނިސްޓަރ ވިދާޅުވިއެވެ. މިހާރުވަނީ ސަރުކާރާ މަޝްވަރާ ކުރުމުގެ މާހައުލެއްވެސް ގާއިމްވެފައި ކަމަށް އޭނާ ވިދާޅުވިއެވެ.
