ކިރުއިލޮށި - 25

(2 އޭޕްރީލް 2023 ގައި ޝާއިއުކުރި ބަޔާ ގުޅޭ)

އަޝްހަރުގެ ހިތުގައި މިހާރު ހިނގަމުންއެދަނީ ، މީގެ ކުޑަދުވަސްކޮޅެއްކުރިން ، ޚައިރާދު ތަޙައްމަލު ކުރަމުންދިޔަ ވޭނީ އިޙްސާސްތަކެވެ. މަންމަ ވަކިވުމާގުޅިގެން ، ޚައިރާދުގެ ހިތުގައި އުފެދުނު ވޭނީ ތަކުލީފުތަކުން ސަލާމަތް ވެވުނުކަން އަދި ހަނދާނެއް ނުނެތެއެވެ. ހަމަ އެޙާލަތު ، މިއަދު އެވަނީ އަޝްހަރާ ކުރިމަތިވެފައެވެ. ޚައިރާދާ ގުޅުވައި ، ކައިވެނީގެ ކުރިންނާއި ކައިވެނީގެފަހުން ބައްޕަ ދެއްކި ވާހަކަތައް ، ފަހަރަކު ވާހަކައެއް ، އަޝްހަރުގެ ހަނދާނަށް އައިސް ، ހިތްނުތަނަވަސްވަމުން ދިޔައެވެ. ކިޑިކީ ދޮރެއްގެ ކުރިމަތީ ، ތުރުތުރު އަޅާ ޙާލުގައި އަޝްހަރު ހުއްޓިލައިގެން އެހުރީ ، އޭނާގެ ހިތަށް އިރުއިރުކޮޅާ އެއަންނަ ، ބައްޕަގެ ވާހަކަތަކުން ސިކުނޑި ހާސްވެ ، ހަމަ ނޭވާލުމަށް ވަޔާއި އޮކްސީޖަން ބޭނުންވެފައެވެ.

ޚައިރާދު ، އަޝްހަރު ހޯދަމުން އައިސް ކިޑިކީ ކައިރިޔަށް ޖެހިލައި ، އަޝްހަރުގެ ކޮނޑުގައި ، ނުހަނު ލޯތްބާއެކު އަތްބާއްވާލިއެވެ. ޚައިރާދުގެ މަންމަ ނިޔާވުމުން ، ޚައިރާދުގެ ހިތުގައި އެޅިވޭނާއި ކެކުޅުމުގެ އިޙްސާސް މިއަދު އޭނާއަށް އެބަ އިޙްސާސްވާކަމުގައި އަޝްހަރު ބުންޏެވެ. އަޝްހަރުގެ ހިތުގައިޖެހި ، ލޮލުން ފައިބަމުން ދިޔަކަރުނަތައް ޚައިރާދުގެ ދޮޕައްޓާއިން ފުހެލަދިނެވެ.

" އަހަރެންގެ މުޅި ޢުމުރު ، މިވޭތުވެދިޔަ އެންމެފަހު ވަގުތުކޮޅާހަމަޔަށް ، ބޭބެއާމެދު ދެކެމުންދިޔައީ ގޯސްކޮންނެވެ. ބޭބެގެ ލޯތްބާއި އަޅައިލުމުގެ އިންތިހާ އަހަރެންނަށް ކުރިން ތަޖުރިބާ ކުރެވިފައެއް ނެތެވެ. މަންމަ ދުނިޔޭގައި ނެތުމުގެ އުނިކަން ފޫބައްދައިދީ ، އަހަރެން ދުނިޔެއަށް އަނބުރާ ގެނެސްދިނީ ބޭބެގެ ލޯތްބާއި އަޅައިލުމެވެ. އަހަރެންނަށް އެކަންކަން އެންމެ ބޮޑަށް ބޭނުންވި ވަގުތު ، ބޭބެއެވަނީ ، އެވާޖިބު އެންމެ ފުރިހަމަޔަށް އަދާކޮށްދީފައެވެ. ބޭބެގެ ލޯބީގައި އަހަރެން އެހެންމީހަކަށް ބަދަލުކޮށްލަ ދިނުމަށްފަހު ، އެހާ އަވަހަށް އެވަކިވީ ކީއްވެ ހެއްޔެވެ ؟ ވަގުތަކީ ކިހާ ރަޙުމެއްނެތް އެއްޗެއް ހެއްޔެވެ ؟ ދެވަނަ ފަހަރަށް އަހަރެންގެ މަންމަ އަހަރެންނާ ވަކިވެއްޖެކަމުގެ އިޙްސާސް އަހަރެންނަށް މިއަދު އެބަ ލިބެއެވެ. " ޚައިރާދު ބުންޏެވެ.

ޚައިރާދު އަޝްހަރުގެ ބޮލުގައި ފިރުމާލިއެވެ. އަދި ފުރަގަހުން ބައްދާލައި ، އަޝްހަރުގެ ވޭނީ އިޙްސާސްތަކުގައި ބައިވެރިވިއެވެ. ޚައިރާދުގެ ހިތުގައި އުފެދިފައިވާ ވޭނާއި ކެކުޅުން އަޝްހަރުގެ އިޙްސާސްތަކާ އެއްކޮށްލިއެވެ.

ފަރީދާގެ ޙާލު ވަކި ދެރައެއްނޫނެވެ. ކާމޭޒުދޮށުގައި އިންއިރު ، އޭނާގެ ކުރިމަތީ އަތުރާފައިހުރި ކާތަކެއްޗަކީ  ޒަހަރުފަދަ އެއްޗެކެވެ. އެއްވެސް އެއްޗަކަށް ބަލައިލާހިތްވެސް ނުވެއެވެ. އަޝްހަރާއި ޚައިރާދު ، ފަރީދާއަށް ހިތްވަރުދީ ، ކުޑައެތިކޮޅެއްނަމަވެސް ކައިލުމަށް އާދޭސް ކުރަމުން ގެންދިޔައެވެ. ޚައިރާދު އެއީ އޭނާގެ ދަރިއެއްކަމަށްބަލައި ، އޭނާއަށްޓަކައި ކުޑައެތިކޮޅެއް ނަމަވެސް ކާލުމަށް އެދެމުން ގެންދިޔައެވެ. ފަރީދާ މިއަދު ކުރަމުން އެގެންދާ ހިތާމަޔަކީ ، މީގެ ދުވަސްކޮޅެއްކުރިން ޚައިރާދު ކުރަމުން ގެންދިޔަ ހިތާމައެކެވެ. އެދުވަހު ، ޚައިރާދުގެ ހިތުގައި އަޅާނެވޭނުގެ އިޙްސާސް ފަރީދާއަށް އެލިބެމުންދަނީ މިއަދު އެވެ. އޭނާގެ ފިރިމީހާ މިދުނިޔެއާ ވަކިވެދިއުމުންނެވެ. ޚައިރާދުގެ ހިތާމަވެގެންދިޔައީ ، އޭނާގެ މަންމަ ވަކިވުމާގުޅިގެން ކުރަން ޖެހުނު ހިތާމައެކެވެ. ޚައިރާދުގެ ހިތާމާއާއި ވޭން އެތައް ގުނައެއް އިތުރުވާނެކަން ފަރީދާއަށް މިއަދު އެބަ އިޙްސާސް ކުރެވެއެވެ.

މިއަދު ، ޚައިރާދުގެ ބޭބެ އެވަނީ މިދުނިޔެއާ ވަކިވެފައެވެ. އެ ބޭބެޔަކީ ، ޚައިރާދު ނުހަނު ލޯބިވާ އިންސާނެކެވެ. އަދި އެ ބޭބެޔަކީ ، ޚައިރާދު ދެކެ ނުހަނު ލޯބިވާ އިންސާނެކެވެ. ފަހަރެއްގައި ، އޭނާގެ އަމިއްލަ ދަރިފުޅަށްވުރެވެސް ބޮޑަށް ޚައިރާދު ދެކެ  ލޯބިވުން އެކަށީގެން ވެއެވެ. ޚާއިރާދުވެސް އެކަމަށް އެއްބަސް ވިއެވެ. ބޭބެގެ ލޯބި އޭނާއަށް ލިބުނީ ކުޑަދުވަސްކޮޅަކަށެވެ. އެހެނަސް އެއީ ، އޭނާގެ މުޅި ޙަޔާތުގައިވެސް ދުނިޔޭގައި ހުރިހާ ހިނދެއްގައި އޭނާގެ ހިތުންފިލައިގެން ދާނެ ލޯތްބެއް ނޫންކަމުގައި ޚައިރާދު ބުންޏެވެ. ޚައިރާދުގެ ލޮލުން ، ހިފެހެއްޓުމެއްނެތި ކަރުނަ އޮހިގެންދިޔައެވެ.

ބޭބެ މިދުނިޔެއާ ވަކިވެދިޔައެއްކަމަކު ، ޚައިރާދު އެކަނިވެރިކަން އިޙްސާސް ނުކުރުމަށް ފަރީދާ އެދުނެވެ. އަދި މަންމައެއްގެ ގޮތުގައި އަބަދުވެސް ، ޚައިރާދާއެކީ ފަރީދާ ހުންނާނެކަމުގައި ބުނެ ވަޢުދުވިއެވެ. އަދި ، އަޝްހަރާ ދިމާއަށް ބަލައިލަމުން ، އަޝްހަރުވެސް ހުންނާނީ ޚައިރާދާއެކީގައިކަމުގައި ފަރީދާ ބުންޏެވެ.

" އަހަރެން ޚައިރާދުގެ މަންމަ ކަމަށް ބަލައިގެން އެހެން މިބުނަނީ ، ހަމައެކަނި ޚައިރާދުގެ ހިތްހަމަޖައްސައިދޭކަށް ނޫނެވެ. ޙަޤީޤަތުގައިވެސް ، އަހަރެންނަކީ ، ޚައިރާދުގެ މަންމަގެ ދަރަޖައިގާ ހުންނާނެ މީހެކެވެ. އަހަރެންގެ ހިތުގެ އަޑިން ، ޚައިރާދަކީ ، އަހަރެންގެ އަންހެންދަރިއެއްކަމަށް ބަލައިގަންނަމެވެ. " ފަރީދާ ބުންޏެވެ.

ޚައިރާދުގެ ލޮލުގައި އުފާވެރިކަމުގެ ކަރުނައިގެ ކޯރެއް ، ދެމިގަތެވެ. ރޮވެމުންގޮސް ފަރީދާގެ ކޮނޑުގައި ބޯ އަޅައިލިއެވެ. ޚައިރާދުވެސް އެއީ އޭނާގެ މަންމަކަމުގައި ޤަބޫލުކުރާވާހަކަ ބުންޏެވެ. އަދި ، އެދަރިފުޅުގެ ޙައްޤުގައި ކުޑައެތިކޮޅެއް ކާލާށޭ ބުނެ ފަރީދާއަށް ހިތްވަރު ދިނެވެ.

ދުވަސްކޮޅެއްފަހުން ، ގޭގެކަންކަން ހަމަޔަކަށް އެޅުމާއެކު ، ޚައިރާދު އޭނާގެ ނުނިންމާ އޮތް ބީއެސްސީ ކޯސް ފުރިހަމަކުރުމަށްޓަކައި ޔުނިވަރސިޓީއަށް ދާންފެށްޓިއެވެ. ޚައިރާދުގެ ކިޔެވުމުގައި އަޝްހަރު ވަރަށް ބޮޑަށް އެހީތެރިވަމުން ގެންދިޔައެވެ. ޚައިރާދުގެ ކޯސްފުރިހަމަކުރުމަށް ހުށަހެޅީ އަޝްހަރެވެ. ޚައިރާދު ޔުނިވަރސިޓީއަށް ގެންގޮސްދީ ، ނިމުނީމަ ގެޔަށް ގެނެސްދިނުމަކީ އަޝްހަރުގެ ކަމެކެވެ. ޚައިރާދު ، ޔުނިވަރސިޓީއަށްދާން ފެށުމާއެކު ، މީހަކާ އިނދެގެން އުޅުނުނަމަވެސް ، ޔުނިވަރސިޓީގައި ކިޔަވަންއުޅޭ އެކި ފިރިހެންކުދިން ، ޚައިރާދާ އަޅައިގަނެއެވެ. އަދި ޚައިރާދު ، ހިސާބަށް މޮޅުކަމާއެކު ، މުޅި ޔުނިވަރސިޓީގައިވެސް ، ޚައިރާދަކީ ނަންހިނގާ ދަރިވަރެކެވެ. ޚައިރާދަށް އެއިން އެއްވެސްކަމެއް ނޭނގެއެވެ. ޚައިރާދުގެ ކަމަކީ ، އަޝްހަރާއެކު ގެއިން ޔުނިވަރސިޓީއަށްގޮސް ، ކްލާސްނިމިގެން އަޝްހަރާއެކު އެނބުރި ގެޔަށް އައުމެވެ.

އެއްދުވަހެއްގެ ކްލާސް ނިންމުމަށްފަހު ، ޚައިރާދު ނުކުމެގެން އަންނަނިކޮށް ، ޚައިރާދަށް ގޮވަމުން ، ފަހަތުން އައިސް ، އޭނާއަކީ ކައިސަރުކަމަށްބުނެ އަމިއްލަޔަށް ތަޢާރުފްވިއެވެ. އަދި ޚައިރާދަކީ ، އަޝްހަރުގެ އަންހެނުންކަން އޭނާއަށް  އެނގޭކަމަށް ބުންޏެވެ. އޭގެއިތުރަށް ، އޭނާއަކީ ، ސާރާގެ ދުރުގާ ތިމާގެ ކުއްޖެއްކަމުގައިވެސް ބުންޏެވެ. ކައިސަރަށް ޚައިރާދު އެނގުނީ ، ސާރާގެ އުފަންދުވަހުގެ ފޮޓޯއިން ފާހަގަވެފައި އޮއްވައި ، ޔުނިވަރސިޓީން ފެނުމުންކަމުގައި ބުންޏެވެ. އެހެންކަމަށް ވަންޏާ ޒަރީނާ އަކީ ކޭޒަރުގެ ބޮޑުދައިތައަށްވާނެކަމުގައި ޚައިރާދު ބުންޏެވެ. އެކަމަށް ކައިސަރު އެއްބަސް ވެއެވެ. ކްލާހާއި ޔުނިވަރސިޓީއާ ބެހޭގޮތުން ދެމީހުންގެ މެދުގައި އެދުވަހު ، ކޮންމެވެސް ވަރަކަށް ވާހަކަ ދެކެވުނެވެ.

އެދުވަހު ލެކްޗަރަރ އެދިން ސުއާލަކީ ކްލާހުގެ އެއްވެސް ކުއްޖަކަށް ޖަވާބު ނުދެވޭނެ ސުއާލެއްކަމަށް ކޭޒަރު ބުންޏެވެ. އަދި އެހާފަސޭހައިން ، ޚައިރާދު އެސުއާލުގެ ޖަވާބު ދިނީތީ ޚައިރާދަށް ޝުކުރު އަދާކުރިއެވެ. އެއީ ކްލާހުގެ ހުރިހާކުދިންނަށް ޚައިރާދު ކޮށްދިން ހެޔޮކަމެއްކަމުގައިވެސް ބުންޏެވެ. އެހެން ނޫންނަމަ ، މުޅިދުވަސް ހޭދަކުރަންޖެހޭނީ އެކަމުގައިކަމުގައިވެސް ކައިސަރު ބުންޏެވެ.

އެރޭގެ ކެއުމަށްފަހު ، ޓީވީބަލަން އެންމެން ތިއްބެވެ. އެދުވަހުގެ ޔުނިވަރސިޓީގެ ވާހަކައިން ޚައިރާދު ވާހަކަ ފެށިއެވެ. އެދުވަހު ، އޭނާއާ ސާރާގެ ދުރުތާ ތިމާގެ ކުއްޖަކާ ބައްދަލުވިވާހަކަ ، ފަރީދާގާތު ، ޚައިރާދު ބުންޏެވެ. އެއީ  ކޮންނަމެއްކިޔާ ކުއްޖެއްތޯ ފަރީދާ އެހިއެވެ. އެހެންނަމަވެސް އެކުއްޖާގެ ނަން އެހާބޮޑަށް ޚައިރާދުގެ ހަނދާނަކު ނެތެވެ. ކުޑައިރުކޮޅަކު ހަނދާންކުރަން އިނުމަށްފަހު ، ކޮންމެވެސް ކައިސަރެއްގެ ވާހަކަ ބުނިހެން ހީވިކަމުގައި ޚައިރާދު ބުންޏެވެ.

ކައިސަރަކީ ، ފަރީދާ ދަންނަ ކުއްޖެކެވެ. އެއީ ފަރީދާމެންނާވެސް ކުޑަކޮށް ތިމާގެ ބަޔެކެވެ. އެމީހުން ދިރިއުޅެނީ ސުޢޫދީ ޢަރަބިއްޔާގައެވެ. ކައިސަރު އޭ ލެވެލް ނިންމާފަ ލާހޯރަށް އައިސް އެއުޅެނީ މަތީ ތަޢުލީމު ޙާޞިލްކުރުމަށްކަމުގައި ފަރީދާ ބުންޏެވެ. ޒަރީނާވެސް ، ކައިސަރު އެގޭގައި ބަހައްޓަން ބޭނުންވެގެން އުޅުނެވެ. އެކަމަކު ޒަރީނާއަށް އުނދަގޫކުރާކަށް ބޭނުމެއްނޫނޭ ބުނެ ، ކައިސަރު އެހުންނަނީ ، ތަނެއް ކުއްޔަށްހިފައިގެން އެކަނިކަމުގައިވެސް ފަރީދާ ބުންޏެވެ. އަދި އޭނާއަކީ ވަރަށް ޚުލްޤުހެޔޮ ، ރަނގަޅުކުއްޖެއްކަމުގައި ފަރީދާ ބުންޏެވެ. އަޝްހަރު އެއްވެސް އެއްޗެކޭ ނުބުނެ ، ޚައިރާދާ ދިމާއަށް ބަލަހައްޓައިގެން އިނެވެ.

އޭގެފަހު ދުވަހު ، ޚައިރާދު ޔުނިވަރސިޓީއަށް ލާން އަޝްހަރު ދިޔަތަނާ ކައިސަރާ ދިމާވެއެވެ. އަދި ކައިސަރު އައިސް އަމިއްލަޔަށް ތަޢާރުފް ވިއެވެ. ފަރީދާގެ ވާހަކައިން އަހައި އަޝްހަރަށް ތަޢުޒިޔާ ކިޔެވެ. އަޝްހަރުވެސް ، ކައިސަރާ ވާހަކަ ދައްކަމުންގޮސް އެގެޔަށް ޖައްސައިލުމަށް ދަޢުވަތު ދިނެވެ. ކައިސަރުގެ ވާހަކައިގާ ޚައިރާދަށް ވަރަށް ތަޢުރީފް ކުރިއެވެ. ޚައިރާދަކީ ވަރަށް ތޫނުފިލި އަދި ހިސާބަށް ވަރަށްމޮޅު ކުއްޖެއްކަމުގައި ބުނެ ، ޓީޗަރުންނަށްވެސް ބައެއްފަހަރު  ޚައިރާދާ އަރައި ހަމަނުކުރެވޭވާހަކަ ބުންޏެވެ. އަދި ، ބައެއްކުދިން ، ޚައިރާދުގާތުން ފިލާވަޅު ދަސްކުރުމަށް ޚައިރާދުމެންގެ ގެޔަށް ދިއުމުގެ ބޭނުންޖެހިފައި އޮތްކަންވެސް ކައިސަރު ހާމަކުރިއެވެ.

ޚައިރާދު އޭނާގެ ރަޙުމަތްތެރިޔާ އަފްސީނާ ފޯނުންވާހަކަ ދައްކަމުން ގެންދިޔައެވެ. އޭނާގެ މިއަދުގެ ޙާލަތާއި ދިރިއުޅުމުގެ އުފާވެރިކަމުގެ ވާހަކަ ދެއްކިއެވެ. ޔުނިވަރސިޓީއަށް ދާންފެށިވާހަކަވެސް ބުންޏެވެ. ޚައިރާދު ޔުނިވަރސިޓީއަށް ދާންފެށީ ، ބީއެސްސީ ނިންމާފަ އޭނާގެ އަތުގައިވެސް ފާހެއް އޮންނަން ބޭނުންވާތީކަމުގައި އަފްސީންގާތު ބުންޏެވެ. އެއީ އޭނޤ އަޝްހަރަށްޓަކައި ކުރަން ނިންމިކަމެއްކަމުގައި ބުނެއެވެ. އަޝްހަރު އެހާމޮޅަށް ކިޔަވައިގެން ހުރިއިރު ، އޭނާގެ އަންހެނުންވެސް މޮޅުމީހަކަށްވާން ޖެހޭނެކަމުގައި ބުންޏެވެ. ޚައިރާދުގެ ހިތްއެދެނީ ، އަޝްހަރު ބޭނުންވާފަދަ އަނތްބަކަށް ވެ ، އަޝްހަރު ބޭނުންވާ ހުރިހާކަމެއް ފުރިހަމަވެފައިވާ އަނތްބަކަށްވުމަށްކަމުގައި ޚައިރާދު ބުނެއެވެ.

އަޝްހަރު ، ޚައިރާދުދެކެ ލޯބިވާކަން އޭނާއަށް ކަށަވަރެވެ. އޭގެ އިތުރަށް ޚައިރާދު ބޭނުންވަނީ ، ޚައިރާދަށްޓަކައި ފަޚުރުވެރިވާ މީހަކަށް އޭނާ ވުމަށެވެ. އެއީ ޚައިރާދުގެ ދިރިއުޅުމުގައި އޭނާ ފުރިހަމަކުރުމަށް ބޭނުންވާ އެންމެ މުހިންމު އެއްކަމެވެ. ހަމައެއާއެކު ، ލޯބިލޯބި ކުދިންކޮޅެއް ލިބި ، އަޝްހަރާއި އޭނާގެ ޙަޔާތުގެ ދިރުން އިތުރަށް އަލިވެގެން ދިއުމަކީވެސް ޚައިރާދުގެ އުއްމީދެކެވެ.

އަޝްހަރަށް ، އެރޭ ގެޔަށް އާދެވުނީ ކުޑަކޮށް ލަހުންނެވެ. ގެޔަށް އައިއިރު ، ޚައިރާދަށް އޮތީ ނިދިފައެވެ. އަޝްހަރު އުއްމީދުކޮށްގެން އައީ ، އޭނާ އޮފީސް ނިންމާފައި ގެޔަށް އަންނަންދެން ، ޚައިރާދު ނުނިދާ ހުންނާނެކަމަށެވެ. ކުޑައިރުކޮޅަކު ޚައިރާދާ ދިމާއަށް ބަލަހައްޓައިގެން ހުރުމަށްފަހު ، ކާރުގެ ތަޅުދަނޑި ތަޅުންގަނޑު މައްޗަށް ވައްޓައިލިއެވެ. އަޑު އެހާ ގަދައެއް ނުވިއެވެ. އޭނާއަތުގައި އޮތް ދަބަސް ، ގޮނޑިމައްޗަށް އެއްލިއެވެ. އަދިވެސް އަޑުމަޑީ ކަންނޭނގެއެވެ. އެންމެފަހުން ، ސައިޑްޓޭބަލްގެ ވަތްގަނޑު ދަމާލައި ބާރަށް ލައްޕައިލިއެވެ. އެވަރުންވެސް ޚައިރާދަކަށް ޚަބަރެއް ނުވިއެވެ. އެންމެފަހުން ، އަޝްހަރު ، ފުންމައިގެން އަރައި އެނދުމައްޗަށް ޖެހުނެވެ. އެއާއެކު ، ޚައިރާދަށް ސިއްސައިގެންގޮސް ހޭލެވުނެވެ.

ޚައިރާދު ، ލޯހުޅުވައިލުމަށްފަހު ، އަލުން ލޯމަރައިލިއެވެ. އެކަމާ އަޝްހަރަށް ކުޑަކޮށް އުނދަގޫވިއެވެ.

(ނުނިމޭ)