އެންމެން ޤަބޫލުކުރާ ޤައުމީ ތަރައްޤީގެ ދުރުރާސްތާ ޕްލޭނަކާ ތަޞައްވުރެއް އޮންނަންޖެހޭ ކަމަށް އެމްއެންޕީގެ ރައީސް މުހައްމަދު ނާޒިމް ވިދާޅުވެއްޖެއެވެ.
އެމް.އެން.ޕީ ގެ ކްލަބްހައުސް އިވެންޓުގައި ވާހަކަދައްކަވަމުން ނާޒިމް ވިދާޅުވީ ރާއްޖޭގެ ދުރުރާސްތާ ތަޞައްވުރެއް ކުރަހާލަންޖެހޭ ކަމަށެވެ.
ރާއްޖޭގެ ޒުވާނުންނަށާ އަދި ރާއްޖޭގެ މުސްތަޤުބަލަށްޓަކައި ތަރައްޤީގެ ދުރުރާސްތާ ތަޞައްވުރަކަށް އެންމެން މަސައްކަތް ކުރަން ނާޒިމް އެދިލެއްވިއެވެ. އަދި އެކަމުގައި ސިޔާސީ ވާދަވެރިކަމާ އަމިއްލަ އެދުން އެއް ފަރާތްކޮށް ރާއްޖެ މުސްތަޤުބަލުގައި އޮންނާނީ ކިހިނެއްތޯ ޕްލޭން ކުރަން މަސައްކަތްކުރުމަށް ގޮވާލެއްވިއެވެ.
މިގޮތަށް ތަޞައްވުރު ކުރަހައި، ޕްލޭން ހަދައި ވެރިކަން ބަދަލުވިޔަސް، އެ ތަޞައްވުރާ އެއްގޮތަށް މަސައްކަތް ކުރަންވާނެ ކަމުގައި ވިދާޅުވިއެވެ.
މިފަދަ ތަރައްޤީގެ ތަޞައްވުރުގެ މިސާލު ދައްކަވަމުން ރާއްޖޭގެ ކުރީގެ ވިހިވިހީގެ ތަޞައްވުރާ، މެލޭޝިޔާގެ 2030 ގެ ތަރަޢްޤީގެ ޕްލޭންގެ ވާހަކަ ނާޒިމް ހިއްސާކުރެއްވިއެވެ.
ނާޒިމް ވިދާޅުވީ، އެ މަނިކުފާނުގެ ވެރިކަމެއްގައި މިފަދަ ތަޞައްވުރެއް އެކުލަވާލުމަށްޓަކައި ސިޔާސީ ހުރިހާ ޕާޓީތަކާ އެކީ ވާހަކަ ދައްކައިގެން މިފަދަ ތަޞައްވުރެއް ކުރަހާލުމަށް މަސައްކަތް ކުރައްވާނެ ކަމުގައެވެ. އަދި އެ ތަޞައްވުރު ތައްޔާރުކޮށް ހުރިހާ ޕާޓީއަކުން އެ ތަޞައްވުރު އެންޑޯޒް ކުރައްވަންވާނެ ކަމުގައިވެސް ވިދާޅުވިއެވެ.
ނާޒިމް އަކީ އެމް.އެން.ޕީ. ގެ ރިޔާސީ ކެންޑިޑޭޓެވެ. ރިޔާސީ ވައުދުގެ ގޮތުގައި ނާޒިމް ގެންދަަވަނީ ރައްޔިތުންނާ އަދި ޤައުމީ ތަރައްޤީއާ ގުޅޭ މިފަދަ ތަފާތު އައު ސިޔާސަތުތައް ހާމަކުރައްވަމުންނެވެ.
