ޕާކިސްތާނުގެ ސުޕްރީމް ކޯޓުގެ ޗީފް ޖަސްޓިސް (އުއްތަމަ ފަނޑިޔާރު) ގެ ބާރުތައް ކުޑަކުރާ ގާނޫނެއް ޕާކިސްތާނުގެ ގާނޫނުހަދާ މަޖިލީހުން ފާސްކޮށްފި ކަމުގައި އެގައުމުގެ މިނިސްޓަރ އޮފް ލޯ އެންޑް ޖަސްޓިސް އާޒަމް ނަޒީރް ތަރާރް އިއްޔެ ވިދާޅުވެއްޖެއެވެ. އޭނާ މިކަން ހާމަކޮށްފައި މިވަނީ ސަރުކާރާއި ޝަރުއީ ދާއިރާގެ އެންމެ މަތީ ބާރާ ދެމެދު ދެބަސްވުން އުފެދިފައިވާ ވަގުތެއްގައެވެ.
މިނިސްޓަރު ތަރާރް ހުށަހެޅުއްވި ބިލް މަޖިލީހުގެ ދަށުގެ، ނޭޝަނަލް އެސެންބްލީން ބުދަ ދުވަހު ފާސްކޮށްފައި ވާއިރު، މަޖިލީހުގެ މަތީގެ، ސެނެޓުން ވަނީ ބުރާސްފަތި ދުވަހު އެ ބިލް ފާސްކޮށްފައެވެ.
"ގާނޫނުހަދާ މަޖިލީހުން ވަނީ ބިލް ފާސްކޮށްފައި." ހުކުރު ދުވަހު ނޫސްވެރިންނާ ބައްދަލުކުރައްވަމުން ލޯ މިނިސްޓަރ ވިދާޅުވިއެވެ.
ގާނޫނުހަދާ މަޖިލީހުން ފާސްކުރި ބިލް ގާނޫނަކަށްވެ އެއަށް އަމަލުކުރަން ފެށޭނީ ޕާކިސްތާނުގެ ރައީސު އާރިފް އަލްވީ ތަސްދީގުކުރެއްވުމުންނެވެ.
ޕާކިސްތާނުގެ ދެ ޕްރޮވިންސެއްގައި އަވަސް އިންތިޚާބު ބޭއްވުމުގެ މައްސަލައިގައި ބޮޑުވަޒީރު ޝެހެބާޒް ޝަރީފުގެ ސަރުކާރާ، ސުޕްރީމް ކޯޓާދެމެދު ވަނީ ބޮޑު ދެބަސްވުމެއް އުފެދިފައެވެ.
ޕާކިސްތާނުގެ 4 ޕްރޮވިންސުގެ ތެރޭން 2 ޕްރޮވިންސުގައި ވެރިކަން ކުރަނީ ކުރީގެ ބޮޑުވަޒީރު އިމްރާން ޚާންގެ ޕާޓީ ޕާކިސްތާން ތަހްރީކޭ އިންސާފް (ޕީޓީއައި) އިންނެވެ. އެއީ އެންމެ އާބާދީ ބޮޑު ޕްރޮވިންސު ޕަންޖާބާއި، އެންމެ އުތުރަށް އޮންނަ ޚައިބަރް ޕަޚްތޫންޚާ ޕްރޮވިންސެވެ. އަވަސް އިންތިޚާބެއް ބާއްވަން ބޮޑުވަޒީރު ޝެހެބާޒް ޝަރީފުގެ ސަރުކާރަށް ފިއްތުންތައް ކުރިމަތިކުރުމުގެ މަގުސަދުގައި ޕީޓީއައިން ވަނީ އެ ދެ ޕްރޮވިންސުގެ ގާނޫނުހަދާ މަޖިލިސް ފާއިތުވި ޑިސެންބަރު މަހު އުވާލައި އަވަސް އިންތިޚާބެއް ބޭއްވުމަށް ގޮވައިލާފައެވެ.
މިކަމާ ގުޅިގެން ޕާކިސްތާނު ސުޕްރީމްކޯޓުން ވަނީ އެ ދެ ޕްރޮވިންސުގައި 90 ދުވަހުގެތެރޭގައި އިންތިޚާބު ބޭއްވުމަށް އަމުރުކޮށްފައެވެ. އެހެންނަމަވެސް، ޝެހެބާޒް ޝަރީފުގެ ސަރުކާރުން ބުނަމުން ދަނީ އިގުތިސާދީ ގޮތުން ދަށް ހާލަތެއްގައި ގައުމު އޮތްއިރު، އަދި މި އަހަރުގެ ފަހުކޮޅު އާއްމު އިންތިޚާބު ބާއްވަން ޖެހޭއިރު، އަވަސް އިންތިޚާބުތައް ބޭއްވުމަކީ ކުރެވޭނޭ ކަމެއް ނޫންކަމުގައެވެ.
އަލަށް ފާސްކުރި ގާނޫގައި ވަނީ ޕެނަލްތައް އުފެއްދުމާ، ޝަރީއަތްތައް ވަކި ފަނޑިޔާރުންނާ ހަވާލުކުރުމާއި، އިސްތިއުނާފު މައްސަލަތައް އަޑުއަހަން ނިންމުމުގެ ބާރު އުއްތަމަ ފަނޑިޔާރުގެ ކިބައިން ނިގުޅައިގަނެ، އެބާރުތައް ތިން ފަނޑިޔާރުންގެ ކޮމިޓީއަކަށް ދޭގޮތަށް ކަނޑައަޅައިފައެވެ.
