
ސީޔާސީ ކުށްވެރިން ދޫކޮށްލެވުމަށް ފެބުރުއަރީމަހު ފުރަތަމަދުވަހުގެރޭ ސްޕްރީމްކޯޓުން ކުރައްވައިފައިވާ ހުކުމުގެ މައްޗަށް އިޔުރު ހުކުމެއް އައިސްގެން ނުވާނެ ކަމަށް ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދު މިއަދު ވިދާޅުވެއްޖެއެވެ.
އިނގިރޭސި ވިލާތުގައި ހުންނަވައިގެން ވީޓީވީއަށް ފޯނުން ދެއްވި އިންޓަރވިއުއެއްގައި އެމަނިކުފާނު ވިދާޅުވީ ފެބުރުއަރީ އެކެއްގެ ހުކުމަކީ ސްޕްރީމްކޯޓުގެ ބެންޗުގައި ހިމެނި ވަޑައިގަންނަވާ ފަސް ފަނޑިޔާރުންގެ އިއްތިފާގުން ކުރައްވައިފައިވާ ހުކުމެއް ކަމަށެވެ. އެހެންނަމަވެސް އެ ހުކުމް ސަރުކާރުން ބަލައިނުގަނެ އެންމެފަހުން މިހާރުވަނީ އުއްތަމަ ފަނޑިޔާރު އަބްދުﷲ ސައީދާއި، ފަނޑިޔާރު އަލީ ހަމީދު ހައްޔަރު ކޮށްފައެވެ. އެހެންނަމަވެސް އެ ބޭފުޅުން ހައްޔަރުގައި ތިއްބަވަނިކޮށް ސްޕްރީމްކޯޓުގެ އަނެއް ތިން ފަނޑިޔާރުންވަނީ އެ ހުކުމް ބާތިލްކުރައްވައި ހުކުމެއް ނެރުއްވައިފައެވެ.
"ސްޕްރީމް ކޯޓުން އެކެއް ފެބުރުއަރީގައި ނެރުނު ހުކުމުގައި ވަރަށް ސަރީހަކޮށް އެއޮތީ ބަޔާން ކޮށްފައި އެ ހުކުމަށް ނުފޫޒު ފޯރުވޭނެ ދައުލަތުގެ އެއްވެސް ތަނެއް، ޕްރޮސެކިޔުޓަރޖެނެރަލް، އެޓަރނީޖެނެރަލް، ރައީސުލްޖުމްހޫރިއްޔާ، ދައުލަތުގެ އެއްވެސް ފަރާތަކުން ކޮށްގެންނުވާނެޔޭ. އެހެންނަމަވެސް މިއޮތީ ކޯޓަށް އަރައިގަނެ، ބިރު ދައްކައި، ކޯޓުގެ ފަނޑިޔާރުންނަގައި، އިހާނާތްތެރިގޮތަކަށް ޖަލަށްލައިފައި. އެހެންވީމާ ސްޕްރީމްކޯޓުގެ އެކެއްފެބުރުއަރީގެ ހުކުމް ދެމިއޮތީ. އޭގެ މައްޗަށް ހުކުމެއް ނާންނާނެ. މިއީ ޣައިރުގާނޫނީ ކަމެއް. އަޅުގަނޑު ގަބޫލެއް ނުކުރަން ކޯޓުތެރެއިން ކަމެއް މިކަން ވެގެންއުޅެނީއެއް. އުއްތަމަ ފަނޑިޔާރު ބަންދުގައިހުރިހާ ހިނދަކު ފަހުންކުރި ހުކުމް ސައްހައެއްނުވާނެ،" ޖަމީލް ވިދާޅުވިއެވެ.