ސަރުކާރުން އަމާޒު ހިފާފައި ވަނީ ގުޅުންބޮޑު، ދިރުންހުރި އިޤުތިޞާދެއް އުފެއްދުމަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެ އެވެ.
މިއަދު އިއްވި ރިޔާސީ ބަޔާނުގައި ރައީސް ސާލިހު ވަނީ މޭ މަހުގެ 1 ވަނަ ދުވަހުން ފެށިގެން ޞިއްޙީ ދާއިރާގެ މުވައްޒަފުންނަށް މުސާރަ ބޮޑުވެގެންދާނެ ކަމަށާއި، ސަރުކާރުގެ ވުޒާރާގައި، %35 އެލަވަންސް މިހާރު ނުލިބި ތިބި މުވައްޒަފުންނަށް ވެސް މޭ މަހުގެ 1 ވަނަ ދުވަހުން ފެށިގެންް އެ އެލަވަންސް ދޭން ފަށާނެކަމަށް ވިދާޅުވެފައެވެ.
އެމަނިކުފާނު ވިދާޅުވިގޮތުގައި މާރިޗު މަހުން ފެށިގެން ރާއްޖޭގެ ޔުނިވަރސިޓީ ދާއިރާގެ މުވައްޒަފުންގެ މުސާރައަށް ވެސް ހެޔޮބަދަލެއް އަންނާނެ ކަމަށާއި، ޕޭ ހާމަނައިޒް ކުރުމުގެ މަސައްކަތް ނިމިގެން ދާއިރު، ޖުމްލަކޮށް ސިވިލް ސަރވިސްގެ ހުރިހާ މުވައްޒަފުން އޭގައި ޝާމިލްވާނެކަމުގައި ވެސް އެމަނިކުފާނު ވިދާޅުވިއެވެ.
މީގެ އިތުރުން ރައީސުލްޖުމްހޫރިއްޔާގެ ރިޔާސީ ބަޔާނުގައި ވަނީ، މިނިމަމް ވޭޖުގެ ބޮޑު ބަދަލާއި، ސާރވިސް ޗާޖަށް ގެނެވުނު ބަދަލާއި އެކު، ޢާއިލާތަކުގެ ދިރިއުޅުމުގެ ފެންވަރު މަތިވެގެން ދިޔަކަން ފާހަގަކުރައްވާފައެވެ. މަސައްކަތާ ދިރިއުޅުމުގެ މާޙައުލުގައި ޤާނޫނުގެ ރައްކާތެރިކަމާއި ޙިމާޔަތް އޮތުމަކީ ކޮންމެހެން ބޭނުންތެރި ކަމެއްކަން ފާހަގަކުރައްވައި، އެކަމާއި ގުޅޭ ބިލްތައް މި ފެށުނު މަޖިލީހުގެ ފުރަތަމަ ދައުރުގައި ފާސްކޮށްދެއްވުމަށް ވެސް ރައީސުލްޖުމްހޫރިއްޔާ އެދިވަޑައިގެންނެވިއެވެ.
