ރާއްޖޭގައި މިހާރުއުފެދިފައިވާ "ސިޔާސީ ކޮޅިގަނޑު" އިން މާލަސްތަކެއް ނުވެ ސަލާމަތްވާނެ ކަމަށް ޑިފެންސް މިނިސްޓަރު އާދަމް ޝަރީފް އުމުރު ވިދާޅުވެއްޖެއެވެ.
ޕީއެސްއެމްއަށް ދެއްވި އިންޓަވިއުއެއްގައި އެމަނިކުފާނު ވިދާޅުވީ "އަޅުގަނޑަށް ގަބޫލުކުރެވޭ ގޮތުގައި މާލަސްތަކެއް ނުވެ މިއުފެދިފައިވާ ސިޔާސީ ކޮޅިގަނޑުން މިގައުމު އަޅުގަނޑުމެންނަށް ސަލާމަތްކުރެވޭނެ،" ކަމަށެވެ.
އެމަނިކުފާނު ވިދާޅުވީ މާތްﷲ ގެ ރަހުމަތާއި މަދަދާއެކީގައި ސަލާމަތުގެ އައްސޭރިއަކަށް ވަރަށް އަވަހަށް ދަތުރުކުރައްވާނެ ކަމަށެވެ. "ރައީސް ޔާމީނަކީ މިބާވަތުގެ ކޮންމެ ކަމެއްގައި ވަރަށް ހިކުމަތްތެރި ވަރަށް ހިތްވަރުގަދަ ހަރުދަނާ ލީޑަރެއް. ވަރަށް ހިކުމަތްތެރިކަމާއެކުގައި މަސައްކަތް ކުރައްވަމުން އެގެންދަވަނީ. އަޅުގަނޑުމެންނަށް ކައިރި ގައުމުތަކުން މިސާލުޖަހާ ކަމަށްވާނަމަ މަހާތުމާ ގާނދީ ފަދަ ހިކުމަތްތެރި ޚިދުމަތްތެރި ވަރަށް ކެތްތެރި ބޭފުޅެއް ރައީސް ޔާމީނަކީ. އެމަނިކުފާނުގެ ޒައާމަތުގައި ވަރަށް އަވަހަށް މިގައުމުގެ ނައު އަމާން ބަދަނރަކަށް ދަތުރުކުރެވޭނެ،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ދިވެހިރާއްޖޭގެ ސަލާމަތީ ބާރުތަކުންއޮތީ މިކަމުގައިވެސް ވަރަށް ބަދަހިކަންމަތީގައި ކަމަށެވެ. މިއީ ގާނޫނީ ގޮތުން އުފެދިފައިވާ ސަރުކާރެއް ކަމަށާއި، ގާނޫނާޚިލާފުނޫން ކޮންމެކަމަކަށް ސަލާމަތީ ބާރުތަކުން ސަރުކާރަށް ފުރިހަމައަށް އެއްބާރުލުން ދޭނެކަމަށްވެސްވެސް ވިދާޅުވިއެވެ.
އެމަނިކުފާނު ވިދާޅުވީ ދިވެހި ސިފައިންގެ ބަދަހި ސަފުތަކާއި ފުލުހުން، ފައީތުވި 72 ގަޑިއިރު ތެރޭގައި މިކަމުގައި މަސައްކަތް ކުރެއްވިގޮތް އެންމެނަށް ފެނިފައިވާނެ ކަމަށެވެ. "މިކަމުގައި ދިވެހިސަރުކާރަށް ތާއީދު ކުރުމާއެކީގައި މިގައުމުގެ މިނިވަންކަމާއި އިސްތިގުލާލު ދެމެހެއްޓުމަށްޓަކައި ދިވެހި އަސްކަރިއްޔާއި ދިވެހި ފުލުހުން ވަރަށް ސާބިތުކަމާއެކުތިބިކަން އަޅުގަނޑުހިތުން ތިޔަ ހުރިހާ ބޭފުޅުންނަށް ފާހަގަކުރެވިގެންދާނެ،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ރާއްޖޭގައި މިހާރު ހިނގަމުންދާ ކަންކަމުގެ ހަގީގަތް ބޭރުގެ ގައުމުތަކަށް އޮޅުންފިލަމުންދާވަރަކަށް ދިވެހިސަރުކާރަށް އެގައުމުތަކުން ކުރަމުންގެންދާ ތާއިދު އިތުރުވެސްވާނެ ކަމަށް ގަބޫލުފުޅު ކުރައްވާ ކަމަށެވެ.
