މިހާރު ކުރަމުން އަންނަ އެންމެ މުހިއްމު އެއް މަސައްކަތަކީ ކޫއްޑޫގެ ކެޕޭސިޓީ މަތިކުރުން ކަމަށް ފިޝަރީޒް މިނިސްޓަރ ޑރ. ހުސައިން ރަޝީދު ހަސަން ވިދާޅުވެއްޖެ އެވެ.
މަސްވެރިންގެ ދުވަސް ފާހަގަކުރުމަށް ގދ. ފަރެސްމާތޮޑާގައި ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ މި ސަރުކާރުން މަސްވެރިންގެ ކަންބޮޑުވުންތައް އަޑު އަހަމުންދާ ކަމަށާއި ކޮންމެ އަހަރަކު ވެސް ބާއްވާ މަސްވެރިންގެ ފޯރަމް މިއަހަރުވެސް ބާއްވާ މަސްވެރިކަމާއި ގުޅޭ ދައްކަން އުނދަގޫ އަދި ނުދައްކާ ހުރި ނަމަވެސް ދައްކާ ޖެހޭ އެތައް ވާހަކަތަކެއް މަސްވެރިންނާއެކު ދައްކާފައިވާ ކަމަށެވެ.
ރޯމަސް ބޭރަށް އެކްސްޕޯޓް ކުރުން މަދުކޮށް ނުވަތަ ހުއްޓާލާ މަތީ އަގު ލިބޭ ގޮތަށް މަހުގެ އުފެއްދުންތައް އެކްސްޕޯޓް ކުރަން ފަށަން ޖެހިފައިވާ ކަން ފާހަގަ ކުރައްވާ މިނިސްޓަރ ވިދާޅުވީ މަސް ގަންނަ ކެޕޭސިޓީ ނެތް މިންވަރަށް މަސްވެރިކަން ފަހި މޫސުމުގައި މަސް ބާނަމުންދާ ކަމަށެވެ. އަދި އިންޑިއާ ކަނޑުގައި މިހާރު މަސް މަދުވަމުންދާ ކަމަށާއި މިހާރަށް ވުރެ ރަނގަޅު ނިޒާމެއްގެ ތެރެއިން މަސް ބާނަން ޖެހޭ ކަމަށް ވެސް ވިދާޅުވި އެވެ.
މިނިސްޓަރ ވިދާޅުވީ މި ސަރުކާރުން ވަނީ މަސްވެރިކަމުގެ ދޮރުތައް ހުޅުވާލާފައި ކަމަށާއި މަސް ޕްރޮސެސް ކޮށްގެން އެކްސްޕޯޓު ކުރާއިރު، ބޮޑު އަގު އެނގޭ ކޮންމެ މީހަކަށް ވެސް އެ ފުރުސަތު އެބައޮތް ކަމަށެވެ.
ކޫއްޑޫގެ ކެޕޭސިޓީ މަތިކުރުމުގެ ވާހަކަ މިނިސްޓަރ ދެއްކެވިއިރު، އެ ފެކްޓަރީ އަށް މި ފަހަކާ ޖެހެންދެން ކިރަމުން އައީ ދުވާލަކަށް 240 ޓަނުގެ މަހެވެ. އަދި ފްރީޒިންގ ސިސްޓަމްގެ ބަދަލާއެކު އިތުރު 50 ޓަނު އިތުރުކޮށް، މިހާރު 290 ޓަނުގެ މަސް ކޫއްޑު އަށް އަންނަނީ ކިރަމުން ނެވެ.
އަންނަ އަހަރުގެ ޖުލައިގެ ނިޔަލަށް އިތުރު 200 ޓަނުގެ ކެޕޭސިޓީ ގާއިމު ކުރުމުން ދުވާލަކު މަސް ކިރޭ ކެޕޭސިޓީ 530 ޓަނަށް އަރާނެ އެވެ.
