ފީފާ ވޯލްޑް ކަޕް 2022 ގެ ގްރޫޕް އެފް ގައި މިރޭ ބެލްޖިއަމް ބަލިކޮށް ދެވަނަ ބުރުގެ ފުރުސަތު މޮރޮކޯއިން ބޮޑުކޮށްފިއެވެ.
މޮރޮކޯއިން ބެލްޖިއަމް ބަލިކުރީ 2-0 ގެ ނަތީޖާއިންނެވެ.
ދޯހާގެ އަލް ތުމާމާ ސްޓޭޑިއަމުގައި ކުރިޔަށް ދިޔަ މެޗު ފެށިގެން ރަނގަޅަށް ކުޅެފައިވަނި މޮރޮކޯއިންނެވެ. އެ ގޮތުން އެޓީމުން ބެލްޖިއަމްގެ ގޯލަށް އެޓޭކް ކުރުމަށް މަސައްކަތް ކުރަމުން ދިޔައެވެ. ނަމަވެސް އެކަށީގެންވާ ނުރައްކާތެރި ހަމަލާއެއް މޮރޮކޯއަށް އުފެއްދިފައެއް ނުވެއެވެ. ހާފުގެ ވަކި ހިސާބަކުން މެޗުގެ ކޮންޓްރޯލް ބެލްޖިއަމުން އަތުލިއިރު، ފުލުފުލު ތިން ހަމަލާއެއް ބެލްޖިއަމުން ފޮނުވާލިއެވެ. ނަމަވެސް މި ހަމަލާތައް ކާމިޔާބެއް ނުވިއެވެ. އޭގެ ފަހުން މޮރޮކޯގެ ހަމަލާތަކެއް ވެސް ބެލްޖިއަމްގެ ގޯލަށް އަމާޒުވިއެވެ. ނަމަވެސް މި ހަމަލާތައް ވެސް ވި ބޭކާރެވެ.
ފުރަތަމަ ހާފުގެ އެންމެ ފަހު ވަގުތުގައި މޮރޮކޯއިން ވަނި ލަނޑެއް ވެސް ޖަހައިފައެވެ. ލިބުނު ހިލޭ ޖެހުމަކުން ހަކީމް ޒިޔެޗް އެ ބޯޅަ ބެލްޖިއަމްގެ ގޯލުތެރެއަށް ފޮނުވާލި ނަމަވެސް ވީއޭއާރު ބެލުމަށް ފަހު އެއީ އޮފްސައިޑް ލަނޑެއް ކަމަށް ނިންމީއެވެ.
މެޗުގެ ފުރަތަމަ ހާފުގައި ލަނޑެއް ފެނިގެން ނުދިޔަ ނަމަވެސް ފަހު ހާފުގެ 73 ވަނަ މިނެޓުގައި މޮރޮކޯއިން އެޓީމުގެ ފުރަތަމަ ލަނޑު ޖަހާ ލިޑުނެގިއެވެ. މިއީ ބެލްޖިއަމްގެ އޭރިޔާގެ އަރިމަތިން ލިބުނު ހިލޭ ޖެހުމަކުން ސަބީރީ ކާމިޔާބު ކޮށްދިން ލަނޑެކެވެ.
މި ލަނޑަށް ފަހު ނަތީޖާ ހަމަހަމަކުރުމަށް ބެލްޖިއަމްއިން ވަރަށް ބޮޑަށް ކުރިޔަށް ޖެހިގެން ކުޅެމުން ދިޔައިރު، އޭގެ ފައިދާ ނަގައި މޮރޮކޯއިން އުފެއްދި ކައުންޓަރ އެޓޭކެއްގައި ހަކީމް ޒިޔެކް ދިން ބޯޅައަކުން މޮރޮކޯގެ ދެ ވަނަ ލަނޑު މެޗުގެ އިތުރު ވަގުތުގައި ކާމިޔާބުކޮށްދިނީ އަބޫކްލާލްއެވެ.
މި މޮޅާއި އެކު މޮރޮކޯއަށް ގްރޫޕްގެ އެއް ވަނަ މަގާމް ލިބުނުއިރު، އެ ޓީމަށް ކުޅުނު ދެ މެޗުން ލިބިފައިވަނީ ހަތަރު ޕޮއިންޓެވެ. ގުރޫޕުގެ ދެ ވަނައިގައި އޮތް ބެލްޖިއަމްއަށް ދެ މެޗުން ލިބިފައި ވަނީ ތިން ޕޮއިންޓެވެ.
