ފީފާ ވޯލްޑް ކަޕް 2022 ގެ ގްރޫޕް އީ ގައި މިއަދު ޖަޕާން އާ ދެކޮޅަށް ކުޅުނު މެޗު 1-0 ގެ ނަތީޖާއިން ކޮސްޓަރިކާ ކާމިޔާބު ކޮށްފިއެވެ.
މިއަދުގެ މެޗުގައި ޖަޕާނުން ކޮސްޓަރިކާއަށްވުރެ ރަނގަޅަށް ކުޅެ ގިނަ އެޓޭކް ތަކެއް އުފެއްދި ނަމަވެސް މަސައްކަތް ކާމިޔާބު ނުވިއެވެ. ޖަޕާންގެ ގިނަ ހަމަލާތައް ފެއިލް ކޮށްލީ މެޗުގައި މޮޅު ކުޅުމެއް ދެއްކި ކޮސްޓަރިކާގެ ގޯލް ކީޕަރު ކޭލޯ ނާވަސްއެވެ.
މި މެޗުގެ ފުރަތަމަ ހާފުގެ ކުޅުން ނިމުނުއިރު، ދެ ޓީމުން ކުރެ ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ.
މިއަދުގެ މެޗުގައި ފެނުނު ހަމައެކަނި ލަނޑު މެޗުގެ 80 ވަނަ މިނިޓުގައި ކޮސްޓަރިކާއިން ކާމިޔާބު ކުރިއިރު، މި ލަނޑު ކޮސްޓަރިކާއަށް ކާމިޔާބު ކޮށްދިނީ ކޭޝާ ފުލާއެވެ. ޖަޕާނުން ގެއްލުވާލި ބޯޅައެއްގެ ފައިދާ ނަގައި، ކޮސްޓަރިކާގެ ޓެޖެޑާ ދިން ބޯޅަ ކޭޝާ ފުލާ ފޮނުވާލުމުން ގޯލަށް ވަނީ ޖަޕާން ކީޕަރުގެ އަތުގައި ޖެހިފައެވެ.
މި ނަތީޖާއާއެކު ގްރޫޕް އީގެ އެއްވަނާގައި އޮތް ސްޕެއިން، އަދި ދެވަނާގައި އޮތް ޖަޕާން އަދި ތިން ވަނާގައި އޮތް ކޮސްޓަރިކާ އަށް ވެސް ލިބިފައިވަނީ ތިން ޕޮއިންޓެވެ. ނަމަވެސް ގުރޫޕުގެ އެއްވަނަ ސްޕެއިން އަށް އަދި ދެވަނަ ޖަޕާނަށް ލިބެނީ ފައިދާ ގޯލުންނެވެ.
މި ގުރުޕުގައި ހިމެނޭ ޖަރުމަން އަދި ސްޕެއިން މިރޭ ރާއްޖޭ ގަޑިން 12 ޖަހާއިރު، ބައްދަލުކުރާނެއެވެ. މި މެޗަށް މި ދެޓީމުން ނުކުންނައިރު، ޖަރުމަން އޮތީ އެޓީމުން ކުޅުނު ފުރަތަމަ، މެޗުން ޖަޕާން އަތުން ބަލިވެފައެވެ. އެހެން ކަމުން މިރޭ ކޮންމެ ހެންވެސް ދެވަނަ ބުރަށް ދިއުމަށް ޖަރުމަނަށް ޖެހޭނި ސްޕެއިން ބަލިކުރާށެވެ. އަދި މި މެޗުން ސްޕެއިން މޮޅުވެއްޖެނަމަ އެޓީމަށް ވަނަ ބުރު ޔަގީންވެގެންދާނެއެވެ. ޖަރުމަން ބަލިވެއްޖެ ނަމަ އެޓީމު މުބާރާތުން ކަޓާނެއެވެ.
